اتاپ ايتقاندا, توتەنشە جاعداي كەزىندە زارداپ شەككەن ءىرى كاسىپكەرلىك سۋبەكتىلەرىن جانە اگروونەركاسىپ كەشەنىندەگى كاسىپكەرلەردى نەسيەلەۋگە قوسىمشا 200 ملرد تەڭگە ءبولىندى. باعدارلامانى قولدانۋ مەرزىمى 2021 جىلدىڭ 31 جەلتوقسانىنا دەيىن, ال قارجىنى يگەرۋ مەرزىمى 2021 جىلدىڭ 31 ناۋرىزىنا دەيىن ۇزارتىلدى.
ۇلتتىق بانك قابىلداعان وزگەرىستەردى ىسكە اسىرۋ جانە باعدارلامامەن قامتۋدى كەڭەيتۋ ماقساتىندا ۇلتتىق ەكونوميكا مينيسترلىگى, «اتامەكەن» ۇلتتىق كاسىپكەرلەر پالاتاسىمەن بىرلەسىپ, توتەنشە جاعداي ۋاقىتىندا بارىنشا زارداپ شەككەن سالالاردى انىقتاۋ بويىنشا جۇمىس جۇرگىزگەن. سونىڭ ناتيجەسىندە وندەۋ ونەركاسىبىندە جانە قىزمەت كورسەتۋ سالاسىندا زارداپ شەككەن قىزمەت تۇرلەرىنىڭ تىزبەسى ايقىندالدى. ونى ۇلتتىق ەكونوميكا مينيسترلىگى 2020 جىلعى 18 قاراشادا ۇلتتىق بانككە بەكىتۋگە ۇسىندى. ول بانك توراعاسى مەن ءمينيستردىڭ بىرلەسكەن بۇيرىعىمەن بەكىتىلدى.
وسىلايشا, توتەنشە جاعداي ەنگىزىلگەننەن كەيىن شىعىنعا ۇشىراعان جانە ەكونوميكانىڭ زارداپ شەككەن سالالارىندا قىزمەتىن جۇزەگە اسىراتىن ءىرى كاسىپورىندار جەڭىلدەتىلگەن نەسيەلەردى الۋ ءۇشىن ەكىنشى دەڭگەيلى بانكتەرگە ءوتىنىش بەرۋى كەرەك. بۇل رەتتە ءىرى كاسىپكەرلىك سۋبەكتىلەرىنە ليميت بەلگىلەنگەن. ياعني قارىز الۋشىعا 6 ملرد تەڭگەدەن ارتىق بەرىلمەيدى. شاعىن جانە ورتا بيزنەس سۋبەكتىلەرىنە ارنالعان ليميت – 3 ملرد تەڭگە. جەكە كاسىپكەرلىك وكىلدەرى الاتىن سوما 50 ملن تەڭگەدەن ارتىق بولماۋى كەرەك.
اگروونەركاسىپتى جەڭىلدىكپەن نەسيەلەۋگە بولىنگەن قوسىمشا 200 ملرد تەڭگەنىڭ 100 ملرد تەڭگەسىنە ليميت ءبولىندى. ونىڭ ىشىندە 70 ملرد تەڭگە ەكىنشى دەڭگەيلى بانكتەر ارقىلى, ال 30 ملرد تەڭگە «اگرارلىق نەسيە كورپوراتسياسى» اق ارقىلى ۇلەستىرىلۋى كەرەك.
باعدارلاما قاتىسۋشىلارىنىڭ كوبەيۋىنە بايلانىستى ونىڭ اتاۋى «كاسىپكەرلىك سۋبەكتىلەرىن جەڭىلدىكپەن نەسيەلەۋ باعدارلاماسى» دەپ وزگەرگەنىن دە اتاپ وتكەن ءجون. باعدارلاما مەملەكەت باسشىسىنىڭ تاپسىرماسى بويىنشا بيىلعى ناۋرىزدا قابىلدانعان بولاتىن. ول توتەنشە جاعداي كەزىندە زارداپ شەككەن كاسىپكەرلەردى قولداۋعا باعىتتالعان.
وسى جىلدىڭ 18 قاراشاسىنداعى دەرەكتەر بويىنشا ەكىنشى دەڭگەيلى بانكتەر 567,4 ملرد تەڭگەگە 2 311 ءوتىنىش قابىلداعان. 1 370 شاعىن جانە ورتا كاسىپكەرلىك سۋبەكتىسىنە 455,3 ملرد تەڭگە قارىز بەرىلدى. ونىڭ ىشىندە 101,6 ملرد تەڭگە بۇرىن بەرىلگەن قارىزداردى وتەۋدەن تۇسكەن اقشا ەسەبىنەن ۇلەستىرىلدى.
بولىنگەن قاراجاتتىڭ نەگىزگى ۇلەسى ساۋدا سالاسىنداعى شاعىن جانە ورتا بيزنەس سۋبەكتىلەرىنە (319 ملرد تەڭگە نەمەسە جالپى سومانىڭ 70 پايىزى), قۇرىلىسقا (44,9 ملرد تەڭگە نەمەسە 9,9 پايىز), وڭدەۋشى ونەركاسىپكە (39,8 ملرد تەڭگە نەمەسە 8,7 پايىز) تيەسىلى.
