ەكولوگيا • 24 قاراشا، 2020

ەكولوگيا ءمينيسترى لاستانعان 10 قالانى ايتتى

36 رەت كورسەتىلدى

بۇگىن ۇكىمەت وتىرىسىندا ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ اۋاسى جوعارى دەڭگەيدە لاستانعان 10 قالانى ايتىپ بەردى، دەپ حابارلايدى Egemen.kz

"2019 جىلدىڭ قورىتىندىسى بويىنشا اتموسفەرالىق اۋانىڭ ەكولوگيالىق مونيتورينگىنە سايكەس 45 ەلدى مەكەننىڭ ىشىندە 10 قالا اتموسفەرالىق اۋانىڭ جوعارى لاستانۋ دەڭگەيىنە جاتادى. ولار: نۇر-سۇلتان، الماتى، قاراعاندى، تەمىرتاۋ، اتىراۋ، اقتوبە، بالقاش، وسكەمەن، جەزقازعان جانە شىمكەنت. سونىمەن قاتار، لاستاۋشى زاتتار شىعارىندىلارىنىڭ ەداۋىر كولەمى پاۆلودار وبلىسىنا تيەسىلى"، دەدى ماعزۇم مىرزاعاليەۆ. 

مينيستر وڭىرلەردەگى ەكولوگيالىق احۋالدى جاقسارتۋ شارالارى جونىندەگى ءسوزىن الماتى قالاسىنان باستادى. 

الماتى قالاسىندا اۋانىڭ لاستانۋى جەو-2 مەن جەو-3 جىلۋ كوزدەرىنىڭ، اۆتوكولىكتەردىڭ جانە قالاعا ىرگەلەس الماتى وبلىسىنىڭ گازداندىرىلماعان جەكە ۇيلەرىنىڭ شىعارىندىلارىمەن بايلانىستى.

"الماتى قالاسىنىڭ ەكولوگيالىق جاعدايىن جاقسارتۋ ءۇشىن دايىندالعان جول كارتاسىندا 20 ءىس-شارا قاراستىرىلعان. ونىڭ ىشىندە نەگىزگىسى - جەو-2 مەن جەو-3 گازعا اۋىستىرۋ، قالاعا ىرگەلەس جاتقان جەكە مەنشىك ۇيلەردى گازداندىرۋ، كوممۋنالدىق جانە قوعامدىق اۆتوكولىكتەرىن تابيعي گازعا كوشىرۋ، ديزەل وتىنىمەن جۇرەتىن قوعامدىق كولىككە كەزەڭ-كەزەڭمەن تىيىم سالۋ، ترانزيتتىك كولىكتەردىڭ كىرۋىنە/جۇرۋىنە شەكتەۋ قويۋ جاعىن قاراستىرۋ جانە كوگالداندىرۋ. سونىمەن قاتار جەل رەجىمىنە زەرتتەۋ جۇرگىزۋ جانە سونى ەسكەرە وتىرىپ، ساۋلەت كەلبەتى ەرەجەلەرىنە وزگەرىستەر ەنگىزۋ جانە قۇرىلىستىڭ باس جوسپارىن تۇزەتۋ بولىپ وتىر"، دەدى ول.

سوڭعى جاڭالىقتار

ۇقساس جاڭالىقتار