تاياۋدا مالىن ۇرلاتىپ, وكىنىشى وزەگىن ورتتەگەن جەتى بىردەي شاعىم ءتۇسىپتى. ابىروي بولعاندا, پوليتسيا قىزمەتكەرلەرىنىڭ جەدەل ءىس-قيمىلىنىڭ ارقاسىندا جوعالعان مال تابىلىپ, يەلەرىنە قايتارىلدى. وندا دا ۋاقىتىندا حابار بەرگەندەرىنىڭ ارقاسىندا. ال جايىلىمداعى مالدىڭ جايى بولەك. ءۇيىر ىشىندەگى جىلقىنى تۇگەندەۋ قيىن. تابىلىپ قالار دەگەن ۇمىتپەن جىلقىشىلار قۇرىق سۇيرەتىپ بىرەر كۇن وزدەرى ىزدەيدى. ماڭايداعى جىلقى باققان قاۋىمنان سۇراستىرادى. وعان شەيىن ءىز باسىلادى. بىلتىر ءدال وسىنداي 32 دەرەك تىركەلگەن. قازىر مال ۇرلىعىنىڭ الدىن الۋعا باعىتتالعان كەشەندى شارا جۇرگىزىلىپ جاتىر.
–جۋىردا كراسنويار ەلدى مەكەنىنەن جايىلىمداعى جىلقىنىڭ جوعالعاندىعى تۋرالى سۋىت حابار ءتۇستى. جەدەل ىزدەستىرۋ شارالارىن جۇزەگە اسىرۋدىڭ بارىسىندا جوعالعان مال تابىلدى, – دەيدى كوكشەتاۋ قالالىق پوليتسيا باسقارماسى كريمينالدىق پوليتسيا ءبولىمىنىڭ بولىمشە باستىعى قانات احمەتوۆ.
قالالىق پوليتسيا باسقارماسىنىڭ قىزمەتكەرلەرى مال تاسىمالدايتىن اۆتوكولىكتەردى توقتاتىپ, تەكسەرۋ جۇمىستارىن جۇرگىزۋدە. تاياۋدا زاڭ بۇزعانى ءۇشىن اكىمشىلىك 2 حاتتاما تولتىرىلىپ, ايىپپۇل سالىندى.
وڭىرگە ەت ونىمدەرى ىرگەلەس اۋداندار مەن كورشىلەس سولتۇستىك قازاقستان وڭىرىنەن دە جەتكىزىلەدى. ەگەر قۇجاتتارى بولماسا, سويىلعان مالدىڭ كىمدىكى ەكەنىن انىقتاۋ قيىن. «الدىرعان البىرت» دەگەندەي, مال يەلەرىنىڭ وزدەرى كۇنكورىسىن اجىراتىپ وتىرعان اق-ادال مالىنا اباي بولعاندارى ءجون.
كوكشەتاۋ
