«ەكولوگيا دەپارتامەنتىنە سوڭعى ۇلگىدەگى درون ساتىپ الىنىپ جاتىر. ول 12 ءتۇرلى لاستاۋشى كوزدەردى ونلاين رەجيمدە انىقتاي الادى. جەتى شاقىرىم راديۋستا, ءۇش جارىم شاقىرىم بيىكتىككە ۇشىرۋعا بولادى. ۆيدەو, فوتوفيكساتسياسى بار. قازىر اتالعان قۇرىلعى ساتۋ-ساتىپ الۋ پروتسەسىنەن ءوتىپ جاتىر. كەلەر جىلدان باستاپ قولدانىسقا ەنگىزەمىز. درونداردى كوبىنە ونەركاسىپ كاسىپورىندارىنىڭ اۋماعىندا, زاۋىتتاردىڭ, كەن ورىندارىنىڭ توڭىرەگىندە پايدالانامىز. ەرەكشە قورعالاتىن تابيعي اۋماقتاردا درون قولدانىلمايدى. سوندىقتان شۋ ماسەلەسى بولماۋى ءتيىس», - دەپ اتاپ ءوتتى رۋسلان توكەنوۆ.
ايتا كەتەيىك, بيىل ماڭعىستاۋ وبلىسى بويىنشا كاسىپورىندارعا قورشاعان ورتاعا كەلتىرگەن زيانى ءۇشىن 2,8 ملرد تەڭگە ايىپپۇل سالىنىپ, ونىڭ 90% -ى وندىرىلگەن. تىكەلەي ەفيردەگى سۇحباتتا رۋسلان توكەنوۆ وڭىردەگى ەكولوگيالىق ماسەلەلەردى شەشۋ بويىنشا بەكىتىلگەن جول كارتاسىنا كەڭىنەن توقتالدى.
«جول كارتاسى جەتى تاراۋدان, وتىز التى بولىمنەن تۇرادى. شىعارىندىلاردى ازايتۋ, كوگالداندىرۋ, قالدىقتاردى باسقارۋ, تاريحي لاستانۋ ورىندارىن رەتتەۋ, بيوالۋانتۇرلىلىكتى قورعاۋ جانە تاعى دا باسقا ەكولوگيالىق ماسەلەلەردىڭ ءبارى وسى قۇجاتقا ەنگىزىلگەن. ءمينيستردىڭ تاپسىرماسى بويىنشا, ءبىز توقسان سايىن جەرگىلىكتى حالىقپەن كەزدەسىپ, اتقارىلعان جۇمىس بويىنشا ەسەپ بەرىپ وتىرامىز. وندا شەشىلگەن ماسەلەلەردى, شەشىمىن تاپپاعان دۇنيەلەردى بايانداپ, سەبەبىن دە تۇسىندىرەمىز», - دەدى دەپارتامەنت باسشىسى.
جاقىندا قازاقستاننىڭ قىزىل كىتابىنىڭ سيرەك كەزدەسەتىن جانە جويىلىپ كەتۋ قاۋپى بار جانۋارلار تىزىمىنە ەنگىزىلگەن كاسپي يتبالىعىنىڭ احۋالى دا سۇحباتقا ارقاۋ بولدى.
«كاسپي جاعالاۋىنان كەيدە ءولى يتبالىقتاردىڭ تابىلىپ جاتاتىنى جاسىرىن ەمەس. كوپ جاعدايدا بۇعان يتبالىقتىڭ براكونەرلىك اۋعا وراتىلىپ قالۋى سەبەپ بولادى. بيىل اكىمدىكتىڭ قاتىسۋىمەن تەڭىزدەگى ءبىراز جەر زاڭسىز اۋدان تازارتىلدى. ەگەر بۇل جۇمىس جالعاسسا, وڭ ناتيجە بولاتىنى ءسوزسىز. ال يتبالىقتاردىڭ قىزىل كىتاپقا ەنۋى بىزگە جاڭادان ەرەكشە قورعالاتىن ايماقتار قۇرۋعا مۇمكىندىك بەرەدى», - دەپ اتاپ ءوتتى ر.توكەنوۆ.
وڭىردەگى قوقىس پروبلەماسى تۋرالى ايتىلعاندا سوڭعى ۋاقىتتا جۇرتشىلىق تالقىسىنا ءتۇسىپ جاتقان بوزجىرا شاتقالىنىڭ تازالىعى دا نازاردان تىس قالمادى.
«ەسەپ بويىنشا بيىل بوزجىراعا 2000 ادام بارعان. ونىڭ ارقايسىسىندا وزدەرىمەن ءبىر بوتەلكە سۋ بولدى دەسەك, جارتىسى سانالى تۇردە بوس بوتەلكەسىن الىپ كەتەدى. قالعان مىڭىنان قالدىق سۋ جەردە قالادى. الداعى جىلى شاتقالعا ون مىڭ تۋريست كەلەدى دەپ كۇتىلۋدە. ياعني, ءبىز قوقىس ماسەلەسىن قازىردەن رەتتەپ, ونى تاستايتىن ورىنداردى دايىنداپ, قوناق ءۇي سالاتىن ينۆەستورعا مىندەت جۇكتەۋىمىز قاجەت. جالپى قوناق ءۇي بوزجىرا شاتقالىنان الىس ورنالاسسا, ەكولوگيالىق تالاپتار ورىندالسا, جوبا دايىن بولعاندا حالىققا تانىستىرىلسا, سونىمەن قاتار اينالادا كيەلى ورىندار بولعاندىقتان تۇنگى مەزگىلدە تىنىشتىق رەجيمى ساقتالسا بۇل جوباعا جۇرتشىلىقتىڭ ءبارى بىردەي قارسى ەمەس», - دەيدى دەپارتامەنت باسشىسى.
سۇحبات كەزىندە 105 ملن توننا رادياتسيالىق قالدىق توگىلگەن قوشقار اتا قالدىق قويماسى, شەتپە ماڭىنداعى كارەرلەر, ەكولوگيالىق مادەنيەت, جاڭا ەكولوگيالىق كودەكستىڭ جەرگىلىكتى جەردەگى احۋالدى جاقسارتۋعا تيگىزەتىن سەپتىگى جانە تاعى دا باسقا قوردالانعان پروبلەمالار ءسوز بولدى.
مينيسترلىكتىڭ ءباسپاسوز قىزمەتى سالالىق كوميتەتتەر مەن دەپارتامەنتتەر, ۆەدومستۆالىق مەكەمەلەر وكىلدەرىمەن ماڭىزدى ماسەلەلەر جونىندە تىكەلەي ەفيرلەردى ءداستۇرلى تۇردە كۇن سايىن وتكىزىپ وتىرادى.
