ازاماتتىق قوعام وكىلدەرى زورلىق-زومبىلىقتى بولدىرماۋ ماسەلەلەرىن تالقىلادى

قوعام • 25 قاراشا، 2020

ازاماتتىق قوعام وكىلدەرى زورلىق-زومبىلىقتى بولدىرماۋ ماسەلەلەرىن تالقىلادى

9 رەت كورسەتىلدى

25 قاراشادا «قوعام جانە مەملەكەت: سەرىكتەستىك پەن دامۋدىڭ 30 جىلى «Birgemiz» اتتى IX ازاماتتىق فورۋم اياسىندا ايەلدەرگە قاتىستى زورلىق-زومبىلىقتى جويۋ كۇرەسىنىڭ حالىقارالىق كۇنىندە «ازاماتتىق قوعام زورلىق-زومبىلىققا قارسى» تاقىرىبىندا ديالوگ الاڭى ءوتتى.

اقمارال اعزامقىزى

ءىس-شاراعا قر ادام قۇقىقتارى جونىندەگى ۋاكىل ە. ءازىموۆا، قر پارلامەنتى ءماجىلىسىنىڭ دەپۋتاتى ي. سميرنوۆا، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ل. رامازانوۆا، اقپارات جانە قوعامدىق دامۋ ۆيتسە-ءمينيسترى ا. ورالوۆ، قۇقىق قورعاۋشىلار، ۇەۇ باسشىلارى، مەملەكەتتىك ورگانداردىڭ وكىلدەرى، مەكتەپ بەلسەندىلەرى اراسىنان وقۋشىلار قاتىستى.
قازاقستان ازاماتتىق اليانسىنىڭ پرەزيدەنتى ب.گ. نۇرعازيەۆا قۇتتىقتاۋ ءسوز سويلەدى.

«وتباسى - قوعامنىڭ نەگىزى. بۇگىنگى كەزدەسۋ ايەلدەر مەن بالالارعا قاتىستى زورلىق-زومبىلىق ماسەلەلەرىن شەشۋ بويىنشا دۇرىس تاسىلدەردى ازىرلەۋ ءۇشىن ەرەكشە ماڭىزدى»، - دەدى سپيكەر.
ءىس-شارانىڭ مودەراتورى ل. رامازانوۆا رەسمي ستاتيستيكا دەرەكتەرى بويىنشا اعىمداعى جىلدىڭ 9 ايىندا قىلمىستىق قۇقىق بۇزۋشىلىقتار سانى 2019 جىلدىڭ سايكەس كەزەڭىمەن سالىستىرعاندا 34،4%-عا ازايعانىن، الايدا وتباسىلىق-تۇرمىستىق قۇقىق بۇزۋشىلىقتار سانى 2،5 ەسەگە وسكەنىن اتاپ ءوتتى.
قر ءىىم اكىمشىلىك پوليتسيا كوميتەتى يۋۆەنالدى پوليتسيا جانە ايەلدەردى زورلىق-زومبىلىقتان قورعاۋ باسقارماسىنىڭ باستىعى ا. وسپانوۆ اتاپ وتكەندەي: «ەڭ كوپ زورلىق-زومبىلىق ماس كۇيىندە جاسالادى، اگرەسسورلاردىڭ 80%-ى جۇمىسسىز. زارداپ شەككەندەردىڭ 45% - ايەلدەر، 30% - كامەلەتكە تولماعاندار. اعىمداعى جىلى تۇرمىستىق قۇقىق بۇزۋشىلىقتاردىڭ ءوسۋى كوبىنەسە پاندەميا جاعدايىندا حالىقتىڭ وقشاۋلانۋىنا بايلانىستى بولدى. جىل باسىنان بەرى تۇرمىستىق زورلىق-زومبىلىق قۇرباندارى ءۇشىن داعدارىس ورتالىقتارىنا 9 مىڭعا جۋىق جابىرلەنۋشى ايەل جۇگىنگەن».

قر پارلامەنتى ءماجىلىسىنىڭ دەپۋتاتى ي. سميرنوۆا زورلىق-زومبىلىققا ىقپال ەتەتىن سەبەپتەردى زەردەلەۋ قاجەتتىگى تۋرالى ايتتى. «ماجىلىستە قارالىپ وتىرعان وتباسىلىق-تۇرمىستىق زورلىق-زومبىلىققا قارسى ءىس-قيمىل ماسەلەلەرى جونىندەگى زاڭ جوباسى وتباسىداعى جاعدايدى جاقسارتۋعا، قۇقىق بۇزۋشىلىقتار دەڭگەيىن جانە اگرەسسوردىڭ وتباسى مۇشەلەرىنە اسەر ەتۋىن تومەندەتۋگە باعىتتالعان. شارالاردى كۇشەيتۋ جانە قاتاڭداتۋ ءاردايىم پايدالى بولا بەرمەيدى»، - دەپ اتاپ ءوتتى دەپۋتات.

كامەلەتكە تولماعاندارعا قاتىستى زورلىق-زومبىلىقتىڭ الدىن الۋ تۋرالى بالالار بلوگەرى ۆالەري كۋدرياۆتسەۆ ءوز پىكىرىن ءبىلدىردى: «مەكتەپ ينسپەكتورلارى مەن پسيحولوگتار تاراپىنان بالالارمەن دوستىق قارىم-قاتىناس ورناتۋ ماسەلەسى پىسىقتالىپ جاتقان جوق. مەن ءوز قۇرداستارىمنىڭ اراسىندا جۇرگىزگەن ساۋالناماعا سايكەس، اگرەسسورلار كوبىنەسە ۇيدە زورلىق-زومبىلىققا ۇشىراعان بالالار. ءبىز ەلىمىزدىڭ بولاشاعىمىز، سوندىقتان ءبىزدىڭ قۇقىقتارىمىزعا قاتىستى زاڭ جوبالارىن تالقىلاۋ كەزىندە جاسوسپىرىمدەر اراسىنان وكىلدەردى قوسۋدى سۇرايمىن».

سونىمەن قاتار، ۆالەري ءوزىنىڭ قۇرداستارىنىڭ كوپشىلىگى مەكتەپ پسيحولوگتارىنىڭ جۇمىسى تۋرالى بىلمەيتىنىن جانە ولاردىڭ كومەگىنە جۇگىنبەيتىنىن اتاپ ءوتتى.

ءوز كەزەگىندە قر پرەزيدەنتى جانىنداعى ايەلدەر ىستەرى مەن وتباسىلىق-دەموگرافيالىق ساياسات جونىندەگى كوميسسيانىڭ توراعاسى ل. رامازانوۆا ۆالەري كۋدرياۆتسەۆتى ۇلتتىق كوميسسيا جانىنداعى ساراپشىلار كەڭەسىنە شاقىردى.

اقتوبە وبلىسىنىڭ مەكتەپ بەلسەندىسى اتا-انالار مەن بالالار اراسىنداعى ءوزارا قارىم-قاتىناستى نىعايتۋ ءۇشىن بىرلەسكەن كۆەست ويىندارىن وتكىزۋدى، ادامدار كوپ شوعىرلانعان جەرلەردە اقپاراتتىق بيلبوردتار ورنالاستىرۋدى ۇسىندى.

قر ادام قۇقىقتارى جونىندەگى ۋاكىل ە. ءازىموۆا ءوز سوزىندە ادام قۇقىقتارىن قورعاۋ، زورلىق-زومبىلىقتى بولدىرماۋ، قۇقىقتىق كومەك كورسەتۋ ماسەلەلەرىمەن كاسىبي تۇردە اينالىساتىن ۇەۇ قولداۋ تەتىكتەرىن قايتا قاراۋعا نازار اۋداردى.
«قازاقستان كوپ ۇلتتى مەملەكەت بولىپ تابىلادى، ەشبىر ۇلتتا زورلىق-زومبىلىقتى قولدايتىن قاعيداتتار مەن داستۇرلەر جوق، قۇندىلىقتاردى دۇرىس جەتكىزۋ جانە وسى باعىتتا ازاماتتىق سەكتوردىڭ الەۋەتىن پايدالانۋ قاجەت. ازاماتتىق قوعامنىڭ بەلسەندى جانە كاسىبي وكىلدەرى قوعامدىق جانە حالىقارالىق دۇنيەتانىمعا اسەر ەتە الادى»، - دەپ اتاپ ءوتتى سپيكەر.

ديالوگ الاڭىنىڭ قورىتىندىسى بويىنشا قاتىسۋشىلار تۇرمىستىق زورلىق-زومبىلىقتىڭ الدىن الۋدى كۇشەيتۋ، ۆەدومستۆوارالىق ءوزارا ءىس-قيمىل تەتىكتەرىن جەتىلدىرۋ جونىندەگى شارالاردى ىسكە اسىرۋ تۋرالى ۇسىنىستار ءبىلدىردى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز