تۇركىستان وبلىسى جەتىساي اپب-ءنىڭ كەزەكشى بولىمىنە ويىن زالدارىنىڭ ءبىرىنىڭ وپەراتورىن توناپ كەتكەنى تۋرالى حابارلاما كەلىپ ءتۇستى. وقيعا ورنىنا بىردەن پوليتسيانىڭ جەدەل-تەرگەۋ توبى شىقتى. پوليتسەيلەر كاسسادا تۇرعان قىزعا مەكەمەگە كەلۋشى شابۋىل جاساپ, 170 مىڭ تەڭگەسىن كۇشپەن تارتىپ الىپ, بەلگىسىز باعىتتا جاسىرىنعانىن انىقتاعان. وبلىستىق پوليتسيا دەپارتامەنتى ءباسپاسوز قىزمەتىنىڭ حابارلاۋىنشا, اتالعان وقيعا اۋداندىق پوليتسيا ءبولىمىنىڭ سدتبت-نە قر قك-ءنىڭ 191-بابى «توناۋ» بويىنشا تىركەلگەن. كۇدىكتىنى ىزدەۋگە كىرىسكەن جەدەل ۋاكىلدەر بەينەباقىلاۋ كامەرالارىن تەكسەرىپ, جاقىن ماڭداعى كوشەلەردى, قوناقۇيلەردى جانە باسقا دا بارۋى, مۇمكىن جەرلەردى قاراپ شىقتى. وسىلايشا 10 كۇنگە سوزىلعان جەدەل-ىزدەستىرۋ ءىس-شارالارىنىڭ ناتيجەسىندە اۋدان پوليتسەيلەرى كۇدىكتىنى شىمكەنت قالاسىنداعى جالدامالى پاتەرلەردىڭ بىرىنەن ۇستادى. ول بۇرىن سوتتى بولعان جەرگىلىكتى تۇرعىن بولىپ شىقتى. ايعاقتى زات رەتىندە اقشا الىنىپ, زاڭدى يەسىنە قايتارىلدى.
قازىرگى ۋاقىتتا توناۋ فاكتىسى بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتى قاماۋعا الىنعان. پوليتسيا قىزمەتكەرلەرى ۇستالعان ادامنىڭ باسقا دا وسىنداي قىلمىستارعا قاتىسى بار-جوعىن انىقتاۋدا.
جەتىساي اۋدانى پوليتسيا ءبولىمىنىڭ قىزمەتكەرلەرى وڭىردەگى تاعى ءبىر قىلمىستى ءىستىڭ اشىلۋىنا ۇلەس قوستى. تۇركىستان وبلىسىندا تۇرعىندارعا 1,5 ملرد-قا جۋىق شىعىن كەلتىرگەن «Indigo-24 Evolution» قارجى پيراميداسىن ۇيىمداستىرعان 12 كۇدىكتى ۇستالىپ, قاماۋعا الىندى. ەسكە سالا كەتەيىك, بيىلعى جازدا جەدەل-ىزدەستىرۋ ءىس-شارالارى بارىسىندا اۋداندىق پوليتسيا ءبولىمىنىڭ قىزمەتكەرلەرى جەتىساي قالاسىنداعى «Indigo-24 Evolution» قارجى پيراميداسىنىڭ قىزمەتىن توقتاتقان بولاتىن. بۇل جايت قر قك-ءنىڭ 217-بابى 3-بولىگى «قارجىلىق (ينۆەستيتسيالىق) پيراميدانى قۇرۋ جانە وعان باسشىلىق ەتۋ» بويىنشا تىركەلدى. ءبىر اي وتكەننەن سوڭ جابىرلەنۋشىلەر سانى 300-دەن استى. وسىدان سوڭ پوليتسيا قىزمەتكەرلەرى اتالعان ىسكە قاتىسى بار باسقا دا كۇدىكتىلەردى ۇستاۋ ءۇشىن, ءتۇر-تۇلعاسىن انىقتاپ, ىزدەرىنە ءتۇستى. جەتىساي اپب-عا شىمكەنت قالاسىنان قارجىلىق پيراميدا ۇيىمداستىردى دەگەن كۇدىكپەن اۋدان تۇرعىنى جەتكىزىلدى. سونداي-اق ونىڭ ەكى سىبايلاسى, ماقتاارال اۋدانىنىڭ تۇرعىندارى دا ۇستالدى. تەرگەۋ بارىسىندا كەڭسەگە ءتىنتۋ جۇرگىزىلىپ, قۇجاتتار, جابدىقتار, كومپيۋتەرلەر جانە باسقا دا ايعاقتى زاتتار تاركىلەندى. اتقارىلعان تياناقتى جۇمىستاردىڭ ناتيجەسىندە العاشىندا 5 كۇدىكتى, كەيىننەن 7 كۇدىكتى ۇستالدى. ولار جەتىساي, شاردارا, ماقتاارال, سارىاعاش اۋداندارى تۇرعىندارى كوپشىلىگىنىڭ اقشاسىن قايتارماعان.
بۇگىندە گەنەرال-مايور قايرات دالبەكوۆ باسقارىپ وتىرعان تۇركىستان وبلىسى پوليتسيا دەپارتامەنتىنىڭ بىلىكتى دەگەن تەرگەۋشىلەرىنەن تەرگەۋ توبى قۇرىلىپ, سوتقا دەيىنگى تەرگەپ-تەكسەرۋ جۇمىستارى جۇرگىزىلۋدە. «بەلگىلى بولعان «Indigo-24 Evolution» قارجى پيراميداسىنىڭ 2015 جىلى الماتى قالاسىندا نەگىزى قالانعان. ونىڭ نەگىزىن قالاۋشى مەن ۇيىمداستىرۋشىسى رەتىندە تۋىس كۇدىكتىلەر ۇستالدى. ولاردىڭ تۇركىستان وبلىسىندا بىرنەشە ازاماتتى ديرەكتور رەتىندە تاعايىنداپ, ءوڭىر تۇرعىندارىنان 1 ملن تەڭگەدەن اقشا الىپ, ەسەلەپ قايتارامىز دەگەن قۇرعاق ۋادەمەن ءوز الاياقتىق ىستەرىن جۇزەگە اسىرعان. بۇگىنگى تاڭدا جابىرلەنۋشىلەر سانى 1500-دەن استى. ولاردىڭ بارلىعىنىڭ ارىزدارى زاڭدى تۇردە تىركەلگەن. ۇستالعان 12 كۇدىكتى دە سوتتىڭ سانكتسياسىمەن قاماۋعا الىندى. بۇگىندە بەلگىلى بولعان شىعىن كولەمى 1 ملرد-تان استام تەڭگەنى قۇرايدى. سونىمەن قاتار ارىزدانۋشىلار مەن كۇدىكتىلەر سانى ارتۋى, سوعان سايكەس شىعىن كولەمى دە ءوسۋى مۇمكىن», دەيدى وبلىستىق پوليتسيا دەپارتامەنتى تەرگەۋ باسقارماسىنىڭ باستىعى, پوليتسيا پولكوۆنيگى نۇرماحان جالعاسوۆ.
وسى ورايدا تۇركىستان وبلىسىنىڭ پوليتسەيلەرى تۇرعىنداردى اقشانى ەسەلەپ بەرەمىن دەگەن ادامداردىڭ ءسوزىن ابدەن سارالاپ, وي ەلەگىنەن وتكىزۋگە, الاياقتاردان ساق بولۋعا شاقىرادى. «بىرىنشىدەن, ولاردىڭ بەرگەن اقپارلارىن تولىق زەرتتەپ الىڭىز. ەكىنشىدەن, سالىمنىڭ كىرىستىلىگىنە مۇقيات ءمان بەرىڭىز. نەعۇرلىم جوعارى بولسا, ول سىزگە كۇمان تۋدىرۋى ءتيىس. سەبەبى كەز كەلگەن اقشاڭىزدى كوبەيتىپ بەرەمىن دەگەن بانكتىڭ ءوزى بىردەن ءسىزدىڭ سالىمىڭىزدى 50-100 پايىزعا وسىرمەيدى», دەيدى پوليتسيا قىزمەتكەرلەرى.
تۇركىستان وبلىسى
