قوعام • 24 قاراشا، 2020

تۇڭعىش پرەزيدەنت كۇنىنە ارنالعان بايقاۋدىڭ جەڭىمپازدارى ماراپاتتالدى

33 رەت كورسەتىلدى

الماتىدا تۇڭعىش پرەزيدەنت  كۇنىنە ارنالعان "مەن جاستارعا سەنەمىن!" VIII رەسپۋبليكالىق جاستار فورۋمىنىڭ جەڭىمپازدارىن ماراپاتتاۋ ءراسىمى ءوتتى. بيىلعى جىلى يننوۆاتسيا جانە شىعارماشىلىق، جاسامپازدىق پريزماسى ارقىلى ءپاتريوتيزمدى دامىتۋعا باعىتتالعان بايقاۋ ونلاين فورماتتا ۇيىمداستىرىلعان بولاتىن، دەپ حابارلايدى Egemen.kz.

ءال-فارابي اتىنداعى قازاق ۇلتتىق ۋنيۆەرسيتەتى رەسپۋبليكالىق جاستار فورۋمىن   تۇڭعىش پرەزيدەنت كۇنىنە ارناپ 2013 جىلدان بەرى وتكىزىپ كەلەدى. بيىل شارا ءساۋىر ايىنان باستاۋ الىپ الەمدىك پاندەمياعا بايلانىستى ونىڭ بارلىق كەزەڭدەرى ونلاين رەجىمدە ءوتتى. ءداستۇرلى فورۋمعا قاتىسۋشىلار بيىل "مەن ءوز ەلىمنىڭ وركەندەۋى ءۇشىن نە ىستەي الامىن" تاقىرىبىندا ۇزدىك ەسسە، "ەلىمىزدىڭ يننوۆاتسيالىق دامۋىنا قوسقان ناقتى ۇلەسىم" اتتى ۇزدىك يننوۆاتسيالىق جوبا، "مەن جاستارعا سەنەمىن!" ازاماتتىق-پاتريوتتىق باعىتتاعى پوەزيالىق شىعارما جانە "ماڭگىلىك ەل مۇراتىم!" اۆتورلىق پاتريوتتىق اندەر، "Sanaly urpaq" پاراساتتىلىق پرينتسيپتەرىن ناسيحاتتايتىن ۇزدىك جوبا اتالىمدارى بويىنشا باق سىنادى.

ەل ستۋدەنتتەرى اسىعا كۇتەتىن فورۋم  نوميناتسيالارىنىڭ ءتىزىمى جىل سايىن جاڭارىپ كەلەدى. ءابۋ ناسىر ءال-ءفارابيدىڭ 1150 جىلدىعى مەن ەرىكتىلەر جىلىندا بايقاۋدى  «Qaiyrymdy qoǵam» ستۋدەنتتىك  جوباسى تولىقتىرا ءتۇستى. سونىمەن قاتار، فورۋمنىڭ مەن_jastarga_senemin_kaznu ينستاگرام-اككاۋنتىنىڭ وقىرماندارى مەن كورەرمەندەر انىقتايتىن «كورەرمەندەر كوزايىمى سىيلىعى» نوميناتسياسى تاعايىندالدى. فورۋمعا قاتىسۋ ءۇشىن ەلىمىزدىڭ بارلىق ايماقتارىنان بەس مىڭعا جۋىق ستۋدەنت تىركەلگەن. شىعارماشىلىق جوبالار مەن بەينە پرەزەنتاتسيالاردى بەدەلدى ساراپشىلار – قوعام قايراتكەرلەرى، بيزنەس وكىلدەرى، مەملەكەتتىك ورگاندار، مادەنيەت جانە ونەر قايراتكەرلەرى مەن عالىمداردان جينالعان تاۋەلسىز قازىلار القاسى باعالادى. ناتيجەسىندە 300 ۇزدىك جوبا سوڭعى تۋردىڭ فينالىنا ءوتتى. قازۇۋ رەكتورى  عالىم مۇتانوۆ فورۋمنىڭ فيناليستەرىن قۇتتىقتاپ، جاس زياتكەرلەر تاۋەلسىز قازاقستاننىڭ بولاشاعى ەكەنىن اتاپ ءوتتى.      

– ناق وسى جاس ۇرپاقتىڭ الدىندا جاسامپاز ىستەر ەستافەتاسىن جالعاستىرۋ جانە ەلدىڭ وركەندەۋىن قامتاماسىز ەتۋ مىندەتى تۇر. مۇنداي ميسسيانى تەك پاتريوتتى، دەنى ساۋ جانە ادامگەرشىلىك تۇرعىدا باسەكەگە قابىلەتتى جانە الەۋمەتتىك جاۋاپتى جاستار عانا جۇزەگە اسىرا الادى. سوندىقتان ءاربىرىڭىز ەڭ الدىمەن، ءوز وتباسىڭىزدىڭ جانە ەڭ باستىسى، ءوز وتانىڭىزدىڭ الدىنداعى ۇلكەن جاۋاپكەرشىلىكتى دۇرىس ۇعىنىپ، ءتۇسىنىپ، سەزىنۋلەرىڭىز كەرەك! فورۋم سىزدەر ءۇشىن جاڭا جەتىستىكتەرگە باستاۋ بولادى دەپ ۇمىتتەنەمىن، – دەدى اكادەميك ع.مۇتانوۆ.       

بايقاۋدا دارا شىققان دارىندى شاكىرتتەر باعالى سىيلىقتارمەن ماراپاتتالادى. سونداي-اق جۇزدەن جۇيرىك دەپ تانىلعان جەڭىمپازدار قازۇۋ-دا ءبىر جىل تەگىن وقۋ گرانتىنا يە بولدى. ۇزدىك ستۋدەنتتىك يننوۆاتسيالىق جوبا بايقاۋىندا ە.بوكەتوۆ اتىنداعى قارمۋ-دەن كەلگەن پاۆەل يۆاچەۆ جەڭىسكە جەتتى. قازىلار القاسى ش.ءۋاليحانوۆ اتىنداعى كوكشەتاۋ ۋنيۆەرسيتەتىنەن كەلىپ باق سىناعان قۋاندىق سەرىكوۆتىڭ جۇمىسىن ۇزدىك ەسسە دەپ تانىدى، ال پوەتيكالىق شىعارمالار بويىنشا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ستۋدەنتى نۇرجول جاقسىلىقتىڭ تۋىندىسى سۋىرىلىپ العا شىقتى. ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ وكىلى نيكولاي ياروشەنكو اۆتورلىق پاتريوتتىق ءان بايقاۋىندا كوش باستاسا، س. امانجولوۆ اتىنداعى شقمۋ-دىڭ ستۋدەنتى ديدار جارقىن «Sanaly urpaq» پاراساتتىلىق قاعيداتتارىن ىلگەرىلەتۋ جوباسىمەن ۇزدىك دەپ تانىلدى. «Qaiyrymdy qoǵam» ستۋدەنتتىك قايىرىمدىلىق جوبالار بايقاۋىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتى  ديليارا نادىرحانوۆا جەڭىسكە جەتتى. تالانتتى جاس كومپوزيتور راحات-بي ابدىساعين ۇلى ويشىل ءال-ءفارابيدىڭ مەرەيتويىنا ارناپ فورتەپيانو مەن سيمفونيالىق وركەسترگە جازعان «Qubylys» اتتى سيمفونيالىق پوەماسى ءۇشىن فورۋمنىڭ ارنايى ديپلومىمەن ماراپاتتالدى.   

رەسپۋبليكالىق فورۋمدى ۇيىمداستىرۋشى – ءال-فارابي اتىنداعى قازۇۋ نوميناتسيا لاۋرەاتتارى مەن بايقاۋلاردىڭ العاشقى ءۇش ورىن يەگەرلەرىنە كەلەسى جىلى ۋنيۆەرسيتەتتە وتەتىن جازعى كوشباسشىلىق مەكتەبىنە قاتىسۋعا مۇمكىندىك بەردى. «مەن جاستارعا سەنەمىن!» VIII رەسپۋبليكالىق جاستار فورۋمىنىڭ جەڭىمپازدارىن سالتاناتتى ماراپاتتاۋ ءراسىمىنىڭ ترانسلياتسياسىن AlFarabiTV YouTube ارناسىنان كورۋگە بولادى.

سوڭعى جاڭالىقتار

ىندەت جۇقتىرعاندار سانى كوبەيدى

كوروناۆيرۋس • بۇگىن، 13:58

سەمەيگە جاڭا اكىم تاعايىندالدى

تاعايىنداۋ • بۇگىن، 11:57

الماتىدا 10 كىتاپحانا جاڭارتىلدى

ايماقتار • بۇگىن، 10:47

قازاقستان «قىزىل» ايماققا كىردى

قازاقستان • بۇگىن، 09:30

ۇقساس جاڭالىقتار