سورەدەگى ساعاتتار

رۋحانيات • 24 قاراشا، 2020

سورەدەگى ساعاتتار

11 رەت كورسەتىلدى

قازاقستان رەسپۋبليكاسى تۇڭعىش پرەزيدەنتى – ەلباسى مۋزەيىنىڭ عيماراتىندا «تاۋەلسىز قازاقستاننىڭ تاريحي نەگىزى» جانە «ديپلوماتيالىق سىيلىقتار – ادامزاتتىڭ مادەني مۇراسىنىڭ قۇرامداس بولىگى» اتتى قوس كورمەنىڭ سالتاناتتى اشىلۋ ءراسىمى ءوتىپ، مادەني شاراعا پارلامەنت ءماجىلىسىنىڭ دەپۋتاتتارى، تانىمال عالىمدار مەن مادەنيەت جانە ونەر قايراتكەرلەرى قاتىستى.

بەكەن قايرات ۇلى

كورمە ەكسپوزيتسياسىنا، كىتاپحانانىڭ مۇراجاي قورىندا ساقتالعان ەلباسى نۇرسۇلتان نازارباەۆقا قاتىسى بار ەرەكشە جادىگەرلەر قويىلىپ، بۇل دۇنيەلەر كورەرمەندەردىڭ كوزايىمىنا اينالدى. اسىرەسە «ديپلوماتيالىق سىيلىقتار – ادامزاتتىڭ مادەني مۇراسىنىڭ قۇرامداس بولىگى» اتتى كورمە سورەسىنە قويىلعان ساعاتتار كومپوزيتسياسى وتكەن تاريحتان سىر شەرتكەندەي اسەر قالدىردى. بۇل جادىگەرلەر نەگىزىن ەلباسىنا شەتەل باسشىلارى، حالىقارالىق ۇيىمدار مەن قورلار، ءارتۇرلى رەسمي دەلەگاتسيالار بەرگەن سىيلىقتار قۇرايدى ەكەن.

كورمەدەن الەمگە ايگىلى ساعات جاساۋ ماركالارى – Atmos، Hermle، Berhard Richards Manufacture، Blancpain سىندى ەۋروپالىق مانۋفاكتۋرا ونىمدەرىن كورۋگە بولادى. سونداي-اق كورمە تورىنەن نۇرسۇلتان ءابىش ۇلىنا تانىمال كومپوزيتور ن.تىلەنديەۆتىڭ جۇبايى سىيلاعان «پاروۆوز» اتتى ساعات جانە ءحVىىى عاسىردىڭ ەكىنشى جارتىسىندا ونەركاسىپتىك رەۆوليۋتسيانىڭ العاشقى بۋ ماشينالارىنا قاتىستى جاسالاعان جادىگەر، Atmos ماركالى كۇنتىزبەسى 3000 جىلدان باستالاتىن قۇندى ساعات جانە باسقا دا ۇلگىلەردى كورۋگە بولادى.

سونىمەن قاتار بۇل جەردەن ەرەكشە ءماندى ەستە قالارلىق وقيعالارمەن بەدەرلەنگەن گراۆەر مەن كلەيم ۇستەلگەن ساعاتتاردى دا كەزدەستىرۋگە بولادى. ماسەلەن، «راكەتا» ساعاتى ن.نازارباەۆتىڭ قازاق كسر-ءىن باسقارعان كەزەڭىندەگى ومىرىنەن سىر شەرتەتىن قىزىقتى زات سانالادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز