كوميسسيا وتىرىسىنا كوتەرىلگەن ءبىرىنشى ماسەلە بويىنشا كەيبىر ساياسي پارتيالاردىڭ سايلاۋعا جىبەرىلۋى ءسوز بولدى. ناتيجەسىندە, ساياسي پارتيالاردى پارتيالىق ءتىزىم بويىنشا سايلاناتىن پارلامەنت ءماجىلىسىنىڭ جانە ءماسليحاتتاردىڭ دەپۋتاتتارىن سايلاۋعا جىبەرۋ تۋرالى قاۋلىسىنا وزگەرتۋلەر ەنگىزىلدى. بۇل ماسەلە بويىنشا قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسى اسىلبەك سماعۇلوۆ ءسوز الدى. ول 2020 جىلعى 5 قاراشادا ورتالىق سايلاۋ كوميسسياسى 6 ساياسي پارتيانى سايلاۋعا قاتىسۋعا جىبەرۋ تۋرالى قاۋلى قابىلداعانىن ەسكە سالدى. قازاقستان رەسپۋبليكاسى ادىلەت مينيسترلىگىنىڭ اقپاراتى بويىنشا 2020 جىلعى 11 قاراشادا «بىرلىك» ساياسي پارتياسى قايتا تىركەۋدەن ءوتىپ, «ADAL» ساياسي پارتياسى بولىپ اتاۋىن وزگەرتسە, قازاقستان كوممۋنيستىك حالىق پارتياسى دا تىركەۋدەن ءوتىپ, قازاقستان حالىق پارتياسى بولىپ وزگەرگەن. «ADAL» ساياسي پارتياسىنىڭ جانە قازاقستان حالىق پارتياسىنىڭ بارلىق فيليالدارى 14 وبلىستىڭ ادىلەت ورگاندارىندا, سونداي-اق نۇر-سۇلتان, الماتى جانە شىمكەنت قالالارىندا ەسەپتىك تىركەۋدەن قايتا وتكەن.
وسىلايشا, ورتالىق سايلاۋ كوميسسياسى قوس پارتيانى پارلامەنت ءماجىلىسى مەن ءماسليحاتتارى دەپۋتاتتارىن سايلاۋعا قاتىسۋعا جىبەرۋ تۋرالى قاۋلى قابىلدادى.
كۇن تارتىبىندەگى ءبىرىنشى ماسەلەنى تۇيىندەي كەلە, ورتالىق سايلاۋ كوميسسياسىنىڭ توراعاسى بەرىك يماشەۆ «ADAL» پارتياسى تۇركىستان وبلىسىنداعى فيليالىن قايتا تىركەۋدەن جانە شىمكەنت قالاسىنداعى فيليالىن ەسەپتىك تىركەۋدەن وتكىزگەنىن اتاپ ءوتتى.وسىلايشا, پارتيا بارلىق وڭىرلەردەگى ماسليحاتتارعا سايلاۋعا قاتىسۋعا مۇمكىندىك الدى.
وتىرىسقا ساياسي پارتيالاردىڭ, ادىلەت مينيسترلىگىنىڭ, اۋماقتىق سايلاۋ كوميسسيالارى مەن بۇقارالىق اقپارات قۇرالدارىنىڭ وكىلدەرى ونلاين قاتىستى.
ودان بولەك, وتىرىستا 29 شەتەلدىك بايقاۋشى تىركەۋدەن ءوتتى. بۇل ماسەلە بويىنشا ءسوز العان ورتالىق سايلاۋ كوميسسياسىنىڭ مۇشەسى اناستاسيا ششەگورتسوۆا «سايلاۋ تۋرالى» كونستيتۋتسيالىق زاڭنىڭ 20-2-بابىنا سايكەس شەت مەملەكەتتەردىڭ, حالىقارالىق ۇيىمداردىڭ بايقاۋشىلارىن اككرەديتتەۋدى سىرتقى ىستەر مينيسترلىگىنىڭ ۇسىنۋى بويىنشا ورتالىق سايلاۋ كوميسسياسى جۇزەگە اسىراتىنىن باياندادى. وسىعان بايلانىستى سىرتقى ىستەر مينيسترلىگى تاۋەلسىز مەملەكەتتەر دوستاستىعىنا (تمد) قاتىسۋشى مەملەكەتتەردىڭ پارلامەنتارالىق اسسامبلەياسىنان 29 بايقاۋشىنى ۇسىنعان. ولاردىڭ بارلىعى اككرەديتتەلدى. وسك مۇشەسى اككرەديتتەۋگە ۇسىنىستاردىڭ كەلىپ تۇسۋىنە قاراي بايقاۋشىلار بويىنشا دەرەكتەر جاڭارتىلاتىنىن حابارلادى.
