ىلە-الاتاۋ قاتتى تۇرمىستىق قالدىقتاردى بولەك جيناۋدىڭ ينفراقۇرىلىمىن تولىققاندى جاساقتاعان قازاقستانداعى العاشقى ۇلتتىق پارك بولىپ وتىر. ەكولوگيا, گەولوگيا جانە تابيعي رەسۋرستار مينيسترلىگىنىڭ تاپسىرماسىمەن قورىق اۋماعىندا بارلىعى 31 جاڭا قالدىق الاڭدارى ورناتىلىپ, وكم وپەراتورى 225 كونتەينەر قويعان. سونداي-اق قۇرعاق جانە دىمقىل قالدىقتى ەكى بولەك سالىپ اكەتۋ ءۇشىن ەلىمىزدە بالاماسى جوق كولىكتىك تەحنيكا قۇراستىرىلدى.
«2019 جىلى ۇلتتىق پارككە 300 901 ادام كەلدى. بۇل كورسەتكىش ارتادى دەپ كۇتىلۋدە. سوندىقتان 2030 جىلعا دەيىن پارك اۋماعىنداعى قاتتى تۇرمىستىق قالدىقتاردى سۇرىپتاۋ دەڭگەيىن 85%-عا دەيىن جەتكىزۋدى جوسپارلاپ وتىرمىز. قالدىق الاڭدارى الما-اراسان, مۇزتاۋ, قيماسار, اققايىڭ, قاسكەلەڭ, اقساي, ەسىك, تۇرگەن جانە ت.ب. شاتقالداردا ورناتىلدى», – دەپ اتاپ ءوتتى «ىلە-الاتاۋ» مۇتپ باس ديرەكتورى دامير مالگەلديەۆ.
ەكولوگيا ۆيتسە-ءمينيسترى ەرلان نىسانباەۆ ۇلتتىق پارك اۋماعىندا 30 «ەكو-سەرگەك» كامەراسى ورناتىلاتىنىن حابارلادى. بۇل جوبا جەرگىلىكتى اكىمدىكپەن بىرگە جۇزەگە اسىرىلماق.
– ءبىز ازاماتتارىمىزدىڭ تابيعاتتا وزدەرىن ۇستاۋ مادەنيەتىنە قاراپ, وسىنداي شارالار قابىلداۋعا ءماجبۇرمىز. كەلۋشىلەر ءجيى قوقىس قالدىرادى, تەمەكى تۇقىلىن تاستايدى, جاققان وتتى وشىرمەي, ورتكە سەبەپكەر بولادى. ۆانداليزم فاكتىلەرى دە كەزدەسەدى. ارينە, «ەكو-سەرگەكتى» ەنگىزۋدەگى باستى ماقساتىمىز ايىپپۇل سالۋ ەمەس, تابيعات انانى قورعاۋ, ءتۇسىندىرۋ جۇمىستارىن جۇرگىزۋ – دەدى ەرلان نىسانباەۆ.
بەينەباقىلاۋ قۇرىلعىلارى تەك تۋريستەردى تارتىپكە سالىپ قانا قويماي, ءورت شىققان كەزدە جەدەل دابىل قاعىپ, جىلدام ارەكەت ەتۋگە, براكونەرلەردى انىقتاۋعا سەپتەسپەك. ۆيتسە-ءمينيستردىڭ سوزىنشە, قوقىستى سۇرىپتاپ تاستاۋ الاڭدارى مەن «ەكو-سەرگەك» تاجىريبەسىن بىرتىندەپ باسقا ۇلتتىق پاركتەرگە دە ەنگىزۋ جوسپاردا بار. ايتىلعان ۇسىنىستار قوعامدىق كەڭەس مۇشەلەرى تاراپىنان تولىق قولداۋ تاپتى. تۇرگەن, الما-اراسان شاتقالدارىنداعى ەكوتۋريزمدىك ينفراقۇرىلىمداردى جەتىلدىرۋ, ەكولوگيالىق ءبىلىم ماسەلەسى جيىننىڭ وزەگىنە اينالدى.
الماتى
