مەگاپوليستە جالعاسىپ جاتقان كارانتيندىك شارالار ءداستۇرلى جۇگىرىستەردى وتكىزۋگە مۇمكىندىك بەرمەيدى. سول سەبەپتى, جارىستى ۇيىمداستىرۋشى ء«بىرىنشى بولۋ – باتىلدىق» كورپوراتيۆتىك قورى ءىس-شارانىڭ جاڭا, ەرەكشە فورماتىن ويلاپ تاپتى. جارىسقا قاتىسۋشىلاردىڭ تاڭداۋىنا قالانىڭ 4 تانىمال جۇگىرۋ ورنى ۇسىنىلدى. بۇلار – قر تۇڭعىش پرەزيدەنتى اتىنداعى ساياباق, سايران كولىنىڭ ساياباق ايماعى, باۋم اتىنداعى توعاي, «اتاكەنت» قىىو ساياباعى.
قاتىسۋشىلار باستالۋ ۋاقىتى مەن ورنىن وزدەرى تاڭدادى. بەلگىلى ءبىر مارشرۋت بولعان جوق. تاڭدالعان ساياباقتىڭ اۋماعىندا تولىق قاشىقتىقتى جۇگىرىپ ءوتۋ قاجەتتىلىگى ماڭىزدى شارت بولدى. 4 شاقىرىمنان 6 شاقىرىمعا دەيىنگى قاشىقتىق ءتىپتى جاڭا باستاعان جۇگىرۋشىلەردىڭ دە قاتىسۋىنا مۇمكىندىك بەردى.
جارىس سوڭىندا, بارلىق «جارىس قاھارماندارى» انىقتالىپ, ماراپاتتالدى. 4 قاشىقتىقتىڭ ارقايسىسىندا ەڭ جىلدام بولعان ءۇش ەر ادام مەن ءۇش ايەل ادامعا ماداقتامالار مەن باعالى سىيلىقتار بەرىلدى.
– بيىل ءبىز ونلاين-جارىستار وتكىزۋدە مول تاجىريبە جينادىق, – دەيدى «جارىس قاھارمانىنىڭ» ۇيىمداستىرۋشىسى سالتانات قازىباەۆا. – ءبىز سپورتپەن اينالىسۋ ءۇشىن تەك موتيۆاتسيا مەن نيەت كەرەك ەكەنىن كورسەتتىك. بۇكىل قازاقستان بويىنشا مىڭداعان جۇگىرۋشى ءبىزدىڭ ونلاين-جۇگىرىستەرگە قاتىستى. ادامدارعا سپورت, ماقسات كەرەك. مۇندايدا جارىستار كومەكتەسەدى. 2021 جىلى ءداستۇرلى جارىستار وتكىزە الامىز دەپ ۇمىتتەنەمىز. بۇگىندە دەنساۋلىق پەن مىقتى يممۋنيتەت – ءبىزدىڭ باستى بايلىعىمىز. بۇل, سپورتپەن شۇعىلدانۋ جانە سالاۋاتتى ءومىر سالتىن ۇستانۋ ارقىلى جۇزەگە اسىرىلادى.
ۇيىمداستىرۋشىلار ونىنشى مەرەيتويلىق «الماتى مارافونىنا» دايىندىقتى باستاپ تا كەتتى. جىلدىڭ كوپتەن كۇتكەن سپورتتىق ءىس-شاراسى 2021 جىلدىڭ 11 ساۋىرىنە جوسپارلانعان. تىركەلۋ ءراسىمى 2021 جىلدىڭ قاڭتار ايىندا اشىلادى.
الماتى
