كۇنى كەشە گەرمانياداعى ەكى ءىرى ساياسي پارتيا ءوزارا «ۇلكەن كواليتسيا» قۇرۋ جونىندە كەلىسىمگە كەلدى. مۇنى ولار مينيسترلەر كابينەتىن بىرلەسىپ قۇرۋ ماقساتىندا جاسادى. بۇل تۋرالى «يزۆەستيا» حابارلادى.
ەلدە پارلامەنت سايلاۋى وتكەن سوڭ جەتى اپتادان كەيىن حدس/حسس جانە سوتسيال-دەموكراتيالىق پارتيا (سدپگ) كونسەرۆاتيۆتى بلوكتارى ءوزارا كواليتسيالىق كەلىسىم جاساستى. بۇل گفر-دەگى ەكى ەڭ ءىرى, بىراق يدەولوگيالىق جاعىنان ءبىر-بىرلەرىنە قاراما-قارسى پارتيالار وكىلدەرىنەن قۇرالاتىن جاڭا ۇكىمەتتى قۇرۋدىڭ باعدارلاماسى بولىپ تابىلادى. الايدا, انگەلا مەركەلدىڭ ءوزى قازىر جاڭا كابينەتتى رەسمي تۇردە باسقارىپ كەتە بەرەتىنىنە سەنىمدى ەمەس. ونى تاعايىندا ءالى دە بولسا سوتسيال-دەموكراتتاردىڭ ەركىندە تۇر.
«پارتياسىنىڭ سوڭعى 30 جىلدىڭ كولەمىندەگى رەكوردتىق كورسەتكىشكە جەتىپ, 41,5 پايىزدىق داۋىس العان مەركەلدىڭ عالامات جەڭىسىنىڭ ءوزى شىن مانىندە ونىڭ جەڭىسىنە اينالماي تۇر. سايلاۋدا داۋىس بەرۋدىڭ ناتيجەسىندە ول ءوزىنىڭ باستى ارىپتەسى – سۆدپ-دان ايرىلىپ قالدى. بۇل پارتيا بەس پايىزدىق بەلەستەن اسا الماي, بۋندەستاگقا وتپەي قالدى, - دەدى گەرمانيا-رەسەي فورۋمىنىڭ عىلىمي ديرەكتورى الەكساندر رار. - سوندىقتان ول كواليتسيالىق ارىپتەستى سول ساياسي قاپتالدان ىزدەستىرۋگە ءماجبۇر بولدى. ەندى «ۇلكەن كواليتسيا» تۋرالى كەلىسىمگە كەلگەننەن كەيىن ونىڭ ۇكىمەتىنىڭ ساياساتى ايتارلىقتاي بۇزىلا باستايدى».
سايلاۋدىڭ قورىتىندىسىندا بۋندەستاگقا حدس-حسس جانە سدپگ بلوكتارىنان بولەك, تاعى ەكى پارتيا عانا ءوتتى. سول جاق پارتيا نەگىزىنەن شىعىس گەرمانيانىڭ بۇرىنعى كوممۋنيستەرىنەن قۇرالعان. ولار ەجەلدەن كونسەرۆاتورلاردىڭ قارسىلاستارى بولىپ سانالىپ كەلگەن.
ساكەن مايلىباي.
دەرەككوز: يزۆەستيا.
