ىشكى ىستەر ءمينيسترى پاترۋلدىك پوليتسيا پولكى قىزمەتىنىڭ ينسپەكتورلارى بەيبىت بايسەركينگە, دارىن سوۆەتكە جانە پوليتسەي-كينولوگ ايبات اكىمجانوۆقا جەدەل جانە ۇيلەسىمدى ءىس-ارەكەتتەرى ءۇشىن جەكە العىسىن ءبىلدىرىپ, پوليتسەيلەردى ءىىم-ءنىڭ “قۇقىق ءتارتىبىن قامتاماسىز ەتۋگە قوسقان ۇلەسى ۇشىن” مەدالىمەن ماراپاتتادى.
– كۇن سايىن بۇكىل ەل بويىنشا مىڭداعان پوليتسيا قىزمەتكەرلەرى ازاماتتاردىڭ قاۋىپسىزدىگى مەن تىنىشتىعىن قامتاماسىز ەتۋ, ولاردى قىلمىستىق قول سۇعۋشىلىقتان قورعاۋ ءۇشىن قىزمەت اتقارادى. پوليتسيا قاتارىنا كىرگەندەردىڭ بارلىعى ءبىزدىڭ ماماندىعىمىز جانقيارلىقتى, باتىلدىقتى جانە قيىن ومىرلىك جاعدايعا تاپ بولعان ادامدارعا كومەكتەسۋگە دايىن بولۋدى تالاپ ەتەتىنىن تۇسىنەدى. سول ءۇشىن ومىرلەرىن تاۋەكەلگە تىگۋدەن دە باس تارتپايدى. مەن تەك اتاق-داڭق ءۇشىن ەمەس, جۇرەگىنىڭ قالاۋى بويىنشا ەرلىك جاساعان ءاربىر ىشكى ىستەر ورگاندارىنىڭ قىزمەتكەرىن ماقتان تۇتامىن, – دەپ اتاپ ءوتتى ماراپاتتاۋ ءراسىمى كەزىندە ءىىم باسشىسى ەرلان تۇرعىمباەۆ.
ەستەرىڭىزگە سالا كەتەيىك, اعىمداعى جىلدىڭ 18 قاراشاسىندا قاراعاندى قالاسىنىڭ تۇرعىنى 8-قاباتتان سەكىرۋگە تىرىسقان بولاتىن. ونى وقيعا ورنىنا كەلگەن قاراعاندى قالاسىنىڭ پاترۋلدىك پوليتسيا پولكىنىڭ قىزمەتكەرلەرى قۇتقاردى. قىز اۋىر پسيحولوگيالىق كۇيدە بولدى, كەز-كەلگەن ۋاقىتتا جوسپاردى جۇزەگە اسىرۋعا دايىن ەدى. قابىلدانعان شارالاردىڭ ارقاسىندا پوليتسەيلەر وزىنە-ءوزى قول جۇمساۋ ارەكەتىنە جول بەرمەي, ودان ءارى كومەك كورسەتۋ ءۇشىن قىزدى مەديتسينا قىزمەتكەرلەرىنە تاپسىردى.
