وتكەن سەنبى كۇنى يران بيلىگى ەل ايماعىن بىرنەشە بولىككە ءبولىپ, ولارعا ارنايى ءتۇس بەردى. ناۋقاس سانى كوپ ەلدى مەكەندەر «قىزىل ايماققا» جاتقىزىلىپ, بىرقاتار شەكتەۋ قويىلدى. ول جاقتا مەيرامحانا, ءدامحانا, بارلاردىڭ جۇمىسى توقتاتىلعانىمەن, مەملەكەتتىك قىزمەتشىلەردىڭ جارتىسى عانا قاشىقتان جۇمىس ىستەۋگە كوشتى. دەگەنمەن جەكە كومپانيالار دا قىزمەتتەرىن كورسەتىپ جاتىر. سونىمەن بىرگە كەشكى 9-دان تاڭعى 4-كە دەيىن عانا كوشەدەن شىعۋعا تىيىم سالىنعان. ءبىر ايتا كەتەرلىگى, ەلدەگى 32 پروۆينتسيانىڭ 25-ءى «قىزىل ايماق» قاتارىندا. قىزىل ايماقتا بۇرىننان تىركەلمەگەن كولىكتەر بۇدان بۇلاي قاجەت پروۆينتسيالارعا وتە المايدى.
ساراپشىلار يراندا ءۇشىنشى تولقىننىڭ باستالعانىن ايتادى. ولاردىڭ ويىنشا, ەلدە قاتاڭ كارانتين ورناتىلۋى كەرەك. كەيىنگى كۇندەردە ۆيرۋستان كۇن سايىن 400-دەن استام ادام قايتىس بولدى. دەمالىستا 13 421 كىسىنىڭ ۆيرۋس جۇقتىرعانى ءمالىم بولدى. ماماندار جاعدايدىڭ تۇزەلۋى ءۇشىن ۇكىمەت تانىستىرعان شەكتەۋلەردىڭ جەتكىلىكسىز ەكەنىن ايتادى. دەنساۋلىق ساقتاۋ مينيسترلىگى دە مۇنى جوققا شىعارمايدى. جاۋاپتى قۇرىلىم وكىلى سيما سادات لاري ناۋقاستار سانىنىڭ ارتۋى جاعدايدىڭ اۋىر ەكەنىن, بۇل توقتاماسا يران ءۇشىن قىس ايلارى كۇردەلى ءارى جاۋاپتى مەزگىل بولاتىنىن حابارلادى. ۇكىمەت ۆيرۋستىڭ تەز تارالۋىنا وتباسىلىق جيىندار سەبەپ دەيدى. الايدا جىل باسىنداعىداي قاتاڭ كارانتين جاريالاپ, كەسەلدى قۇرىقتاۋعا اسىعار ەمەس.
