– ءموبيلدى بريگادا ماماندارى چەك-پاراقتار ارقىلى قاۋىپتى ىندەت اعىنىنىڭ اۋىرلىعىنا بايلانىستى ناۋقاستى اۋرۋحاناعا جاتقىزۋ تۋرالى شەشىم قابىلداي الادى. مۇنداي شەشىمگە دەنە قىزۋىنىڭ كوتەرىلۋى, ەنتىگۋ سەكىلدى بەلگىلەر بولعاندا عانا ەمەس, ناۋقاستاعى ىلەسپە اۋرۋلاردىڭ جانە ادام ومىرىنە قاۋىپ توندىرەتىن فاكتورلاردىڭ بىرقاتار پارامەترى ىقپال ەتەدى, – دەيدى نۇرفيا قيزاتوۆا.
دارىگەردىڭ ايتۋىنشا, قاۋىپتى ىندەت جەدەل رەسپيراتورلى ۆيرۋستىق ينفەكتسياسىمەن قاباتتاسىپ كەلۋى مۇمكىن. سول سەبەپتەن COVID-19 ينفەكتسياسىنىڭ سيمپتومسىز تۇرىنە شالدىققان ناۋقاس مەديتسينا مامانىنىڭ باقىلاۋىنا الىنۋ ءتيىس. وسى ورايدا مەديتسينا مامانىنىڭ كومەگىمەن ناۋقاستىڭ ءوزى تولتىراتىن چەك-پاراقتىڭ ماڭىزى زور.
ال №2 وبلىستىق ينفەكتسيالىق اۋرۋحاناسىنىڭ ديرەكتورى ماعجان سيدجانوۆتىڭ پىكىرىنشە, تۇرعىندار قاۋىپتى ىندەتتىڭ الدىن الۋ شارالارىنان ۇدايى حاباردار بولۋى كەرەك. ىندەت جۇقتىرماۋدىڭ ەڭ ءتيىمدى جولى – ادام كوپ جينالاتىن جەرلەرگە بارماۋ.
– قازىر مەكتەپتەردەگى كەزەكشى سىنىپتاردا ساباق باستالدى. اتا-انالاردان بالالارىن قورعاۋدى سۇرايمىز. بالالاردىڭ جاي-كۇيىن باقىلاپ وتىرعان ءجون. دەنە قىزۋى كوتەرىلگەن بولسا, مەكتەپكە جىبەرمەۋ قاجەت. ەپيدەميا كەزەڭىندە وزگە دە ينفەكتسيالىق اۋرۋلاردىڭ الدىن الۋ ماقساتىندا جوسپارلى ەكپەلەردى الۋ ءۇشىن ەمحاناعا ۋاقتىلى بارعان دۇرىس, – دەيدى م.سيدجانوۆ.
اتىراۋ وبلىسى
