مەموريالدىڭ اشىلۋ سالتاناتىنا قۇقىق قورعاۋ سالاسىنىڭ ارداگەرلەرى مەن مارقۇمنىڭ تۋىستارى قاتىستى. قازاقستان پوليتسياسىنىڭ قالىپتاسۋى مەن دامۋىنا, قىلمىسپەن كۇرەسكە جانە قوعامدىق ءتارتىپتى ساقتاۋعا قوماقتى ۇلەس قوسقان رۇستەم ەسىمحان ۇلى ەلىمىزدىڭ ءار تۇكپىرىندە لاۋازىمدى قىزمەت اتقارىپ جۇرگەن قۇقىق قورعاۋ جۇيەسىنىڭ قانشاما بۋىنىن تاربيەلەپ شىعاردى. قۇرمەتتى ەڭبەك دەمالىسىندا جۇرسە دە قوعامدىق ومىرگە بەلسەنە ارالاسىپ, ءتارتىپ ساقشىلارىنىڭ جاڭا بۋىنىن پاتريوتتىق رۋحتا تاربيەلەۋ, ۇرپاقتار ساباقتاستىعىن جالعاۋ ىسىنە قاجىر-قايراتىن ارنادى. بۇل تاقتايشا تاعىلىمدى تۇلعانىڭ قايراتكەرلىك جولىن جاس ۇرپاققا ۇلگى ەتۋ ماقساتىندا ورناتىلدى, دەيدى جيىلعاندار.
– ەڭبەك جولىن قاراپايىم تەرگەۋشىدەن باستاعان ادىلەت گەنەرال-مايورى ىشكى ىستەر ءمينيسترىنىڭ ءبىرىنشى ورىنباسارىنا دەيىنگى لاۋازىمدى قىزمەتتەردى ساتى-ساتىسىمەن العاۋسىز اتقاردى. گەنەرال بولۋ ءار سولداتتىڭ ارمانى بولعانىمەن, مىڭنىڭ ءبىرىنىڭ عانا ماڭدايىنا بۇيىراتىن باق. رۇستەم قايداروۆ نەگىزىن قالاپ, ون توعىز جىل بويى باسقارعان «گەنەرالدار كەڭەسى» قاۋىپسىزدىك سالاسىنداعى بارلىق قۇرىلىمدارعا باعىت سىلتەيتىن, اقىل-كەڭەسىن بەرەتىن جولباسشى ۇجىم بولدى دەسەك قاتەلەسپەيمىز. اتالعان قوعامدىق بىرلەستىك تمد ەلدەرى بويىنشا تۇڭعىش رەت ءبىزدىڭ ەلىمىزدە قۇرىلىپ, تاتۋلىق تامىرىنىڭ تەرەڭگە تامىر جايۋىنا سەپ بولدى. ءتۇبى ءبىر باۋىرلاس حالىقتاردى دا ىنتىماق پەن بىرلىككە ۇيىستىردى. ەلىم دەپ وتكەن ەردىڭ ەسىمىن ءتالىمدى ۇرپاق ماڭگى الديلەپ وتۋگە ءتيىس, – دەيدى الماتى قالاسى اكىمى اپپاراتىنىڭ باسشىسى تالعات سارسەنباەۆ.
2019 جىلدىڭ اياقتالۋىنا ساناۋلى كۇندەر قالعاندا الماتىدان جەتكەن اۋىر حابار كۇللى قازاق جۇرتىنىڭ قابىرعاسىن قايىستىرىپ كەتكەن ەدى. الاتاۋدان ارقا توسىنە بەت العان الىپ ۇشاق اۋەگە كوتەرىلە بەرە توسىن اپاتقا ۇشىراپ, ون ەكى وتانداسىمىز وپات بولدى. تۇتاس ەلدىڭ كوڭىلىنە تۇمان ورناتىپ, ۇلتتىق ازا تۇتۋ كۇنىن تۋىنداتقان قايعىلى جاعدايدان قازاقستان «گەنەرالدار-كەڭەسىنىڭ» توراعاسى رۇستەم قايداروۆ كوز جۇمعان بولاتىن.
الماتى
