شىمكەنت قالالىق دەنساۋلىق ساقتاۋ باسقارماسىنىڭ باسشىسى باقىتجان ءپوزيلوۆتىڭ دەرەكتەرى بويىنشا, اۋرۋحانالاردا ناۋقاستارعا ارنالعان 1 060 توسەكتىك ورىننىڭ 868-ءى بوس تۇر. مەديتسينالىق مەكەمەلەردە 192 ناۋقاس ەم قابىلداۋدا. قازىرگى تاڭدا قالا تۇرعىندارىنا قىزمەت كورسەتەتىن 9 پتر-زەرتحاناسى جۇمىس ىستەۋدە. ولار كۇنىنە 3 550 تەست جاساۋعا قاۋقارلى. وسى ۋاقىتقا دەيىن 130 مىڭعا جۋىق ازامات سىناما جاساتقان.
ەپيدەميانىڭ ەكىنشى تولقىنىنا دايىندىق كەزىندە رەانيماتسيالىق توسەكتەردى جابدىقتاۋ ماقساتىندا 314 فۋنكتسيونالدى كەرەۋەت, 381 دوزاتور, 266 رەانيماتسيالىق مونيتور جانە 381 مەديتسينالىق سورعىش قوندىرعى ساتىپ الىنعان. باسقارما باسشىسىنىڭ ايتۋىنا قاراعاندا, سوڭعى كەزدەرى كوروناۆيرۋس ينفەكتسياسى دياگنوزى قويىلعانداردىڭ بارلىعى – رەسپۋبليكانىڭ وزگە قالالارىندا ۆاحتالىق جۇمىس ىستەيتىن ازاماتتار. ولاردان ۆيرۋس كەزەكتى جۇمىس ساپارىنا اتتاناردىڭ الدىندا تاپسىرعان پتر-تەستتىڭ قورىتىندىسى كەزىندە انىقتالىپ وتىر. قازىرگى تاڭدا ناۋقاستار ءتيىستى ەم-دومىن الۋدا.
«پاندەميا ءورشىپ تۇرعان ۋاقىتتا, ياعني جاز ماۋسىمىندا كوۆيد جانە پنەۆمونياعا شالدىققان جۇكتى ايەلدەرگە مەديتسينالىق كومەك كورسەتۋدە قيىندىقتارعا تاپ بولدىق. سەبەبى قالالىق ينفەكتسيالىق گوسپيتالدا ورىن جەتىسپەۋشىلىگى تۋىندادى, ال پەريناتالدىق ورتالىقتار ۆيرۋس جۇقتىرعان جۇكتى پاتسيەنتتەردى قابىلداي المادى. وكىنىشكە قاراي, وسىنداي پروبلەمالاردىڭ سالدارىنان 12 اياعى اۋىر ايەل كوز جۇمدى. مۇنداي قاتەلىكتەرگە جول بەرمەس ءۇشىن قالالىق جۇقپالى اۋرۋلار ورتالىعىندا جۇكتى ايەلدەرگە ارنالعان وپەراتسيالىق بلوك ازىرلەپ قويدىق. جاقىندا عانا وندا كوۆيدكە كۇدىكتى اي-كۇنى جەتىپ قالعان جۇكتى ەمدەلۋشىگە دارىگەرلەر كەسار تىلىگىن جاساپ, امان-ەسەن بوساندىرىپ الدى. دۇنيەگە كەلگەن قىز بالا دەرەۋ قالالىق بالالار اۋرۋحاناسىنا وقشاۋلاندى. سابيدەن ۆيرۋس انىقتالعان جوق», دەيدى ب.پوزيلوۆ.
كوروناۆيرۋس جانە پنەۆمونيامەن اۋىرعاندار وڭالتۋدى قاجەت ەتەدى. وسى ورايدا ءۇشىنشى مەگاپوليستە كوروناۆيرۋسپەن اۋىرىپ, ەمدەلىپ شىققان ناۋقاستارعا وڭالتۋ شارالارى جەكەمەنشىك كلينيكالاردا جۇرگىزىلۋدە. ولاردىڭ بارلىعى قاجەتتى اپپاراتتارمەن, ونىڭ ىشىندە وكپەنىڭ جۇمىسىن قالپىنا كەلتىرەتىن ەڭ باستى قۇرال – ۆيبرولانگپەن جابدىقتالعان. الداعى ۋاقىتتا ىندەتتەن ايىققان جانداردى ساۋىقتىرۋ ءۇشىن ارنايى وڭالتۋ ورتالىعىن اشۋ جوسپارلانىپ وتىر. ول ءۇشىن قالادان قۇرىلىس نىسانى تاڭدالۋدا. سونداي-اق ىندەتپەن كۇرەس جۇمىستارىنا مامانداردى جۇمىلدىرماس بۇرىن ولاردىڭ جاس شاماسىنا, دەنساۋلىق جاعدايىنا دا كوڭىل بولىنۋدە. ەگەر مەديتسينا قىزمەتكەرىنىڭ جاسى ۇلكەن نەمەسە قوسىمشا اۋرۋلارى بار بولاتىن بولسا, ولار ناۋقاستارمەن تىكەلەي قارىم-قاتىناسقا تۇسپەيتىن پاتسيەنتتەردى ديستانتسيالىق تۇردە باقىلاۋ, قوڭىراۋ شالۋ سەكىلدى وزگە شارالارعا جۇمىلدىرىلۋدا. مامان تاپشىلىعى دا وڭ شەشىمىن تاۋىپ كەلەدى. بۇل ورايدا, باسقارما باسشىسى جىل باسىنان بەرى 14 157 مەديتسينا قىزمەتكەرى كوروناۆيرۋستىق ينفەكتسيانى ەمدەۋ بويىنشا وقىتۋدان وتكەنىن ايتادى. سونداي-اق دارىگەرلەر ءۇشىن سەمينارلار ءجيى-ءجيى وتكىزىلۋدە.
«بۇگىندە رەانيماتولوگتەردىڭ جەتىسپەۋشىلىگىن شەشۋ ماقساتىندا 40 رەزيدەنت پەن 39 فتيزياتر-پۋلمانولوگ رەانيماتسيالىق العاشقى كومەك كورسەتۋ بويىنشا وقىتىلۋدا. ارينە, ساننان گورى ماماننىڭ ساپاسى, بىلىكتىلىگى اسا ماڭىزدى. ءبىز وسى ماقساتتا جوعارى وقۋ ورىندارىندا ءبىلىم الىپ جاتقان 40 رەزيدەنتتىڭ وقۋ ۇلگەرىمىن باقىلاپ وتىرمىز. ءبىلىم ساپاسى جوعارى بولۋىن ءجىتى نازاردا ۇستاۋدامىز», دەيدى باسقارما باسشىسى.
ىندەتتەن ساقتانۋ بويىنشا ءتۇسىندىرۋ جۇمىستارى دا جان-جاقتى جۇرگىزىلۋدە. مىسالى, قالاداعى 36 مەملەكەتتىك جانە 22 جەكەمەنشىك مەديتسينالىق ۇيىم رەسمي پاراقشالارى ارقىلى اپتاسىنا ءۇش رەت كوروناۆيرۋستان ساقتانۋ جولدارىن تىكەلەي ەفيردە تۇسىندىرگەن. جالپى, بۇگىنگە دەيىن وسىنداي 90-عا جۋىق تىكەلەي ەفير ۇيىمداستىرىلىپتى.
شىمكەنت
