شارانى وتكىزۋشى «اقيقات» پىكىرسايىس كلۋبى 2011 جىلى قۇرىلعان. ونىڭ قىزمەتى تاۋەلسىز قازاقستان تاريحىنداعى وزەكتى ماسەلەلەردى تالداۋ ارقىلى جاستاردى سىني تۇرعىدان ويلاۋ داعدىسىنا باۋلىپ, تۋىنداعان ماسەلەنى ءوز بەتىنشە ەڭسەرۋمەن قاتار, شىنايى اقيقاتقا قول جەتكىزۋگە باعىتتالعان.
تۋرنير جەڭىمپازدارىن ماراپاتتاۋ راسىمىنە جەڭىسكە جەتكەن كوماندالار مەن ولاردىڭ باپكەرلەرى, تۋرنير تورەشىلەرى, سونداي-اق №1 بالالار مۋزىكا مەكتەبىنىڭ دومبىرا ءانسامبلى قاتىستى.
ەلباسى كىتاپحاناسىنىڭ ديرەكتورى ءامىرحان راحىمجانوۆ جاستارعا ارناپ ءسوز سويلەپ, بەلسەندى ءارى تالاپشىل ورەندەردى قولداۋ مەملەكەتتىڭ باستى مىندەتى ەكەنىن اتاپ ءوتىپ: «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ وركەنيەتتى ەلدىڭ بولاشاعىن بىلىمگە قۇشتار جاستار قالىپتاستىراتىنىن ءجيى ايتادى. جىل وتكەن سايىن پىكىرتالاس تۋرنيرلەرىنە قاتىسۋشىلار جاۋاپتى شەشىم قابىلداۋدا دايىندىق دەڭگەيلەرىنىڭ جوعارى ەكەنىن كورسەتىپ كەلەدى. ءتۋرنيردىڭ جەڭىمپازدارىن شىن جۇرەكتەن قۇتتىقتايمىن جانە قاتىسۋشىلاردىڭ ارقايسىسى بيىك شىڭعا جەتەرىنە سەنىمدىمىن. سىزدەرگە بارلىق جول اشىق. وقۋدا جانە ءوزىن ءوزى جەتىلدىرۋدە تولاعاي تابىستار تىلەيمىن!» دەي كەلە, تۋرنير جەڭىمپازدارىنا ەلباسى كىتاپحاناسىنىڭ اۋىسپالى كۋبوگىن تابىستادى.
تۋرنير قورىتىندىسى بويىنشا «قازاق ليگاسى» توبىنان ءبىرىنشى ورىندى حالىقارالىق لينگۆيستيكالىق كوللەجدىڭ ء«توزىم» كومانداسى جەڭىپ السا, كەلەسى ورىنداردى: گۋمانيتارلىق كوللەجدىڭ «فينالدامىز» كومانداسى مەن «دوستىق» كومانداسى ءبولىستى. ال «ورىس ليگاسى» توبىنان باسقارۋ كوللەدجىنىڭ «بيرمينگەم» كومانداسى جەڭىمپاز دەپ تانىلىپ, سونىمەن قاتار «ۇزدىك سپيكەر», «ۇزدىك باپكەر», «ۇزدىك تورەشى» اتالىمى بويىنشا ۇزدىكتەر انىقتالدى.
وسىنداي ماڭىزدى مادەني جۇمىستارعا ۇيىتقى بولىپ جۇرگەن «اقيقات» پىكىرسايىس كلۋبى ەلوردالىق وقۋشىلار مەن ستۋدەنتتەر اراسىندا پىكىرتالاس ءوربىتۋدىڭ باستاماشىسىنا اينالۋمەن بىرگە, قالالىق, رەسپۋبليكالىق, حالىقارالىق پىكىرتالاس تۋرنيرلەرىن ۇيىمداستىرىپ ءجۇر. باستى تاقىرىبى – قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆتىڭ يدەيالارى مەن باستامالارىن جانە قازاقستان تاۋەلسىزدىگى تاريحىنىڭ وزەكتى ماسەلەلەرىن تالقىلاۋعا ارنالعان. كلۋب جۇمىسىنا قازىرگى تاڭدا ەكى مىڭنان استام بوزبالا مەن بويجەتكەن قاتىسادى.
