ايماقتار • 24 قاراشا، 2020

جاتاقحانالاردى جەكە ينۆەستورلار سالىپ جاتىر

6 رەت كورسەتىلدى

بۇگىنگىنىڭ وزەكتى ماسەلەلەرىنىڭ ءبىرى – جوعارى وقۋ ورىندارى مەن كوللەدج ستۋدەنتتەرىن ءتيىستى جاتاقحانامەن قامتۋ. بۇل ماسەلە بۇدان بىرەر جىل بۇرىن ەلباسى نۇرسۇلتان نازارباەۆ بەلگىلەگەن «بەس الەۋمەتتىك باستامانىڭ» بەل ورتاسىنان ورىن العانى ءمالىم. وسى مىندەتتى جۇزەگە اسىرۋ ءۇشىن اقجايىق ايماعىندا جاتاقحانالار سالۋعا ارنالعان جوبالار جاساقتالىپ، ونى نەگىزىنەن جەكە ينۆەستورلاردىڭ قاراجاتى ەسەبىنەن تۇرعىزۋ كوزدەلگەن.

بۇل باعىتتا وڭىردەگى م.وتە­مىسوۆ اتىنداعى باتىس قازاق­ستان مەملەكەتتىك ۋنيۆەرسيتەتى مەن جاڭگىر حان اتىنداعى اگرارلىق-تەحنيكالىق ۋنيۆەرسيتەتىندە ستۋدەنتتەردى جاتاقحانامەن قامتۋ ءىسى ءبىرشاما شەشىمىن تاپقانى­­مەن، وبلىس ورتالىعىنداعى كول­لەدجدەردە اتالعان ماسەلە ءالى دە وتكىر. سوندىقتان قازىرگى كۇنى مۇنداعى مۇددەلى ۇيىمدار ەڭ ءبىرىنشى كەزەكتە وسى قاتارعا كىرەتىن بولاشاق ماماندار ءۇشىن جاتاقحانالار جوباسىن جۇزەگە اسىرۋعا باسىمدىق بەرۋدە.

جاڭا جاتاقحانالار قۇرىلىسى ءۇشىن ەڭ قاجەتتى فاكتوردىڭ ءبىرى قارجىلاندىرۋ ەكەنى انىق. ونىڭ ءبارىن بيۋدجەت قاراجاتى ەسەبىنەن وتەۋ ءتيىمدى بولا بەرمەيتىنى بە­سە­نەدەن بەلگىلى. بۇل ءۇشىن جو­عا­رىدا ايتىلعانداي، جەكە ين­ۆەس­­تورلار قاراجاتىن تارتۋ باس­تى با­سىمدىققا يە ەكەنىن تاعى ءبىر مارتە ايتا كەتكەننىڭ ارتىقتىعى جوق. بۇعان قوسا جاتاقحانامەن قامتۋ ىسىندە جايىق جاعاسىندا وزگە دە ۇتىمدى تاسىلدەر مەن جولدار جۇزەگە اسا باستاعان. ايتالىق، باتىس قازاقستان وبلىستىق ءبىلىم باسقارماسىنىڭ باسشىسى اي­كۇل مىڭباەۆانىڭ ايتۋىنشا، باتىس قازاقستان يندۋستريالىق كوللەدجى ستۋدەنتتەرى ءۇشىن «ورال ترانسفورماتور زاۋىتى» جشس سالىپ جاتقان 300 ورىندىق جاتاق­حانادان ورىن بەرىلگەن. تۇتاس­تاي العاندا، قازىرگى كەزدە ورال وڭىرىندە جەكە ينۆەستورلار ەسە­بىنەن جالپى سانى 1 200 ورىن­عا ارنالعان ءتورت جاتاقحانا قۇرى­لىسى جۇرگىزىلۋدە. بۇدان بولەك، بيىلعى 2020 جىلدىڭ قىركۇيەك ايىندا باتىس قازاقستان جوعارى مەديتسينالىق كوللەدجىنىڭ وقۋ­شى-ستۋدەنتتەرى ءۇشىن 144 ورىن­دىق جاتاقحانا پايدالانۋعا بەرىل­گەن. ونى «حايرەكەشەۆا» جەكە كاسىپ­ورنى تۇرعىزعان. اتالعان كوللەدجدە بۇعان قوسا تاعى 300 ورىندىق جاتاقحانا سالۋ جوباسى قاراستىرىلۋدا.

سونداي-اق ورال پوليتەحنيكا كوللەدجى ستۋدەنتتەرىنە 150 ورىندىق جاتاقحانانى «بولا­شاق» جشس تۇرعىزۋدا. اتالعان قۇرىلىستى الداعى 2021 جىلدىڭ قىركۇيەك ايىنا دەيىن اياقتاۋ بەلگىلەنگەن. سونىمەن بىرگە مەديتسينا كوللەدجى ءۇشىن الداعى جىلدىڭ باسىندا 50 ورىندىق جاتاقحانا قۇرىلىسىن كوتەرۋ جوسپارلانعان. ايتا بەرسە مۇن­داي مىسالدار جەتكىلىكتى.

ەندىگى كەزەكتە بۇگىنگى كوتەرىلىپ وتىرعان تاقىرىپقا وراي تاعى ءبىر جايتتى وقىرماندار نازارى­نا سالا كەتكەننىڭ ارتىقشى­لىعى جوق سەكىلدى. ايتالىق، سوناۋ كەڭەستىك كەزەڭدە ستۋدەنتتەر جاتاقحانادا جىل بويى تەگىن تۇرىپ كەلگەنى ءمالىم. بۇل ءۇشىن بىرجولعى جىل­دىق تولەمنىڭ كولەمى كەڭەستىك بەس-ون سومنان اسپاعانىن بىلەمىز. قازىرگى كەزدە دە ستۋدەنتتەر ءۇشىن جاتاقحانا­دا تەگىن تۇرۋ ءتارتىبى ساقتالىپ قالا بەرە مە؟ جوق، ولاي ەمەس، بۇگىن­گى نارىقتىق قارىم-قا­تى­ناس­تار بۇعان ءوز تۇزەتۋىن ەن­گىزە باستاعانى بايقالادى. وسى تۇر­عىدا ورال قالاسىنىڭ اكىمى ابات شىنىبەكوۆتىڭ ايتۋىنشا، جاڭا جاتاقحانالار پايدالانۋعا بەرى­لىپ، ستۋدەنتتەر مۇندا تۇرا باس­تا­عاننان كەيىن ولار ايىنا 10-12 مىڭ تەڭگە توڭىرەگىندە اقى تولەۋى مۇمكىن. بۇل كوممۋنالدىق تولەم­دەردىڭ شىعىنى بولىپ شىعادى. سالىستىرمالى تۇردە العاندا، بۇل باعا جاتاقحانا تۇرعىندارى ءۇشىن وتە ءتيىمدى دەپ ەسەپتەيمىز. ايتالىق، وبلىس ورتالىعىندا پاتەر جالداپ تۇراتىن ستۋدەنتتەر ونىڭ يەلەرىنە ايىنا كەم دەگەندە 50 مىڭ تەڭگەدەن كەم تولەمەيدى. قاراڭىز، ايىرماشىلىق دەڭ­گەيى وتە جوعارى. ارينە، اقىلى جاتاقحانادا تۇرۋ – ستۋدەنتتىڭ ءوز ەركىندەگى ماسەلە. بۇعان ەشكىم ارالاسپايدى.

ءبىزدىڭ ويىمىزشا، قالا باس­شىسى ءسوزىنىڭ قيسىنى بار سەكىل­دى. تومەن مولشەردە بولسا دا ستۋ­دەنتتەر اقى تولەگەن سوڭ جا­تاق­حانا دا بۇگىنگى زاماناۋي تا­لاپتارعا سايكەس بارلىق جاعى­نان جايلى دا سايلى بولۋى كەرەكتىگى ەشقانداي تالاس تۋ­عىز­بايدى. بۇعان قوسا جاتاق­حانا جانىنان سپورت الاڭى مەن اسحانا جاساقتالسا، تىپتەن قۇبا-قۇپ. ماتەريالىمىزدى تۇيىن­دەي كەلە، جەكە كاسىپكەرلەر مەن ينۆەس­­تورلار تۇرعىزعان جاتاق­حانا قۇرى­لىسىنا جۇمسال­عان قا­راجاتتىڭ باسىم بولىگى بيۋد­جەت قاراجاتى ەسەبىنەن وتە­لە­تىنىن ايتا كەتكەندى ءجون كورە­مىز. سايىپ كەلگەندە، بۇل ەكى جاق­قا دا ءتيىمدى ەكەنى انىق. ءارى مۇنىڭ ءوزى مەملەكەت-جەكە­مەن­شىك ارىپتەستىگىنىڭ جارقىن مىسال­دارىنىڭ ءبىرى بولىپ قالا بەرمەك.

 

 

ورال

 

سوڭعى جاڭالىقتار

تۇركىستانعا 3000 جىل

رۋحانيات • بۇگىن، 12:10

2002 ادام كوروناۆيرۋستان ەمدەلىپ شىقتى

كوروناۆيرۋس • بۇگىن، 09:32

سارىالا قازدىڭ قاڭقىلى ەستىلدى

رۋحانيات • بۇگىن، 08:51

قور نارىعى قىمباتتادى

الەم • بۇگىن، 08:33

بابا اماناتىنا ادالدىق

رۋحانيات • بۇگىن، 08:07

بالۋاننىڭ العاشقى التىنى

كۇرەس • بۇگىن، 08:02

پسج ەسە قايتاردى

فۋتبول • بۇگىن، 07:59

جارىستى جەڭىسپەن باستادى

بوكس • بۇگىن، 07:56

جاقاەۆتىڭ تاقياسى

رۋحانيات • بۇگىن، 07:47

شىلىكتى اۋىلىن سۋ باستى

ايماقتار • بۇگىن، 07:44

Ever Given مىسىردا قالدى

الەم • بۇگىن، 07:28

جەر تۋرالى زاڭ سەناتقا جولداندى

پارلامەنت • بۇگىن، 07:22

ۇقساس جاڭالىقتار