جارىستىڭ العاشقى كۇنى ءۇش سالماق دارەجەسى بويىنشا بەلدەسۋلەر ءوتتى. جانكۇيەرلەر 61 كيلو سالماقتىڭ باس جۇلدەسى ءۇشىن تارتىس قوس قۇرداس – اقتوبەلىك نۇريسلام ساناەۆ پەن وسكەمەندىك راسۋل قاليەۆ اراسىندا ءوربيدى دەپ بولجادى. ەكەۋىنىڭ دە جاسى 29-دا. الايدا الەم چەمپيوناتىنىڭ ەكى دۇركىن جۇلدەگەرى, ازيا چەمپيونى دەگەن دارداي اتاعى بار ءدۇلدۇل العاشقى اينالىمداردا ويدا-جوقتا ەسىمى كوپشىلىككە بەيمالىم شىعىس قازاقستان وبلىسىنىڭ تاعى ءبىر وكىلى مۇحتار سەيىتوۆتەن ۇتىلدى. ال سارى قۇرلىقتا قارسىلاس شاق كەلتىرمەي, ازيا ويىندارىندا كۇمىس مەدالدى موينىنا ىلگەن راسۋل قاليەۆ جارتىلاي فينالدا ادلان اسقاروۆقا جول بەردى.
اقتىق سىندا اتىراۋلىق سالامات مالىكوۆكە سان سوقتىرعان ادلان اسقاروۆ ەل چەمپيونى اتاندى. ەندى وسى ايقىن جەڭىستەن كەيىن الماتى وبلىسىنان كەلگەن سپورتشىنىڭ ءار قادامىن قىراعى مامانداردىڭ ءجىتى قاداعالايتىنى انىق. سەبەبى, بۇعان دەيىن ول جاسوسپىرىمدەر مەن جاستار اراسىنداعى جانە 23 جاسقا دەيىنگى بالۋاندار اراسىنداعى الەم بىرىنشىلىكتەرىندە جۇلدە الدى. بىراقتار حالىقارالىق جارىستاردا ولجا سالدى. مىنە, ەندى جاسى 20-دان ەندى عانا اسقان ادلان ەرەسەكتەر دۋىندا قارسىلاس شاق كەلتىرمەدى. قولا مەدال راسۋل قاليەۆ پەن قاراعاندىلىق ازات وگاننيسياننىڭ قورجىنىندا.
57 كيلو سالماق دارەجەسىندەگى بارلىق بالۋانداردىڭ دەڭگەيلەرى بىردەي بولدى. جارىس قارساڭىندا دۋالى اۋىز مامانداردىڭ وزدەرى ەشكىمدى بولە-جارا اتاي المادى. دەسەك تە كۇرەستىڭ ەرەجەسى بويىنشا جەكپە-جەكتە ءبىر عانا جەڭىمپاز بولۋعا ءتيىس. بۇل جولى اقمولالىق داۋلەت تەمىرجانوۆ دارا شىقتى. فينالدا قانداسىمىز قاراعاندىلىق جاۆوحير يريستاەۆتى جەڭدى. شىمكەنتتىك عابيت تولەپباي مەن جامبىلدىق راحات قالجان قولا مەدالداردى يەلەندى.
86 كيلو سالماقتا شىعىسقازاقستاندىق ازامات داۋلەتبەكوۆ پەن الماتىلىق ادىلەت داۋلىنباەۆتىڭ ءوزارا تارتىسىن كوپشىلىك تاعاتسىزدانا كۇتتى. ەكەۋى دە تالاي ءدۇبىرلى دودالاردا ابدەن ىسىلعان اككى بالۋاندار. بارلىق قارسىلاستارىن سىپىرا ۇتقان ازامات اقتىق سىنعا القىنباي جەتتى. ال ادىلەت جارتىلاي فينالدا تالدىقورعاندىق ەسقالي داۋلەتقازىنىڭ وسال تۇسىن تابا المادى. فينالدا داۋلەتبەكوۆ پەن داۋلەتقازى كۇرەستى. بۇل باسەكەدە ازاماتتىڭ اسىعى الشىسىنان ءتۇستى. ادىلەت پەن ماڭعىستاۋلىق نۇرداۋلەت كوكتەۋباەۆ ءۇشىنشى ورىنعا تابان تىرەدى.
ەل چەمپيوناتىنىڭ ەكىنشى كۇنى 65 كيلو سالماق دارەجەسىندەگى بەلدەسۋلەر وتە شيەلەنىستى ءوتتى. كىلەڭ كوكجالدار اراسىنان قىزىلوردالىق داۋلەت نيازبەكوۆ پەن قاراعاندىلىق ءادىل وسپانوۆ سۋىرىلىپ شىقتى. بۇل باسەكەدە سىر بويى ساڭلاعىنىڭ جەڭەتىنىنە ەشكىمنىڭ كۇمانى بولمادى. ويتكەنى, داۋلەتتىڭ الەم چەمپيوناتىنىڭ كۇمىس جانە قولا جۇلدەگەرى, ازيانىڭ ءۇش دۇركىن چەمپيونى دەگەن اتاقتارى بار. ءيا, ءادىل ونداي جەتىستىگىمەن ماقتانا المايدى. ايتقانداي-اق, فينالدىق سايىس نيازبەكوۆتىڭ ايقىن باسىمدىعىن اياقتالدى. ءسويتىپ, داۋلەت قازاقستان چەمپيوناتىندا سەگىزىنشى مارتە توپ جاردى. جامبىلدىق نۇرسۇلتان سادىق پەن شىعىسقازاقستاندىق ولجاس ولجاقانوۆ ءۇشىنشى ساتىعا جايعاستى.
70 كيلو سالماق دارەجەسىندە باس جۇلدە ءۇشىن تارتىس شىمكەنتتىك نۇرجان سەيىتجان مەن اتىراۋلىق سىرباز تالعات اراسىندا ءوتتى. بۇل باسەكەدە اتىراۋدان كەلگەن بالۋاننىڭ ۇستەمدىگى ەش كۇمان تۋعىزعان جوق. قارسىلاسىن 10:0 ەسەبىمەن ايقىن ۇتقان ول ەل چەمپيونى اتاندى. سولتۇستىك قازاقستان وبلىسىنىڭ وكىلى سۇلتان بەيىسوۆ پەن تالدىقورعاندىق ەرلان تاڭىربەرگەنوۆ قولا مەدالدى قورجىندارىنا سالدى. راسىدا دا وسى ەركىن كۇرەس شەبەرلەرىنىڭ جەڭىس تۇعىرىنا كوتەرىلۋى كوپشىلىكتى تاڭداندىردى. ال ساياتبەك وقاسوۆ, اماندىق باكەەۆ, مەيىرجان ءاشىروۆ, ازامات شاعاپ ۇلى سىندى تانىمال سپورتشىلار قالىڭ توپتىڭ اراسىندا قالىڭ قويدى.
97 كيلو سالماقتا الىشەر ەرعاليعا تەڭ كەلەر ەشكىم تابىلمادى. جاسوسپىرىمدەر مەن جاستار اراسىنداعى الەم بىرىنشىلىكتەرىندە جۇلدەگەرلەر قاتارىنان كورىنگەن جامبىل وبلىسىنىڭ وكىلى بىلتىر ەرەسەكتەردىڭ ازيا چەمپيوناتىندا كۇمىس مەدال الىپ, ءوز جانكۇيەرلەرىن ءبىر قۋانتقان ەدى. ىلە-شالا تسيولكوۆسكيدىڭ مەموريالىندا باس جۇلدەنى قانجىعاسىنا بايلادى. كۇزدە نۇر-سۇلتاندا ۇيىمداستىرىلعان الەم چەمپيوناتىندا بەسىنشى ورىنعا تابان تىرەدى. مىنە, ەندى الىشەر قازاقستان چەمپيوناتىندا قارسىلاس شاق كەلتىرمەدى. جاسى 20-دان ەندى عانا اسقان بالۋان ءۇشىن بۇل تاماشا ناتيجە ەكەنى ءسوزسىز.
74 كيلو سالماقتىڭ نەگىزگى فاۆوريتتەرى ۇشەۋ ەدى. ولار – نۇرلان بەكجانوۆ, نۇرقوجا قايپانوۆ جانە دانيار قايسانوۆ. بارلىعى دا الەم چەمپيوناتىنىڭ جۇلدەگەرى اتانعان اپايتوستەر. نۇرلان بۇل اتاققا 2016 جىلى بۋداپەشتە قول جەتكىزدى. 2019 جىلى نۇر-سۇلتاندا وتكەن دودادا نۇرقوجا كۇمىس السا, دانيار قولا مەدالدى موينىنا ءىلدى. بىراق ول كەزدە قايپانوۆ 70 كيلو سالماقتا كۇرەسكەن ەدى. ودان بولەك, ەسىمدەرى اتالعان ورەندەردىڭ بارلىعى دا قۇرلىقتىق دەڭگەيدەگى جارىستاردا جاسىنداي جارقىرادى. بىراق العاشقى اينالىمنان كەيىن قايسانوۆ جارىستى جالعاستىرۋدان باس تارتتى. سەبەبى, بىرنەشە كۇن بويى ونىڭ بەلى اۋىرىپ, قاتتى مازاسىزدانعان ەكەن. سودان جاراقاتىن اسقىندىرىپ المايىن دەپ, وسىنداي شەشىم قابىلدادى. بۇل جاعدايدى نۇرقوجا قايپانوۆ ۇتىمدى پايدالاندى. قارسىلاستارىنىڭ بارلىعىن قاپى قالدىرعان سولتۇستىك كازاقستان وبلىسىنىڭ وكىلى فينالدا قىزىلوردالىق قانات مۇسابەكوۆتى ۇتىپ, التىن تۇعىرعا كوتەرىلدى. نۇر-سۇلتاندىق نۇرلان بەكجانوۆ پەن الماتىلىق دارحان ەسەنعالي ءۇشىنشى ساتىلارعا جايعاستى.
79 كيلو سالماقتىڭ ءفاۆوريتى 32 جاستاعى عالىمجان ۇسەرباەۆتى تۇعىردان تايدىرۋ ءۇشىن جالىندى جاستار بارىن سالدى. الايدا وليمپيا ويىندارى مەن الەم چەمپيوناتىندا بەسىنشى ورىنعا تابان تىرەپ, بىرقاتار حالىقارالىق دودالاردا جۇلدەگەرلەر ساناتىنا قوسىلعان سىر بويىنىڭ ساڭلاعى ەشكىمگە ونداي مۇمكىندىك بەرمەدى. قارسى كەلگەندەرىن الىپ تا, شالىپ تا جىقتى. فينالدا تالدىقورعاندىق رۇستەم مىرزاعاليەۆتان مەرەيى ۇستەم بولعان عالىمجان بەسىنشى مارتە چەمپيوندىق اتاقتى يەلەندى. اقتوبەلىك ايدار بالدانباەۆ پەن پەن اتىراۋلىق بولات ساكاەۆ قولا مەدالداردى ەنشىلەدى.
92 كيلو سالماق دارەجەسىندە ماڭعىستاۋلىق ەلحان اسادوۆتىڭ اسىعى الشىسىنان ءتۇستى. فينالدا ول نۇر-سۇلتاننىڭ بالۋانى ەرالى ابدراشەۆتەن ايلاسىن اسىردى. ءۇشىنشى ورىندا – وسكەمەندىك ءشاميل ماگامادوۆ پەن ەلوردالىق نۇرعالي نۇرعايىپ ۇلى.
125 كيلو سالماقتا پاۆلودارلىق داۋلەت شابانباي, شىعىسقازاقستاندىق ولەگ بولتين, قاراعاندىلىق ەرمۇحامبەت ىڭكار جانە اقتوبەلىك يۋسۋپ باتىرمۇرزاەۆ سىندى الىپتار بولدى. ولاردىڭ بارلىعى دا اسا ءىرى حالىقارالىق جارىستاردا جۇلدە الىپ جۇرگەن دۇلدۇلدەر. سولاردىڭ اراسىنان داۋلەت پەن ولەگ وزىپ شىقتى. 37 جاستاعى شابانبايدىڭ كەزىندە وليمپيادادا قولا مەدالدى يەلەنىپ, ازيا ويىندارىندا ءبىر رەت جانە قۇرلىق بىرىنشىلىگىندە بەس رەت جۇلدەگەرلەر ساناتىنان كورىنگەنىن جانكۇيەرلەر جاقسى بىلەدى. بولتين ودان ون جاس كىشى. بۇل تارتىس جاس جولبارىستىڭ پايداسىنا شەشىلدى. ناتيجەسىندە ولەگ بولتين – التىن, داۋلەت شابانباي – كۇمىس, ال يۋسۋپ باتىرمۇرزاەۆ پەن تۇركىستاندىق باقداۋلەت وسەرباي – قولا مەدالداردى مويىندارىنا ءىلدى.
