يلليۋستراتسيانى جاساعان Qantar
جيناققا قازاقستان, قىرعىزستان, تۇرىكمەنستان جانە وزبەكستان ەلدەرىندەگى 23 اقىننىڭ شىعارمالارى توپتاستىرىلدى. تسيفرلى جىر البومى قازاقستاندىق سۋرەتشى Qantar-دىڭ يلليۋستراتسياسىمەن بەزەندىرىلگەن. جوبانىڭ كۋراتورلارى اقىن, ادەبيەتتانۋشى اينۇر تولەۋ مەن سدۋ قاۋىمداستىرىلعان پروفەسسورى, مەديا جانە كينو زەرتتەۋشىسى مولديار ەرگەبەكوۆ.
«روزا ليۋكسەمبۋرگ قورىنىڭ دەمەۋىمەن ورتالىق ازيا ايەل اقىندارىنىڭ جيناعىن قۇراستىرىپ شىقتىق. العاشقىدا جيناقتى كىتاپ تۇرىندە شىعارۋدى ويلاعان ەدىك. بىراق ماتەريالدىق جاعدايعا بايلانىستى جيناقتىڭ ونلاين نۇسقاسىن دايىندادىق. دەسەك تە وقىرمان قاۋىم وتە جىلى قابىلدادى. سودان كەيىن ءار اقىننان ولەڭىن ءوزى وقۋىن سۇرادىق, ويتكەنى كورەرمەننىڭ وقىرمان عانا ەمەس, تىڭدارمان بولۋىن قالادىق. جالپى, پوەزيا دەسەك ەلىمىزدە, ايماقتا ەر ادامدار الدىمەن اۋىزعا ىلىگەدى. ايتپەگەندە ورتالىق ازيا ەلدەرى پوەتيكاعا وتە جاقىن حالىق جانە مۇندا جازبا نەمەسە سۋىرىپسالما جانرىنا جۇيرىك ايەل اقىندار كوپ. سوندىقتان فەستيۆال اياسىندا اقىن ايەلدەردى العا شىعارۋدى, كورسەتۋدى, تانىتۋدى ماقسات ەتتىك. مۇنداي جوبا الداعى جىلعى جوسپارلارىمىزدا جالعاسىن تابا بەرەدى», دەيدى جوبا كۋراتورى مولديار ەرگەبەكوۆ. ونىڭ ايتۋىنشا, البومنىڭ يلليۋستراتسياسىن بەلگىلى قازاقستاندىق سۋرەتشى Qantar جاساعان. سۋرەتشى ءار اقىننىڭ ەڭبەگىمەن جەكە تانىسا وتىرىپ, مازمۇندىق باعىتتا كوركەم كارتينالارمەن شەبەر ۇيلەستىرە بىلگەن.
اتالعان جوبانى ۇيلەستىرۋ ءۇشىن ايانىپ قالماي ەڭبەك ەتكەن اقىن, ادەبيەتتانۋشى اينۇر تولەۋ ۇيىمداستىرۋ جۇمىسىنىڭ قىزىعىمەن بىرگە قيىندىعى قاتار جۇرگەنىن, سونىسىمەن دە جانىنا جاقىن ەكەنىن ايتادى.
«جوباعا قاتىساتىن اقىنداردى ىرىكتەۋدى ماعان تاپسىردى. الدىمەن شىعارماشىلىق ورتا تاني بەرمەيتىن, ءمۇشايرالار مەن بايقاۋلاردا توپ جارماعان اقىنداردىڭ ولەڭىن جيناپ الدىم. سونداي ءبىر ءادىل جوبا جاساعىم كەلدى. مۇمكىن ءبىز تانىمايتىن, بىراق ولەڭىندە ايرىقشا ءبىر ءيىرىم, بولەك يدەياسى بار اقىن تاۋىپ الاتىن شىعارمىن دەپ ويلادىم. سوندىقتان بۇل جوبانىڭ ىشىندە اۋىلداعى مۇعالىم, ستۋدەنت جانە اۋدارماشى قىزدار دا بار. ولاردى ىرىكتەپ العان سوڭ, بىزگە تانىمال, ولەڭدە ءوز ورنى بار اقىن قىزداردى قوستىم. نەگە؟ سەبەبى بۇل جوبا حالىقارالىق دەڭگەيدە ءوتتى. تاجىكستان مەن وزبەكستان, قىرعىزستان مەن تۇرىكمەنستان اقىن قىزدارى ولەڭىنىڭ قاسىندا پوەتيكالىق مازمۇنى جاقسى جىرلار تۇرعانى دۇرىس. ءبىز قالاساق تا, قالاماساق تا قازاق ادەبيەتىنىڭ بۇگىنگى كوركەم ويلاۋ جۇيەسى قانداي دەگەن سۇراققا وسىنداعى ولەڭدەر جاۋاپ بەرەدى. بۇل سۇراقتى ەشكىم قويمايتىن دا شىعار. بىراق ءوزىم وسى ارەكەتىم ارقىلى ساپالى كونتەنت جاساعىم كەلدى», دەيدى اينۇر تولەۋ.
