ۇكىمەت • 24 قاراشا، 2020

ۇكىمەتتە ەلدى مەكەندەردى گازداندىرۋ ماسەلەسى قارالدى

27 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلدى مەكەندەردى گازداندىرۋ ماسەلەلەرى قارالدى، دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.

ەنەرگەتيكا ءمينيسترى ن. نوعاەۆ، تۇركىستان وبلىسىنىڭ اكىمى ءو. شوكەەۆ، جامبىل وبلىسىنىڭ اكىمى ب. ساپارباەۆ، قاراعاندى وبلىسىنىڭ اكىمى ج. قاسىمبەك، نۇر-سۇلتان قالاسىنىڭ اكىمى ا. كولگىنوۆ بايانداما جاسادى.

قازاقستاندا الەمدىك ەنەرگەتيكا نارىعىنداعى سەكىلدى ەنەرگيا تاسىمالداۋشىلاردىڭ باسقا تۇرلەرىن ءوندىرۋ مەن تۇتىنۋعا قاراعاندا گاز ونەركاسىبىنىڭ قارقىندى دامىپ كەلە جاتقانى بايقالادى. بيىل قر-دا گاز تۇتىنۋ 16،5 ملرد م³ دەيىن وسەدى دەپ كۇتىلۋدە (2019 جىلى تۇتىنۋ كولەمى 16،3 ملرد م³ قۇرادى).

ەڭ الدىمەن، بۇل ەلەكتر ەنەرگياسىن ءوندىرۋ ءۇشىن 50% گاز، كوممۋنالدىق-تۇرمىستىق سەكتورعا 36%، ونەركاسىپكە 14% پايدالاناتىن تۇتىنۋشىلار سانىنىڭ ارتۋىنا بايلانىستى. وسى جىلدىڭ قورىتىندىسى بويىنشا قازاقستان حالقىن گازداندىرۋ كورسەتكىشى 53% دەڭگەيىندە جوسپارلانعان، 9،8 ملن ادام تابيعي گازعا قول جەتكىزە الاتىن بولادى.

2025 جىلى گازداندىرۋ دەڭگەيى 2120 ەلدى مەكەندى نەمەسە 11،7 ملن تۇرعىندى قوسۋمەن 60%-عا جەتەدى. بۇعان "سارىارقا" جوباسىنىڭ 2 جانە 3 كەزەڭدەرىن ىسكە اسىرۋ، شىعىس قازاقستاندى گازداندىرۋ، سونداي-اق وڭىرلىك جەلىلەردى كەڭەيتۋ جانە رەكونسترۋكتسيالاۋ ىقپال ەتەتىن بولادى.

ۇكىمەت باسشىسى ەنەرگەتيكا مينيسترلىگىنە مۇددەلى مەملەكەتتىك ورگاندارمەن جانە ۇيىمدارمەن بىرلەسىپ، 2021 جىلعى 1 ساۋىرگە دەيىن قازاقستاندى گازداندىرۋدىڭ باس سحەماسىنىڭ وزەكتەندىرىلگەن جوباسىن ازىرلەۋدى تاپسىردى.

سولتۇستىك وڭىرلەردى گازداندىرۋ ماقساتىندا پرەمەر-مينيستر 2021 جىلعى 1 ناۋرىزعا دەيىن "سارىارقا" گاز قۇبىرى جوباسىنىڭ 2 جانە 3 كەزەڭدەرىن ىسكە اسىرۋ بويىنشا تەحنيكالىق-ەكونوميكالىق نەگىزدەمەلەردى جاڭارتىپ، بارلىق ساراپتامالاردى الۋدى تاپسىردى.

سونداي-اق 2021 جىلعى 1 ساۋىرگە دەيىن شىعىس قازاقستان وبلىسىن گازداندىرۋ تۇجىرىمداماسىن دايىنداۋ قاجەتتىلىگى اتاپ ءوتىلدى. تۇركىستان، اقتوبە، جامبىل، ماڭعىستاۋ، باتىس قازاقستان، الماتى وبلىستارى مەن الماتى قالاسىنىڭ اكىمدىكتەرىنە گازبەن جابدىقتاۋ وبەكتىلەرىندەگى اقاۋلاردى جويۋ جانە ولاردى كەيىننەن پايدالانۋشى ۇيىمداردىڭ تەڭگەرىمىنە بەرۋ ءۇشىن جەرگىلىكتى بيۋدجەتتەردەن قاجەتتى قاراجاتتى قاراستىرۋ تاپسىرىلدى.

سوڭعى جاڭالىقتار

ۇقساس جاڭالىقتار