كەزدەسۋدە شىمكەنت قالاسىندا سينگاپۋردىڭ MDIS ۋنيۆەرسيتەتىنىڭ فيليالىن اشۋ ماسەلەسى تالقىلاندى. ۋنيۆەرسيتەت ەڭ قاجەتتى مامانداردى دايارلايدى. شىمكەنتتە قاي ماماندىقتاردىڭ وقىتىلاتىنى ەكى جاقتى كەلىسىمدەر ناتيجەسىندە انىقتالادى. ۋنيۆەرسيتەتتىڭ كوممەرتسيالىق ەمەس فيليالى كوپشىلىككە قولجەتىمدى, الەۋمەتتىك باعىتتا اشۋ كوزدەلۋدە.
مۇرات دۇيسەنبەك ۇلى مەگاپوليس قالانىڭ دامۋ باعىتىندا وسىنداي باستامالار اسا قاجەت ەكەنى, بۇل رەتتە وقۋ ورنىنىڭ بازاسى دايىن ەكەنىن اتاپ ءوتتى.
1956 جىلى قۇرىلعان ايگىلى وقۋ ورنى ستۋدەنتتەردى بيزنەس-مەنەدجمەنت, ديزاين, باق جانە بايلانىس, دەنساۋلىق ساقتاۋ, مەيىربيكە ءىسى, تۋريزم, اقپاراتتىق تەحنولوگيالار يندۋسترياسى, كيبەرقاۋىپسىزدىك جانە ەكولوگيا ماماندىقتارى بويىنشا وقىتادى. MDIS ۇلىبريتانيانىڭ ۋنيۆەرسيتەتتەرىمەن ىنتىماقتاستىقتا جۇمىس ىستەيدى.
ۋنيۆەرسيتەتتىڭ شەتەلدەردە (مالايزيا مەن وزبەكستاندا) فيليالدارىن اشۋ جانە وقۋ ۇدەرىسىن ۇيىمداستىرۋدا تاجىريبەسى بار. اتاپ ايتقاندا, 2008 جىلى وزبەكستاندا MDIS فيليالى اشىلعان.
2021 جىلى قازاقستان رەسپۋبليكاسى پرەزيدەنتىنىڭ سينگاپۋر رەسپۋبليكاسىنا رەسمي ساپارى جوسپارلانۋدا. سونداي-اق, كەزدەسۋدە وسى ساپار بارىسىندا شىمكەنت قالاسىنىڭ تۋريستىك جانە ينۆەستيتسيالىق الەۋەتىن ناسيحاتتايتىن مادەني ءىس-شارالار وتكىزۋ ماسەلەسى دە تالقىعا ءتۇستى.
