قازاقستان • 25 قاراشا، 2020

ەكولوگيانى جاقسارتۋدىڭ جول كارتالارى 10 قالادا لاستانۋ يندەكسىن تۇسىرەدى

8 رەت كورسەتىلدى

بۇگىن قر ەكولوگيا، گەولوگيا جانە تابيعي رەسۋرستار مينيسترلىگى Facebook پاراقشاسىنداعى تىكەلەي ەفيردەگى جيىندا ەكولوگيالىق رەتتەۋ جانە باقىلاۋ كوميتەتىنىڭ وڭىرلىك جەتەكشىلەرىمەن وبلىستارداعى ەكولوگيالىق احۋالدى جاقسارتۋ بويىنشا جول كارتالارى تالقىلاندى.

ايتا كەتەيىك، ەكولوگيا ءمينيسترى ماعزۇم مىرزاعاليەۆتىڭ قاتىسۋىمەن بۇعان دەيىن بارلىق ءوڭىردىڭ قوعام وكىلدەرىمەن، ەكوبەلسەندىلەرمەن ايماقتارداعى ەكولوگيالىق احۋال بويىنشا 17 ونلاين-كەزدەسۋ ءوتىپ، ولارعا 25 مىڭ قازاقستاندىق قاتىسقان. ولاردىڭ ۇسىنىستارى ەسكەرىلە وتىرىپ، ناتيجەسىندە قورشاعان ورتا احۋالىن جاقسارتۋ جونىندەگى ناقتى شارالاردى كوزدەيتىن 17 جول كارتاسى دايىندالدى.

«وڭىرلەردەگى نەگىزگى ەكولوگيالىق پروبلەمالارعا اتموسفەرالىق اۋانىڭ، بەتكى سۋلاردىڭ لاستانۋى، قاتتى تۇرمىستىق قالدىقتاردى قايتا وڭدەۋ دەڭگەيىنىڭ تومەندىگى مەن قوقىس الاڭدارىنىڭ تولىپ كەتۋى، سونىمەن بىرگە تاريحي لاستانۋ ورىندارى جاتادى. ون قالادا لاستانۋ يندەكسى جوعارى، ياعني 7 مەن 10 كورسەتكىشتەرىنىڭ اراسىندا. ولار – نۇر-سۇلتان، الماتى، شىمكەنت، قاراعاندى، جەزقازعان، اقتوبە، اتىراۋ، وسكەمەن، تەمىرتاۋ، بالقاش قالالارى»، - دەدى ەكولوگيالىق رەتتەۋ جانە باقىلاۋ كوميتەتىنىڭ توراعاسى زۇلفۇحار جولداسوۆ.

جول كارتالارى تولىق جۇزەگە اسسا اتالعان قالالارداعى لاستانۋ يندەكسى ورتاشا دەڭگەيگە تومەندەيدى. مىسالى، زۇلفۇحار جولداسوۆ الماتى قالاسىنىڭ ەكولوگياسىن جاقسارتۋ ءۇشىن 20 ءىس-شارا قاراستىرىلعانىن مالىمدەدى.

«نەگىزگىلەرى – جەس-1 مەن جەس-3-ءتى جانە جەكە سەكتورلاردى گازعا كوشىرۋ، قوعامدىق كولىكتەرگە بىرتىندەپ ديزەل وتىنىمىن جۇرۋگە تىيىم سالۋ، جاسىل جەلەكتەر اۋماعىن 1427-دەن 1928 گەكتارعا دەيىن جەتكىزۋ جانە جەل رەجيمىن زەرتتەپ، سونىڭ ناتيجەسى بويىنشا قالانىڭ ارحيتەكتۋرالىق كەلبەتى ەرەجەسىن وزگەرتۋ، قۇرىلىستاردىڭ بوس جوسپارىنا تۇزەتۋلەر ەنگىزۋ جۇمىستارى. وسى شارالاردىڭ ناتيجەسىندە قالدىقتار كولەمى 144 مىڭ توننادان 79 مىڭ تونناعا نەمەسە 44%-عا دەيىن ازايادى. سوندا لاستانۋ يندەكسى جوعارى 8 كورسەتكىشىنەن 6-عا تۇسەدى»، - دەدى ز.جولداسوۆ.

جول كارتالارىنداعى ءىس-شارالار 2024 جىلعا قاراي اقتوبە مەن اتىراۋ وبلىستارىنداعى اتموسفەرالىق اۋانىڭ لاستانۋ يندەكسىن جوعارى 7-دەن 5-كە، شىعىس قازاقستان وبلىسىندا 7-دەن 6-عا، قاراعاندى وبلىسىندا 9-دان 6-عا تۇسىرەدى.

«جول كارتالارى قالدىقتاردى قايتا وڭدەۋ دەڭگەيىن اعىمداعى 15%-دان 30%-عا دەيىن جەتكىزۋگە، 24 جاڭا پوليگوندار سالۋعا جانە تولىپ كەتكەن بەس 5 پوليگوندى قالپىنا كەلتىرۋگە جانە جويۋعا، ەجەلدەن لاستانعان جەرلەردى قالپىنا كەلتىرۋگە جانە جويۋعا، 7 جاڭا كارىزدىك تازارتۋ كەشەندەرىن سالۋعا جانە 12 كارىزدىك تازارتۋ كەشەندەرىن قايتا جاڭعىرتۋعا، ەلدى مەكەندەردە 15 ملن. جانە ورمان القاپتارىندا 2 ملرد. اعاش وتىرعىزۋعا مۇمكىندىك بەرەدى»، - دەدى زۇلفۇحار جولداسوۆ.

تىكەلەي ەفيردە ءار ءوڭىردىڭ جول كارتاسى جەكە-جەكە تالقىلانىپ، بارلىق وڭىرلىك دەپارتامەنت باسشىلارى قورشاعان ورتا جاعدايىن جاقسارتۋ جونىندەگى جوسپارلارىن تانىستىردى. زۇلفۇحار جولداسوۆ قوعام وكىلدەرىنىڭ - ەكوبەلسەندىلەرىڭ قاتىسۋىمەن جول كارتالارىنىڭ ورىندالۋىن باقىلايتىن ەكولوگيالىق كەڭەس قۇرۋعا، ءىس-شارالاردى ءوز مەرزىمىندە جۇزەگە اسىرۋعا تاپسىرما بەردى.

سوڭعى جاڭالىقتار

الەم كۋبوگى وتەدى

سپورت • كەشە

ۇقساس جاڭالىقتار