بىلتىرعى جىلعا جوعارى باعا

استانادا بوكس فەدەراتسياسىنىڭ وتكەن جىلعى جۇمىس قورىتىندىسى مەن 2012 جىلعا دەيىن سپورتتىڭ وسى ءتۇرىن دامىتۋ ماسەلەسىن تالقىلاۋعا ارنالعان كەڭەس ءوتتى. كەڭەستە وسى ماسەلەلەردەن باس­قا قازاقستاننىڭ ۇلتتىق, جاستار جانە ايەلدەر قۇراماسىنىڭ الداعى جارىستارى تۋرالى كەڭىرەك مالىمەت بەرىلدى. مۇندا فەدەراتسيانىڭ اتقارۋشى ديرەكتورى دانيار ابىلعازين مەن حالىقارالىق باي­لانىستار جونىندەگى ۆيتسە-پرەزي­دەنتى جانبولات سارسەنوۆ, ۇلتتىق قۇرامانىڭ باس باپكەرى مىرزاعالي ايتجانوۆ, مەملەكەتتىك باپكەر بولات ابدراحمانوۆ پەن ەلىمىزدىڭ ىشكى سپورتتىق شارالارىن وتكىزۋ جانە بۇكىلالەمدىك بوكس سەرياسىنا قاتىسۋى جونىندەگى ۇيلەستىرۋشى بولات مانكەنوۆ ءسوز سويلەپ, فەدە­راتسيا جۇمىسىنا, ونىڭ بوكستى دامىتۋداعى الداعى ماقسات-مىندەت­تەرى جونىندە ءوز پىكىرلەرىن ءبىلدىردى. كەڭەستە ءسوز سويلەۋشىلەر وتكەن جىلدان باستاپ فەدەراتسيا باسشىسى بولىپ تيمۋر ق ۇلىباەۆ كەلگەلى بەرى ەلىمىزدىڭ بارلىق وڭىرلەرىندە سپورت­تىڭ وسى ءتۇرىن دامىتۋدىڭ جاڭا جوبا-جوسپارلارى جاسالىنا باس­تا­عانىن, ونىڭ ىشىندە وبلىستىق فە­دە­راتسيالاردىڭ باسشىلىعىنا كاسىپ­كەر ازاماتتاردىڭ شاقىرىل­عانىن, قازىر ولاردىڭ قولداۋ كور­سەتۋىمەن بوكسشىلار مەن باپكەر­لەردىڭ جالاقىسى بىرنەشە ەسەگە وسكەنىن, ال جاتتىعۋ زالدارى بولسا قازىرگى زامان تالاپتارىنا ساي جابدىقتالىپ جاتقاندىعىن اتاپ ءوتتى. سونىمەن بىرگە ولار بۇگىندە بىلعارى قولعاپ شەبەرلەرىنە ال­ماتى وبلىسىنىڭ “اقبۇلاق” سپورت كەشەنىندە, الماتىنىڭ جانىنداعى نوۆوالەكسەەۆ كەنتى مەن اقمولا وبلىسى, ششۋچە قالا­سىنداعى “جاق­سى” سپورت ورداسىندا جاتتى­عۋ­عا مۇمكىندىك جاسالعانىن, الداعى كەزدە ءدال وسىنداي زالدار­دىڭ استانادا دا سالىناتىنىن اتاپ ايتتى. كەڭەستە كەلەسى قارالعان ءبىر ماسەلە, بوكسشىلار مەن تورەشى­لەردىڭ جۇ­مى­سى جايىندا بولدى. مۇندا ۇلت­تىق قۇرامانىڭ باس باپكەرى باپ­كەرلەر مەن تورەشى­لەرمەن جۇمىس ىستەۋدە فەدەراتسيا­نىڭ ۆيتسە-پرەزي­دەنتتەرى يۋري تسحاي مەن سەرىك قوناقباەۆتىڭ جۇمىسىنا ريزاشى­لى­عىن بىلدىرە­تىنىن جەتكىزدى. ونىڭ ايتۋىنشا, قازىر باپكەرلەر مەن تورەشىلەردى ىنتالاندىرۋ ءۇشىن ولارعا ماتە­ريالدىق قولداۋ كورسەتىلۋدە. سو­نىڭ ناتيجەسىندە ولار ءوز جۇمى­سى­نا جاۋاپكەرشىلىك­پەن قاراۋدا. وسى­عان بايلانىستى ولاردى شەتەلدەردە تاجىريبە الماسۋ, سەمينارلار مەن وقۋلارعا جىبەرۋ ماسەلەسى قاراس­تىرىلۋدا. كەڭەستە وسىدان كەيىن بوكسشى­لاردى عىلىمي تۇرعىدان دايىنداۋ ماسەلەسى قارالدى. بۇل ماسەلە كوپتەن بەرى ايتىلىپ جۇرگەنى بەلگىلى. دەگەنمەن, سوڭعى كەزدەرى ول ماسەلە قايتا قولعا الىنىپ, ءتيىستى دەڭ­گەيدە شەشىلۋدە. ماسەلەن, فەدەرا­­تسيانىڭ اتقارۋشى ديرەك­تورى دانيار ابىلعازيننىڭ ايتۋىن­شا, بۇگىندە بوكسشىلاردى جاقسى دايىنداۋ ماقساتىندا قۇرامىنا دارىگەرلەر, پسيحولوگتار, فيزيولوگ­تار مەن بيوحيميكتەر كىرەتىن ار­نايى توپ قۇرىلىپ وتىر. بۇل توپ­تىڭ مىندەتى – سپورتشىلارعا جەكە كوزقاراسپەن قاراپ, ولاردىڭ دايىن­دى­عىن ارقاشان نازاردا ۇستاۋ. كەلەسى قارال­عان ماسەلە, جاستار, قىزدار جانە ايەلدەر قۇرامالارى­نىڭ بىلتىردان بەرگى ناتيجەلەرىن تالقىلاپ, ولاردى الداعى جارىس­تارعا دايىنداۋ جا­يىن­دا بولدى. وسى ماسەلە بويىن­شا ءسوز العان مەم­لەكەتتىك باپكەر بولات ابدراح­مانوۆ قازىر جاستار مەن ايەلدەر كوماندا­لارى فەدەرا­تسيا تاراپىنان بارلىق قولداۋعا يە بولىپ وتىر­عاندارىن, وسى كۇندەرى ايەلدەر قۇرا­ماسى مامىر ايىندا استانادا وتەتىن ازيا چەمپيونا­تىنا, ال جاس­تارى­مىز كەلەسى جىلى ەلوردادا جالاۋىن كوتە­رەتىن الەم چەمپيونا­تىنا دايىندا­لىپ جات­قان­دارىنان حاباردار ەتتى. كەڭەس سوڭىندا وسىلاردان باسقا ەلىمىزدە بىرنەشە جارىستاردى وتكىزۋ جوسپارلانىپ وتىرعانى حابار­لاندى. ونىڭ ىشىندە ازيا كونفەدە­راتسياسى بويىنشا وتكىزىلەتىن 21 ءتۋرنيردىڭ 12-ءىن قازاقستاندا ۇيىمداستىرۋ­ ماسەلەسى بار. سونى­مەن بىرگە جيىن­دا وسى جازدا استانادا پرەزيدەنت ن.ءا.نازار­باەۆ­تىڭ كۋبوگى جولىن­داعى تۋرنير مەن بۇكىلالەمدىك بوكس سەرياسى بويىنشا ەلىمىزدىڭ 12 كومانداسى قاتىساتىن جارىستى وتكىزۋ ماسەلەسى قارالدى. بۇل باسەكە جونىندە ءسوز العان بۇكىلالەمدىك بوكس سەرياسىنا قاتىسۋى جونىندەگى ۇيلەستىرۋشى بولات مانكەنوۆ جەكپە-جەكتىڭ ارقاي­سىسىن 3 مينوتتەن 5 راۋند بويىنشا وتكىزۋ جوسپارلانىپ وتىرعانىن, ونىڭ جەڭىمپازدارى وليم­پياداعا جولداما الۋعا ءمۇم­كىندىكتەرى بولاتىنىن اتاپ ايتتى. داستان كەنجالين.