كىتاپحانا سالاسىنىڭ بارلىق مامانىنا, عالىمدار مەن قوعام قايراتكەرلەرىنە ۇلتتىق قۇندىلىقتاردى, رۋحاني-ادامگەرشىلىك ءھام مادەني اسپەكتىلەردى وقۋ, ساقتاۋ, قولداۋ ماسەلەلەرى, ۆيرۋس پاندەمياسىنان كەيىنگى جاھاندىق قايتا قۇرۋلار كەزەڭىندەگى كىتاپحانالار جۇمىسىنىڭ باعىتتارى بويىنشا پىكىرتالاس كەزدەسۋىنە قاتىسۋعا مۇمكىندىك بەرۋ ءۇشىن اقپاراتتىق جانە عىلىمي-مادەني ونلاين الاڭ قۇرۋدى ماقسات تۇتقان حالىقارالىق وقۋ كونگرەسى مادەنيەت جانە سپورت مينيسترلىگىنىڭ قولداۋىمەن ءوتىپ وتىر.
جيىنعا قازاقستان رەسپۋبليكاسىنىڭ دانياداعى قۇرمەتتى كونسۋلى Leif Midtgaard Pedersen قاتىستى. كونسۋل ءوز سوزىندە قازىرگى قوعامداعى كىتاپحانالاردىڭ كىتاپ وقۋدى ناسيحاتتاۋ ىسىندەگى ۇلكەن ءرولىن اتاپ ءوتىپ: «كىتاپحانا سالاسىنىڭ ماماندارى ءۇشىن ونلاين-اقپاراتتىق پلاتفورما قۇرۋ جونىندەگى وسى باستامانى العا باسقان يگى قادام دەپ سانايمىن. تاريحتان ساباق الۋعا مۇمكىندىك بەرەتىن ۇلتتىق قۇندىلىقتار مەن مادەني اسپەكتىلەر وسى پروتسەستىڭ نەگىزى بولۋعا ءتيىس. وسى ونلاين پلاتفورما كەلەشەك ۇرپاقتىڭ يگىلىگى ءۇشىن جاسالاتىن جوبا بولادى», دەدى.
قازىرگى ۋاقىتتا كىتاپحانا جۇمىسىن ۆيرتۋالدى وقىرمانعا دا قولجەتىمدى قىلۋ – كىتاپحانا اۋديتورياسىنىڭ الەمدىك ستاندارتقا ساي بولۋىنىڭ العىشارتى ىسپەتتەس.
قازاقستانداعى حالىقارالىق وقۋ كونگرەسىنە العاش رەت قاتىسقان حالىقارالىق كىتاپحانالىق قاۋىمداستىقتار مەن مەكەمەلەر فەدەراتسياسىنىڭ (يفلا) پرەزيدەنتى كريستين ماككەنزي پاندەمياعا بايلانىستى اقپاراتتىق قوعامداستىقتاعى جاڭا وزگەرىستەر كەزەڭىندەگى يفلا جۇمىسى تۋرالى ءھام ساۋاتتىلىق پەن وقۋدى الەمدىك اۋقىمدا ىلگەرىلەتۋدىڭ ماڭىزدىلىعى جايىندا بايانداما جاسادى.
سونداي-اق اتالعان شاراعا رەسەي, قىتاي حالىق رەسپۋبليكاسى, ماجارستان, تۇركيا, لاتۆيا, دانيا, بىرىككەن اراب امىرلىكتەرىنىڭ ۇلتتىق جانە باسقا دا كىتاپحانالارىنىڭ ماماندارى قاتىستى.
