ەكولوگيا • 24 قاراشا، 2020

اسقار مامين: ەلدەگى ەكولوگيالىق احۋالدى جاقسارتۋ - ۇكىمەتتىڭ باسىم مىندەتى

9 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا وڭىرلەردىڭ ەكولوگيالىق پروبلەمالارىن كەشەندى شەشۋ جونىندەگى جول كارتالارىن ىسكە اسىرۋ بارىسى قارالدى، دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.

ەكولوگيا، گەولوگيا جانە تابيعي رەسۋرستار ءمينيسترى م. مىرزاعاليەۆ، شىعىس قازاقستان وبلىسىنىڭ اكىمى د. احمەتوۆ، اقتوبە وبلىسىنىڭ اكىمى و. ورازالين، پاۆلودار وبلىسىنىڭ اكىمى ءا. سقاقوۆ، اتىراۋ وبلىسىنىڭ اكىمى م. دوسمۇحامبەتوۆ، الماتى قالاسىنىڭ اكىمى ب. ساعىنتاەۆ بايانداما جاسادى.

بيىل قازاقستاندا "لاستاۋشى تولەيدى – تۇزەيدى" قاعيداتى بەكىتىلەتىن جاڭا ەكولوگيالىق كودەكستى قابىلداۋ كوزدەلگەن. بۇل جاڭا رەتتەۋ جۇيەسى اياسىندا وندىرىسكە جاڭا ەكولوگيالىق قاۋىپسىز تەحنولوگيالاردى ەنگىزۋگە جول اشادى. جۇرتشىلىقپەن ەكولوگيالىق پروبلەمالاردى تالقىلاۋ قورىتىندىسى بويىنشا ەلىمىزدىڭ بارلىق وڭىرىندە ەكولوگيالىق جاعدايدى جاقسارتۋ جونىندەگى وڭىرلىك جول كارتالارى بەكىتىلدى. ولاردى ىسكە اسىرۋ، وزىق تەحنولوگيالاردى ەنگىزۋ، جاڭا ەكولوگيالىق كودەكستىڭ نورمالارىن ورىنداۋ 2024 جىلعا قاراي اتموسفەرانىڭ لاستانۋ يندەكسىن تومەندەتۋگە جانە جالپى العاندا ەلىمىزدەگى ەكولوگيالىق جاعدايدى جاقسارتۋعا مۇمكىندىك بەرەدى.

2025 جىلعا دەيىن قر-داعى ورمان اۋماعىن 500 مىڭ گەكتارعا ۇلعايتىپ، 2 ملرد استام اعاش وتىرعىزۋ جوسپارلانعان. نۇر-سۇلتان، الماتى، شىمكەنت، اتىراۋ، اقتوبە جانە تاراز قالالارىندا قوقىستى قايتا وڭدەۋ زاۋىتتارىنىڭ 6 پيلوتتىق جوباسى ىسكە قوسىلادى، بۇل كەمىندە 200 ملرد تەڭگە جەكە ينۆەستيتسيا تارتۋعا جانە تۇرمىستىق قاتتى قالدىقتاردى قايتا وڭدەۋ ۇلەسىن 30%-عا دەيىن جەتكىزۋگە جاعداي جاسايدى.

"ەلدەگى ەكولوگيالىق جاعدايدى جاقسارتۋ – مەملەكەت باسشىسى قاسىم-جومارت كەمەل ۇلى توقاەۆتىڭ الدىمىزعا قويعان باسىم مىندەتتەرىنىڭ ءبىرى"، — دەدى ا. مامين.

ۇكىمەت باسشىسى ەكولوگيا مينيسترلىگىنە اكىمدىكتەرمەن بىرلەسىپ، جۇرتشىلىقپەن تۇراقتى كەزدەسۋلەر وتكىزە وتىرىپ، وڭىرلەردىڭ ەكولوگيالىق پروبلەمالارىن كەشەندى شەشۋ جونىندەگى جول كارتالارىن تولىق ءارى ۋاقىتىلى ىسكە اسىرۋدى تاپسىردى.

پرەمەر-مينيستر بارلىق رۇقسات ەتىلمەگەن قوقىس ۇيىندىلەرىن جويۋ، سونداي-اق پوليگونداردىڭ تاۋسىلعان رەسۋرستارىن جابۋ جانە قالپىنا كەلتىرۋ بويىنشا پارمەندى شارالار قابىلداۋ قاجەت ەكەنىن اتاپ ءوتتى. بۇگىندە وڭىرلەردە 3،5 مىڭ قاتتى تۇرمىستىق قالدىقتاردى ورنالاستىرۋ وبەكتىسى جۇمىس ىستەيدى، ولاردىڭ تەك 620-سى (17،6%-ى) ولارعا قويىلاتىن تالاپتارعا ساي كەلەدى.

ەكولوگيا مينيسترلىگىنە مۇددەلى مەملەكەتتىك ورگاندارمەن جانە قوعامدىق ۇيىمدارمەن بىرلەسىپ، قازاقستاننىڭ تومەن كومىرتەكتى دامۋىنىڭ 2050 جىلعا دەيىنگى تۇجىرىمداماسىن ازىرلەۋدى تەزدەتۋ جانە ونىڭ جوباسىن كەلەسى جىلدىڭ باسىندا ۇكىمەتكە ەنگىزۋ تاپسىرىلدى.

سوڭعى جاڭالىقتار

ۇقساس جاڭالىقتار