كەڭەستىڭ جۇمىسىنا ءبىلىم جانە سپورت باسقارمالارىنىڭ, ەلەكتروندى دەنساۋلىق ساقتاۋدىڭ رەسپۋبليكالىق ورتالىعى وڭىرلىك فيليالدارىنىڭ, سق «فارماتسيانىڭ», مەملەكەتتىك جانە جەكە مەديتسينالىق مەكەمەلەردىڭ باسشىلارى قاتىستى.
ەلەكتروندى دەنساۋلىق ساقتاۋدىڭ رەسپۋبليكالىق ورتالىعى فيليالىنىڭ ديرەكتورى گ.ىسقاقوۆانىڭ ايتۋىنشا, 9 ايدىڭ قورىتىندىسى بويىنشا دەنساۋلىق ساقتاۋدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىنىڭ نەگىزگى كورسەتكىشتەرى جۇزەگە استى.
اتاپ ايتقاندا, نارەستەلەر ءولىمىنىڭ كوەففيتسيەنتى 1 مىڭ ءتىرى تۋىلعاندارعا شاققاندا 7,48-ءدى قۇرادى. 100 مىڭ ادامعا شاققاندا 25,3 وقيعانى قۇرايتىن تۋبەركۋلەز اۋرۋى 30%-عا تومەندەدى. جول-كولىك وقيعالارى سالدارىنان بولاتىن ءولىم-ءجىتىم ەكى ەسەگە جۋىق قىسقارىپ, 100 مىڭ تۇرعىنعا شاققاندا 5,83 وقيعانى قۇرادى.
«جالپى العاندا, الماتىدا ناۋقاستاردىڭ مەديتسينالىق كومەكتىڭ ساپاسىنا قاناعاتتانۋى 51,6%, بۇل 2019 جىلدىڭ وسى كەزەڭىمەن سالىستىرعاندا 5,5% -عا جوعارى», - دەپ اتاپ ءوتتى گ.ىسقاقوۆا. ول بۇقارانى دەنە شىنىقتىرۋمەن جانە سپورتپەن جاپپاي قامتۋ, انا ءولىمىنىڭ دەڭگەيىن تومەندەتۋ, مەديتسينالىق مەكەمەلەردىڭ ماتەريالدىق-تەحنيكالىق بازالارىن جاقسارتۋ ءۇشىن جۇمىستى بارىنشا كۇشەيتۋ قاجەتتىگىن اتاپ ءوتتى.
الماتىدا حالىققا 74 مەملەكەتتىك مەديتسينالىق ۇيىم, 13 رەسپۋبليكالىق جانە امسق-مەن كەلىسىمى بويىنشا 89 جەكە ۇيىمدار مەديتسينالىق قىزمەتتى كورسەتەدى. بۇلاردا 8319 دارىگەر مەن 14613 ورتا مەديتسينالىق قىزمەتكەر جۇمىس ىستەيدى.
ءوز كەزەگىندە امسق فيليالىنىڭ باسشىسى ت. ابىلداەۆ قالالىق دەنساۋلىق ساقتاۋ سۋبەكتىلەرى مەن قور اراسىنداعى كەلىسىمشارتتىق مىندەتتەمەلەردىڭ ورىندالعانى تۋرالى حابارلادى. الماتىنىڭ قالالىق دەنساۋلىق باسقارماسى باستىعىنىڭ مىندەتىن اتقارۋشى ج. مادەەۆا باس دارىگەرلەردىڭ ناۋقاستاردى ەرتە انىقتاۋ مەن ەمدەۋدەگى جۇمىستارىن باعالاۋدىڭ ناتيجەلەرى جانە مەديتسينالىق مەكەمەلەردى كۆي پاندەمياسىنىڭ ەكىنشى تولقىنىنا دايىنداۋ بويىنشا قابىلدانعان شارالار تۋرالى باياندادى.
الماتى اكىمى باقىتجان ساعىنتاەۆ اۋرۋحانالار مەن ەمحانالاردى پاندەميامەن كۇرەستە جۇمىس ىستەۋگە دايىنداۋ جونىندەگى ءىس-شارالار جوسپارىنىڭ ورىندالۋىن باقىلاۋدى كۇشەيتۋدى تاپسىردى. ۆيرۋستىڭ تارالۋىن بولدىرماۋ ءۇشىن سانيتارلىق-ەپيدەميولوگيالىق تالاپتاردىڭ ساقتالۋىنا جانە پەرسونال مەن ناۋقاستاردىڭ قاۋىپسىزدىگىن قامتاماسىز ەتۋگە ەرەكشە نازار اۋدارۋ قاجەت. سونىمەن بىرگە, قالا اكىمى مەديتسينالىق مەكەمەلەردىڭ ءبىرىنشى باسشىلارىنىڭ بىلىكتىلىگىن ارتتىرۋ, مەنەدجەرلىك شەبەرلىك پەن تسيفرلىق ساۋاتتىلىقتى دامىتۋ قاجەتتىلىگىنە نازار اۋداردى.
