ايتۋلى جارىستىڭ جالپىكوماندالىق ەسەبىندە قازاقستان بەسىنشى ورىندى يەلەندى. ءبىزدىڭ سپورتشىلار 76 جۇلدەگە (18 التىن+23 كۇمىس+38 قولا) يەلىك ەتتى. كوش باسىندا – قىتاي قۇراماسى. ءوز جەرىندە وتكەن بايراقتى باسەكەدە اسپاناستى ەلىنىڭ وكىلدەرى 416 جۇلدە (119+119+98) ولجالادى. بۇل – ازيا ويىندارىنىڭ رەكوردتىق كورسەتكىشى! ەكىنشى ورىندى وڭتۇستىك كورەيانىڭ وعلاندارى ەنشىلەدى. ولاردىڭ قورجىنىنا 232 مەدال (76+65+91) ءتۇستى. ءۇشىنشى ساتىعا جاپونيانىڭ جامپوزدارى جايعاستى. كۇنشىعىس ەلىنىڭ ورەندەرى 216 جۇلدەنى (48+74+94) يەلەندى. ءتورتىنشى ورىندا – يران. پارسى ەلى سپورتشىلارىنىڭ وتانداستارىمىزدان جۇلدەلەرى الدەقايدا از بولعانىمەن, مەدالدارىنىڭ ساپاسى جاعىنان الدىمىزدى وراپ كەتتى. بۇل جارىستا ولار 59 مارتە (20+14+25) جەڭىس تۇعىرىنا كوتەرىلدى. سونداي-اق ءۇندىستان (14+17+33), تايپەي (13+16+38), وزبەكستان (11+22+23), تايلاند (11+9+32) جانە مالايزيا (9+18+14) قۇرامالارى وزىق وندىقتىڭ قاتارىنا قوسىلدى.
XVI جازعى ازيا ويىندارىندا ونەر كورسەتكەن جەرلەستەرىمىزدىڭ اراسىنان ەڭ ۇزدىك كورسەتكىشكە جەڭىل اتلەتتەر قول جەتكىزدى. «سپورت پاديشاسى» وكىلدەرى 4 التىن, 4 كۇمىس جانە 3 قولانى ولجالادى. بارلىعى – 11 جۇلدە. ءبىزدىڭ سپورتشىلاردىڭ اراسىندا دميتري كارپوۆ (ونسايىس), ولگا رىپاكوۆا ء(ۇش قارعىپ سەكىرۋ), مارگاريتا ماتسكو (800 مەترگە جۇگىرۋ) جانە ولگا تەرەشكوۆانىڭ (400 مەترگە جۇگىرۋ) تۇعىرى بيىك بولدى. اۋىر اتلەتتەرمىز دە وزدەرىنىڭ مىقتىلىعىن مويىنداتتى. زىلتەمىرشىلەر 9 مارتە (3+2+4) جەڭىس تۇعىرىنا كوتەرىلدى. باس جۇلدە مايا مانەزا (63 كيلو), سۆەتلانا پودوبەدوۆا (75 كيلو) جانە يليا يلينگە (94 كيلو) بۇيىردى.
جەكەلەگەن سپورتشىلار جايىندا ايتار بولساق, كوركەم گيمناسشى اننا اليابەۆا, گرەك-ريم كۇرەسى شەبەرى نۇرماحان تىناليەۆ, بوكسشىلار دانيار ەلەۋسىنوۆ پەن سەرىك ساپيەۆ, كاراتەشىلەر دارحان ءاسادىلوۆ پەن رينات ساعىندىقوۆ جانە ايەلدەر كۇرەسىنىڭ وكىلى ەلەنا شالىگينا سىندى مىقتىلار قارسىلاس شاق كەلتىرمەي, التىن تۇعىردان قول بۇلعادى. سونىمەن قاتار رەگبيدەن (ايەلدەر), سۋ دوبىنان (ەرلەر), كوركەم گيمناستيكادان جانە نىسانا كوزدەۋدەن (ايەلدەر, 50 مەتر, تاپانشا) وتكەن كوماندالىق سايىستاردا باس جۇلدەنى قازاقستاندىقتار جەڭىپ الدى.
