كەشە اتىراۋ قالاسىندا قاراشانىڭ 22-سىنەن بەرى 187 بىلعارى قولعاپ شەبەرىنىڭ قاتىسۋىمەن ءوتىپ جاتقان بوكستان قازاقستان چەمپيوناتى ءوزىنىڭ مارەسىنە جەتتى. ونىڭ قورىتىندىسى بويىنشا اقمولا وبلىسىنىڭ قۇراماسى رەسمي ەمەس ەسەپتە كوماندالىق ءبىرىنشى ورىنعا يە بولدى.
كەشە اتىراۋ قالاسىندا قاراشانىڭ 22-سىنەن بەرى 187 بىلعارى قولعاپ شەبەرىنىڭ قاتىسۋىمەن ءوتىپ جاتقان بوكستان قازاقستان چەمپيوناتى ءوزىنىڭ مارەسىنە جەتتى. ونىڭ قورىتىندىسى بويىنشا اقمولا وبلىسىنىڭ قۇراماسى رەسمي ەمەس ەسەپتە كوماندالىق ءبىرىنشى ورىنعا يە بولدى.
بىرىنشىلىكتىڭ اقتىق ايقاسىنا 10 وبلىستىڭ بوكسشىلارى قاتىستى. ولاردىڭ اراسىندا وڭتۇستىك قازاقستان وبلىسىنىڭ ءباسى باسىمداۋ بولدى. بىراق فينالدا شايقاسقان 5 بوكسشىنىڭ ەكەۋى عانا جەڭىسكە جەتە الدى. مۇنىڭ ەسەسىنە, اقمولا وبلىسىنىڭ التىن مەدال ءۇشىن ايقاسقان 3 بوكسشىسى دا سول ماقساتتارىن ورىنداي ءبىلدى. اينالىپ كەلگەندە, بۇل كورسەتكىش ارا سالماقتى وزگەرتىپ, كوكشەلىك جىگىتتەردىڭ باس بايگەنى ج ۇلىپ اكەتۋىنە مۇمكىندىك اپەردى. سونداي-اق, فينالعا 3 سپورتشىسىن سالعان استانا قۇراماسى ناتيجەسىندە بىردە-ءبىر التىن مەدال الا المادى. وسىنىڭ ءوزى ونىڭ الدىنا الماتى قالاسى مەن جامبىل وبلىسىنىڭ جاساقتارى ءتۇسىپ كەتۋىنە جول اشىپ بەردى.
ايتا كەتۋ كەرەك, تاياۋدا الماتىدا وتكەن الەم چەمپيوناتىندا جۇلدەلى ورىن العان قازاقستاندىق بوكسشىلاردىڭ بىردە-ءبىرى بۇل بىرىنشىلىككە قاتىسقان جوق. ونىڭ ەسەسىنە, ازيادا توپ جارعان تەمىرتاس ءجۇسىپوۆ پەن انتون پينچۋك كاسپي جاعاسىنداعى قالادا وتكەن باسەكەنىڭ كورىگىن قىزدىرۋعا اتسالىستى. ال چەمپيوناتتا جاستار كوبىرەك بوي كورسەتتى. بۇل ءۇشىن بيىلعى اقپان ايىندا ورال قالاسىندا وتكەن ەلىمىزدىڭ جاستار اراسىنداعى چەمپيوناتىنا قاتىسقان 60-قا جۋىق جاس بوكسشىنىڭ وسىندا كەلگەنىن ايتساق تا جەتكىلىكتى. بۇلاردىڭ اراسىندا سول بىرىنشىلىكتىڭ اقتىق سىنىندا ونەر كورسەتكەن 11 بالعىن اتلەت بولدى. سولاردىڭ اراسىنان تەك تارازدىق ايتجان شىلەەۆ قانا قولا مەدالگە قول جەتكىزە الدى.
چەمپيونات بارىسىندا سەنساتسيالار دا از بولعان جوق. سونىڭ ورايىندا وزىنەن بۇرىن دەڭگەيى تومەن سانالىپ كەلگەن قارسىلاستارىنا جول بەرىپ العان عاني جايلاۋوۆ, مانات ومىرزاقوۆ, المات سەرىموۆ, ءىلياس سۇلەيمەنوۆ, رۋستام سۆاەۆ سىندى بوكسشىلار بولدى.
سونىمەن, قازاقستاننىڭ 2013 جىلعى چەمپيونى اتاعىنا مىنا بوكسشىلار قول جەتكىزدى: 49 كگ – تەمىرتاس ءجۇسىپوۆ (اقمولا), 52 كگ – ادىلەت قۇرمەتوۆ (قاراعاندى), 56 كگ – ەرجان ورداباەۆ (اتىراۋ), 60 كگ – زاكىر سافيۋللين (وڭتۇستىك قازاقستان), 64 كگ – الماسبەك الىبەكوۆ (وڭتۇستىك قازاقستان), 69 كگ – ساعادات راحمانقۇلوۆ (جامبىل), 75 كگ – ساپارباي ايداروۆ (الماتى), 81 كگ – نۇرداۋلەت جارمانوۆ (اقمولا), 91 كگ –انتون پينچۋك (قوستاناي), +91 كگ – جان كوسوبۋتسكي (اقمولا).
بۇل بوكسشىلار ەندى قازاقستان قۇراماسى ساپىنا الىنادى.
جولداسبەك شوپەعۇل,
«ەگەمەن قازاقستان».
اتىراۋ.
