ساياسات • 24 قاراشا، 2020

بەس جىلدا اتقارىلعان جۇمىس ايقىندالدى

11 رەت كورسەتىلدى

XX سەزد قارساڭىندا پار­تيانىڭ ورتالىق اپپاراتىندا Nur Otan پارتياسىنىڭ سايا­سي كەڭەسىنىڭ وتىرىسى ءوتتى. قاتىسۋشىلار بەينەكونفەرەنتسيا بايلانىسى ارقىلى ۇيىمداستىرۋ ماسەلەلەرىمەن قاتار، پارتيانىڭ سوڭعى 5 جىل­­دىق قىزمەتىن قورى­تىن­دى­لادى.

پارتيا توراعاسىنىڭ ءبىرىنشى ورىنباسارى باۋىرجان بايبەك Nur Otan-نىڭ بەسجىلدىق جۇمىسىن قورىتىندىلاي كەلە، پارتيانىڭ 234 قوعامدىق قابىلداۋ بولمەسى سايلاۋالدى باعدارلامانى باقىلاۋ مەن «كەرى بايلانىستىڭ» پارمەندى تەتىگى بولعانىن اتاپ ءوتتى. ەلباسى، پارتيا ليدەرى نۇرسۇلتان نازارباەۆتىڭ تاپسىرماسى بويىنشا Nur Otan 2014 جىلى ەلىمىزدە ءبىرىنشى بولىپ «ەلەكتروندى پارتيا» جوباسى اياسىندا قوعامدىق ونلاين-قابىلداۋ بولمەسىن، ۆەب-پورتال اشىپ، مەسسەندجەرلەر مەن الەۋمەتتىك جەلىلەر ارقىلى كوممۋنيكاتسيانىڭ جاڭا ارنالارىن ەنگىزە باستادى.

«5 جىل ىشىندە پارتياعا شامامەن 1،2 ملن ادام جۇگىندى، ونىڭ 30%-ى وتىنىشتەرىن ونلاين جولدادى. وتىنىشتەردىڭ 92%-ى بويىنشا وڭ شەشىم قابىلدانىپ، تەگىن كەڭەس بەرىلىپ، قۇقىقتىق كومەك كورسەتىلدى. نۇروتاندىق دەپۋتاتتار، ورتالىق جانە جەرگىلىكتى اتقارۋشى ورگانداردىڭ باسشىلارى 180 مىڭعا جۋىق قابىلداۋ وتكىزىپ، 340 مىڭنان استام ازاماتتى قابىلدادى. وتىنىشتەردىڭ 72%-ى وڭ شەشىمىن تاپتى، 28%-ى بويىنشا تۇسىندىرمەلەر مەن قاجەتتى كەڭەستەر بەرىلدى»، دەدى باۋىرجان بايبەك.

ونىڭ ايتۋىنشا، پاندەمياعا قارا­ماستان، قوعامدىق قابىلداۋلاردىڭ جۇمىسى ونلاين فورماتتا جالعاسىپ، ەلەكتروندى تۇردە 339 مىڭ ءوتىنىش قابىلدانعان.

«الەمدىك تاجىريبە كورسەتكەندەي، پاندەميا كەزىندە تۇرمىستىق زورلىق-زومبىلىق وسۋدە. قيىن-قىستاۋ جاعدايعا تاپ بولعان وتباسىلارعا، ايەلدەر مەن بالالارعا كەشەندى كومەك كورسەتۋدى ۇيىمداستىرۋ ءۇشىن تاۋلىك بويى جۇمىس ىستەيتىن «111 شۇعىل قىزمەت» بايلانىس ورتالىعى ىسكە قوسىلدى. 2 ايدىڭ ىشىندە 3 مىڭنان استام ءوتىنىش بويىنشا قۇقىقتىق كەڭەستەر بەرىلىپ، پسيحولوگيالىق كومەك كورسەتىلدى. بۇل – ەل پرەزيدەنتى قاسىم-جومارت كەمەل ۇلى توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن جۇيەلى جۇزەگە اسىرۋدىڭ كورىنىسى»، دەدى پارتيا توراعاسىنىڭ ءبىرىنشى ورىنباسارى.

وسى ورايدا، ول ەلباسى، پارتيا توراعاسى نۇرسۇلتان نازارباەۆتىڭ تاپسىرماسىنا سايكەس، Nur Otan پارتياسى ناقتى الەۋمەتتىك توپتاردىڭ ماسەلەلەرىن جوبالىق ءتاسىل نەگىزىندە شەشەتىنىن اتاپ ءوتتى.

ماسەلەن، «ارداگەرلەردى ارداق­تايىق» جوباسىن جۇزەگە اسىرا وتىرىپ، ارداگەرلەر مەن تىل ەڭبەك­كەر­لەرىنىڭ 200 مىڭنان استام الەۋمەتتىك-تۇرمىستىق ماسەلەلەرى شەشىلدى. «با­قىت­تى وتباسى» جوباسى اياسىندا 1300-دەن استام ءبىلىم بەرۋ، دەنساۋ­لىق ساقتاۋ جانە الەۋمەتتىك قورعاۋ مەكەمەلەرىنە مونيتورينگ جۇرگى­زىل­گەن، بالا قۇقىقتارىن قورعاۋ جانە تۇر­مىس­تىق زورلىق-زومبىلىققا قار­سى تۇرۋ تۇرعىسىنان زاڭ جوبالارىنا 45 ۇسىنىس ەنگىزىلدى.

«كەدەرگىسىز كەلەشەك» جوباسىنىڭ ارقاسىندا ەرەكشە قاجەتتىلىكتەرى بار 40 مىڭعا جۋىق ازامات جۇمىسقا ورنالاستىرىلىپ، 24 مىڭنان استام نىسان سولارعا ىڭعايلاندىرىلدى. سونداي-اق جالپى ءبىلىم بەرەتىن مەكتەپتەردە 43 ينكليۋزيۆتى كابينەت اشىلدى.

«ەلباسى، پارتيا كوشباسشىسى ن.نازارباەۆ قويعان مىندەتتەردىڭ شەشىلۋىن، الىنعان مىندەتتەمەلەردىڭ ورىندالۋىن باقىلاۋدى پارتيالىق باقىلاۋ كوميتەتى مەن سىبايلاس جەم­قورلىققا قارسى ءىس-قيمىل جونىن­دەگى رەسپۋبليكالىق قوعامدىق كەڭەس ىسكە اسىرادى. سوڭعى 5 جىل ىشىن­دە پارتيالىق باستى ورگاندار ءتۇرلى مەملەكەتتىك جانە پارتيالىق ورگان­دارعا 800-دەن استام ۇسىنىم ازىرلەدى. ماسە­لەن، پارتيالىق باقىلاۋ كوميتە­تىنىڭ ارالاسۋىمەن 9،3 مىڭ مەديتسينا قىزمەتكەرىنە وتەماقى تولەندى»، دەپ اتاپ ءوتتى باۋىرجان بايبەك.

سىبايلاس جەمقورلىققا قارسى كۇرەس تە پارتيا ءۇشىن ءپرينتسيپتى ماسە­لە بولىپ قالا بەرەدى. سىباي­لاس جەمقورلىققا قارسى ءىس-قيمىل جو­نىندەگى رەسپۋبليكالىق كەڭەس Jas Otan جاستار قاناتىمەن بىرلەسىپ، جوعارى وقۋ ورىندارى مەن كوللەدجدەردى تەكسەردى. ناتيجەسىندە، 10 مىڭنان استام ستۋدەنتتىڭ جاتاقحانالارداعى ءومىر ءسۇرۋ جاعدايى جاقساردى. «جاس­تار – وتانعا!» باعدارلاماسى اياسىن­دا سوڭعى 5 جىلدا 13 مىڭنان استام جاس بۋىن جۇمىسقا تۇردى. جاس­تار باستامالارىنىڭ مەملەكەتتىك الەۋ­مەتتىك تاپسىرىسىن قارجىلان­دىرۋ 2،5 ەسە وسكەن.

Nur Otan پارتياسى قوعامدىق-ساياسي ۇيىمداردىڭ ىشىنەن العاشقىلاردىڭ ءبىرى بولىپ پاندەميانىڭ الەۋمەتتىك-ەكونوميكالىق سالدارىنا قارسى تۇردى. ەلباسى، Nur Otan پارتياسى توراعاسىنىڭ باستاماسىمەن قۇرىلعان Birgemiz قوعامدىق قورى 2،2 ملن-نان استام ادامعا، نۇر-سۇلتان مەن الماتى قالاسىنداعى 2 مىڭنان استام مەديتسينا قىزمەتكەرىنە ماتەريالدىق كومەك كورسەتتى. حالىقتىڭ نەعۇرلىم از قورعالعان توپتارىنا جاتاتىن 100 مىڭ وتباسىنا 5 ملن مەديتسينالىق ماس­كا تەگىن تاراتىلدى. 1 ملن-نان استام ادام 4،4 ملرد تەڭگە سوماعا ءبىرىنشى كەزەكتە قاجەتتى تاۋارلارمەن قامتاماسىز ەتىلدى. ماقتاارالدا سۋ تاسقىنىنان زارداپ شەككەن ازامات­تارعا ارناپ 32 ءۇي سالىنىپ، 1 مىڭ توننادان استام گۋمانيتارلىق كومەك جىبەرىلدى»، دەدى باۋىرجان بايبەك.

باۋىرجان بايبەكتىڭ ايتۋىن­شا، پاندەميا مەن كۇردەلى ەكونو­مي­كالىق احۋالعا قاراماستان، پارتيا بەل­سەندى جۇمىس جۇرگىزدى، ءوزىنىڭ بار­لىق الەۋمەتتىك سايلاۋالدى مىن­دەتتەمەلەرىن ورىنداپ، سايلاۋ­شىلاردىڭ سەنىمىن نىعايتقان. اشىق­تىق پەن ەسەپتىلىك قاعيداتتارىن باس­شىلىققا الا وتىرىپ، Nur Otan 2014 جىلدان باستاپ جىل سايىن باق-تا شىعىستاردىڭ بارلىق باپتارىن كور­سەتە وتىرىپ، قارجىلىق ەسەبىن جاريالاپ كەلەدى. پارتيا باستاماسىمەن ەسەپ كوميتەتى ەكى رەت تەكسەرۋ جۇر­گىزىپ، بارلىعى قولدانىستاعى زاڭنا­ماعا سايكەس كەلەتىنىن انىقتادى.

«كوشباسشىلىقتى ساقتاۋ ءۇشىن ۋاقىت تالابىنا جاۋاپ بەرە وتىرىپ، وزگەرۋ قاجەت. ەلباسى ايتقانداي، Nur Otan ودان ءارى دامۋدى جالعاستىرا بەرۋى ءتيىس. سوندىقتان وتكەن جىلى پارتيا باسشىسىنىڭ تاپسىرماسىمەن «سەنىم. ديالوگ. بولاشاققا نىق قادام» اتتى پارتيانى قايتا جاڭ­عىر­تۋ باعدارلاماسى قابىلداندى. بيلىك­تىڭ بارلىق دەڭگەيىندە پارتيالىق جاۋاپكەرشىلىكتى ارتتىرۋعا بايلانىس­تى شارالار قولعا الىنىپ، پارتيانىڭ ماجىلىستەگى جانە ماسليحاتتارداعى دەپۋتاتتىق فراكتسيالارىنىڭ جۇمى­سى جانداندىرىلدى. «پارتيا قاتارىن تازارتۋ» اياسىندا جارعى مەن ەتيكا كودەكسىن ساقتاماعانى، پارتيامەن بايلانىستى جوعالتقانى ءۇشىن 240 مىڭنان استام ادام، سىبايلاس جەمقورلىق قۇقىقبۇزۋشىلىعى ءۇشىن 610 ادام پارتيادان شىعارىلدى. ءوز كەزەگىندە Nur Otan پرايمەريزى ەلىمىز ءۇشىن ەلەۋلى ساياسي وقيعاعا اينالىپ، ءىس جۇزىندە «مىقتى ليدەرلەر – مىقتى پارتيا» فورمۋلاسىن ىسكە اسىردى»، دەپ قورىتىندىلادى ب.بايبەك.

ساياسي كەڭەس وتىرىسى بارىسىندا پاۆلودار وبلىسىنان جاس عالىم يرينا چيدۋنچي پارتياىشىلىك سايلاۋعا قاتىستى پىكىرىن ءبىلدىردى. «بارلىق پاۆلودارلىق ايەلدەر اتىنان ەلباسىمىزعا اۋقىمدى جوباعا قاتىسۋعا مۇمكىندىك بەرگەنى ءۇشىن العى­سىمدى ءبىلدىرىپ، ەلدەگى بولىپ جاتقان وزگەرىستەردەن سىرت قالماي­تى­نىمىزعا، قازاقستاندى بىرگە وركەن­دەتۋ ءۇشىن بارلىق كۇش-جىگەرىمىزدى جۇمسايتىنىمىزعا سەندىرگىم كەلەدى»، دەدى ي.چيدۋنچي.

تۇركىستان وبلىسىنان پرايمەريزگە قاتىسقان بەكارىس شويبەكوۆتىڭ ايتۋىن­شا، بيىلعى پرايمەريز قاراپايىم ازاماتتاردىڭ ساياساتقا ارالاسۋىنا جول اشىپ، قوعام تاراپىنان جوعارى باعالانعان.

«بۇگىن Nur Otan پارتياسى ءوز جۇ­مى­­سىنا جاڭا فورمات ەنگىزدى، ونى كورىپ وتىرمىز. تۇڭعىش رەت رەس­پۋب­­ليكالىق اۋقىمدا پرايمەريز وتكىزىلدى. سونداي-اق ءاربىر ءوڭىر، قالا جانە اۋدان بويىنشا دايىندالعان 216 سايلاۋالدى باعدارلاما حالىق اراسىندا جان-جاقتى تالقىلاندى. بۇنىڭ بارلىعى – ەلباسى، پارتيا توراعاسى ن.ءا.نازارباەۆتىڭ پارتيا­نى «قايتا جانداندىرۋ» جونىندەگى باستاماسىنىڭ ارقاسىندا جۇزەگە استى. Nur Otan ناعىز حالىقتىق پارتيا ەكەنىن دالەلدەدى»، دەدى ساياسي كەڭەس مۇشەسى باقىتجان جۇماعۇلوۆ.

ساياسي كەڭەس وتىرىسىنىڭ قورى­تىندىسى بويىنشا ۇكىمەتتىڭ سايلاۋالدى باعدارلاماسىن ىسكە اسىرۋ جونىندەگى ەسەبى الدىن الا ماقۇلداندى، پارتيانىڭ جارعىسى مەن ساياسي دوكتريناسىنا ەنگىزىلەتىن وزگەرىستەر قارالدى. پرايمەريزدىڭ 78 جەڭىمپازى ەنگەن ماجىلىسكە ارنالعان پارتيالىق ءتىزىم، سونداي-اق جۇمىس ورگاندارىنىڭ قۇرامى مەن پارتيانىڭ كەزەكتەن تىس XX سەزىنىڭ كۇن ءتارتىبى بەكىتىلدى.

 

سوڭعى جاڭالىقتار

اۋليە اتا ءھام ۇلى جىراۋ

رۋحانيات • كەشە

ۇقساس جاڭالىقتار