الدىڭعى اقپاراتتا حابارلاعانىمىزداي, مادەنيەت جانە سپورت ءمينيسترى اقتوتى رايىمقۇلوۆا ماجىلىسمەندەر الدىندا قازاقستاننىڭ كەيبىر زاڭنامالىق اكتىسىنە تۋريستىك قىزمەت ماسەلەسى بويىنشا وزگەرىستەر مەن تولىقتىرۋ ەنگىزۋ تۋرالى زاڭ جوباسىن قورعاعان بولاتىن.
زاڭ جوباسى بويىنشا ءماجىلىس توراعاسى نۇرلان نىعماتۋللين پىكىر ءبىلدىردى.
"زاڭ جوباسى بويىنشا تۋروپەراتورلىق جۇمىستى ءۇش تۇرگە ءبولۋ – سىزدەرگە نە ءۇشىن كەرەك بولعانىن اشىق ايتۋ كەرەك. ول ەڭ الدىمەن تۋريستەردى سىرتقا شىعاراتىن تۋروپەراتورلاردىڭ سانىن انىقتاۋ ءۇشىن كەرەك بولدى. سولاي عوي!؟" دەپ سۇرادى نۇرلان نىعماتۋلين مينيستردەن ءماجىلىس وتىرىسىندا.
اقتوتى رايىمقۇلوۆا بۇعان دەيىن شەتەلگە شىعاتىن قازاقستاندىق تۋريستەرگە قىزمەت كورسەتەتىن تۋروپەراتورلاردىڭ كەيدە جابىلىپ قالىپ, مۇنىڭ قيىنشىلىعىن قاراپايىم تۋريستەر كورگەنىن جەتكىزدى. سوندىقتان زاڭ جوباسى ارقىلى تۋروپەراتورلار ارنايى ليتسەنزيالاۋدان وتكىزىلىپ, سىرتقى تۋريزم سالاسىندا ەڭبەك ەتەتىن تۋرفيرمالار سانىن ايقىنداۋ كوزدەلگەن. ءماجىلىس توراعاسى ءمينيستردىڭ بۇل ۇسىنىسىمەن كەلىسپەيتىنىن ءمالىم ەتتى.
"مەن بۇل رەتتە "اتامەكەن" پالاتاسىنىڭ پوزيتسياسىن قولدايمىن. سىرتقى تۋريست "بۇركىت" جۇيەسىنەن باستاپ شەكارا قىزمەتىنە دەيىن قانشاما تەكسەرىستەن وتەدى. ءبارى دە باقىلانادى. تۋروپەراتورلاردىڭ سانىن ايقىنداۋ سىزدەرگە ءبىر ماقسات ءۇشىن عانا كەرەك بولدى. ول – تۋروپەراتورلاردى "تۋريستىك قامقور" قورىنا جارنا اۋدارتۋعا مىندەتتەۋ. بارى وسى! مينيستر حانىم, بيزنەستى قورعايمىز دەۋدىڭ قاجەتى جوق. "اتامەكەننىڭ" بۇل ماسەلەنى ۋاقتىلى كوتەرگەنى قانداي جاقسى بولعان. ادەمى ءسوزدىڭ ارتىندا مۇلدە باسقا ماقسات تۇر. مىناداي جوعارى مىنبەردە بيزنەستى قورعايمىز دەپ ۇرانداپ, تۋريستىك كومپانيالارعا كەرىسىنشە قىسىم كورسەتۋگە تىرىسۋدىڭ قاجەتى جوق", دەدى نۇرلان نىعماتۋللين.
