الماتى قالاسىنداعى «باراحولكانى» رەتكە كەلتىرۋ ماسەلەسى 2014 جىلى شەشىمىن تابادى. بۇل تۋرالى Total.kz حابارلادى.
جوسپار بويىنشا الدىمەن جايمابازاردىڭ سولتۇستىك بولىگىندەگى جول كەڭەيتىلەتىن بولادى. بۇل توڭىرەكتەگى جۇمىستاردى پىسىقتاۋ ماسەلەسى بىرنەشە رەت قارالعان. الماتى قالالىق جەر قاتىناستارى باسقارماسى زاڭ ءبولىمىنىڭ باستىعى اۋريكا جۇنىسبەكوۆانىڭ مالىمدەۋىنشە, «باراحولكا» اۋماعىندا نەگىزىنەن جيىرما سەگىز ساۋدا نۇكتەلەرى ورنالاسقان. سونىڭ ىشىندە ون ءبىرىن تالاپقا ساي قايتا قۇرىلىمداۋدان وتكىزۋ ءىسى كۇن تارتىبىندە تۇر. ال قالعاندارىن بۇزۋعا شەشىم قابىلدانعان. وسى ورايدا, الاتاۋ اۋدانىنىڭ توڭىرەگىنە شامامەن 4 ساۋدا ءۇيىن جانە جەتىسۋ اۋدانىنىڭ ماڭايىنا وسىنداي 7 نىساندى سالۋ ءىسى جوسپارلانعانىن اتاپ وتكىمىز كەلەدى. «جايمابازارلاردى بۇزۋ قيىندىق تۋعىزاتىنى جاسىرىن ەمەس. دەگەنمەن, قاۋىپسىزدىك ءۇشىن زاڭ تالابىنا باعىنعان ءجون. ال 2010 جىلى بىرقاتار جايمابازارلاردى بۇزۋ تۋرالى سوت شەشىمى شىقتى. وسىنى ورىنداۋ ماسەلەسى ەندى عانا قولعا الىندى. ناقتى ايتقاندا, جىل سوڭىنا دەيىن «اياكوز», «جاركەنت», «ارال», «اقجار», «داۆۋن» سىندى بازارلار بۇزىلادى»,-دەيدى ا. جۇنىسبەكوۆا.
جاڭادان سالىناتىن ساۋدا نۇكتەلەرى جول-كولىك قوزعالىسىنا كەدەرگى كەلتىرمەۋى ءتيىس. ول بويىنشا اتقارىلاتىن جۇمىس جوسپارىن جىل اياعىنا دەيىن قۇزىرەتتى ورگانعا تاپسىرۋ ساۋدا نۇكتەلەرىنىڭ يەلەرىنە مىندەتتەلدى. بۇل تالاپ ورىندالماعان جاعدايدا, جەرگىلىكتى بيلىك ءوز تالابىن سوتقا جولداۋعا بەكىنىپ وتىر. سونىمەن, «باراحولكانىڭ» توڭىرەگىندەگى داۋ-داماي ەندى رەتتەلەتىن سەكىلدى.
ءامىرحان الماعانبەتوۆ.
دەرەككوز: Total.kz
