ول وڭىرىمىزدە جۇزەگە اسىرىلاتىن ورتاق جوبالار جايىن پىسىقتاۋ ءۇشىن كەلگەن.
نيدەرلاندى ەلىنىڭ «Farm Frites Beheer» كومپانياسى جەرگىلىكتى «ك-اگرو حولدينگ» جشس-مەن بىرلەسىپ شۋ اۋدانىندا فري كارتوبىن ءوندىرۋ زاۋىتىن سالۋدى جوسپارلاۋدا. جوبا قۇنى 145 ملن دوللارعا باعالانعان. جۇزەگە اسقان جاعدايدا 240 جاڭا جۇمىس ورنى قۇرىلماق. جوسپار بويىنشا زاۋىت 2023 جىلى قولدانىسقا بەرىلەدى دەپ كۇتىلۋدە.
ەلشىنى جىلى شىرايمەن قارسى العان ايماق باسشىسى ينۆەستورلارعا قاجەتتى كومەكتى ايامايتىنىن جەتكىزدى. قازىرگى ۋاقىتتا بولاشاق زاۋىتتىڭ ورنالاساتىن جەرى بەلگىلەنىپ قويعان. وعان قاجەتتى ينفراقۇرىلىم دا تارتىلعان.
- قازىر ەڭ باستى ماسەلە قۇرىلىستى جەدەل باستاۋ كەرەك. ۋاقىت ءوتىپ بارادى. كاسىپورىن بىزگە كەرەك. ونىڭ شىعاراتىن ءونىمى ەكسپورتتالاتىن بولادى,- دەدى بەردىبەك ساپارباەۆ.
- قۇرىلىستىڭ سوزبالاڭعا سالىنعانى ءبىزدىڭ تاراپقا دا ءتيىمسىز. قانداي ماسەلەلەر بار ەكەنىن ءبىلۋ ءۇشىن ارنايى كەلىپ وتىرمىن. ءسىزدىڭ سوزىڭىزدەن تۇيگەنىم, ءبىزدىڭ ماقساتىمىز ءبىر,-دەدى اندرە كارتەنس.
«ك-اگرو حولدينگ» ديرەكتورلار كەڭەسى توراعاسىنىڭ كەڭەسشىسى جەڭىس وسەربايدىڭ ايتۋىنشا, ينۆەستورلار زاۋىت سالماس بۇرىن 65 گا جەرگە كارتوپ ەگىپ, ونىمدىلىك دەڭگەيىن باقىلاۋعا نيەتتى.
جۇزدەسۋگە اۋىل شارۋاشىلىعى ءمينيسترىنىڭ ورىنباسارى نۇربەك دايىربەكوۆ تە قاتىستى. ورتاق جوبانىڭ كەلەشەگى زور ەكەنىن اتاپ وتكەن ۆيتسە-مينيستر نيدەرلاند تاراپىمەن وزگە دە جوبالاردى بىرلەسە جۇزەگە اسىرۋعا بولاتىنىن تىلگە تيەك ەتتى.
- ءبىزدىڭ وبلىس اگرارلى-يندۋستريالدى ايماق بولىپ سانالادى. كوكونىس, جەمىس-جيدەك, اسىرەسە تاۋلى ايماق بولعان سوڭ الما جاقسى وسەدى. جەرىمىز قۇنارلى. قازىرگى جوبانى جۇزەگە اسىرىپ بولعان سوڭ وزگە دە ۇسىنىستار ازىرلەيمىز. ءوزارا ارىپتەستىك قاتىناس اۋقىمىن كەڭەيتۋگە دايىنبىز. ينۆەستورلاردىڭ كوبەيۋىنە بەيىلمىز,- دەپ تۇيىندەدى بەردىبەك ساپارباەۆ.
