كونفەرەنتسيا قۇران وقۋمەن جانە باس ءمۇفتي ناۋرىزباي قاجى تاعان ۇلىنىڭ مەرەكەلىك قۇتتىقتاۋىمەن اشىلدى.
قمدب توراعاسى ونلاين كونفەرەنتسيا مەيماندارى ءدىني باسقارمانى ءار جىلدارى باسقارعان باس مۇفتيلەر راتبەك قاجى نىسانباي ۇلى, ءابساتتار قاجى دەربىسالى, ەرجان قاجى مالعاجى ۇلى, سەرىكباي قاجى وراز جانە باسقا دا جيىن قاتىسۋشىلارىنا العىس ايتىپ, ءمۇفتياتتىڭ 30 جىل ىشىندە اتقارعان شارالارىنا توقتالدى.
كونفەرەنتسياعا تۇركيا ءدىن ىستەرى باسقارماسىنىڭ توراعاسى ءالي ەرباش, رەسەي مۇسىلماندارى ءدىني باسقارماسىنىڭ توراعاسى, رەسەي مۇفتيلەر كەڭەسىنىڭ توراعاسى راۆيل گاينۋتدين, وزبەكستان مۇسىلماندارى ءدىني باسقارماسىنىڭ توراعاسى ۋسمانحان اليموۆ, قىرعىزستان مۇسىلماندارى ءدىني باسقارماسىنىڭ توراعاسى ماكساتبەك توكتومۋشەۆ, تاجىكستان يسلام ورتالىعىنىڭ توراعاسى سايدمۋكاررام ابدۋلكوديرزودا, تاتارستان مۇسىلماندارى ءدىني باسقارماسىنىڭ توراعاسى كاميل ساميگۋللين, موڭعوليا مۇسىلمان ۇيىمدارى وداعىنىڭ توراعاسى باتىربەك قاجى حادىس ونلاين قاتىسۋدا. سونىمەن قاتار ەلىمىزدىڭ زيالى قاۋىم وكىلدەرى مەن عالىمدار بايانداما جاساماق. شەتەلدىك مەيماندار جيىندا ونلاين قۇتتىقتاۋ ءسوز سويلەيدى.
