سەسسيانىڭ مودەراتورلارى رەتىندە بەلسەندىلەر ايدا ءالجانوۆا مەن يرينا ۆيگوۆسكايا قاتىستى. تالقىلاۋ بارىسىندا ەرجان باباقۇماروۆ الەۋمەتتىك ماسەلەلەردى انىقتاۋ مەن شەشۋدەگى, سونداي-اق قوعامدىق باقىلاۋدى جۇرگىزۋدەگى ازاماتتىق قوعامنىڭ ماڭىزدى ءرولىن اتاپ ءوتتى.
ستراتەگيالىق سەسسيانىڭ ماقساتى - قوعام وكىلدەرى ۇسىنىستارى نەگىزىندە الەۋمەتتىك سالاداعى پروبلەمالاردىڭ شەشىمدەرىن ىسكە اسىرۋدىڭ 2023 جىلعا دەيىنگى جوسپارىن ازىرلەۋ.
"ازاماتتىق فورۋم الاڭىنداعى پىكىرتالاستار اتقارىلعان ىستەردى تالداۋعا جانە كەلەشەگىمىزدى انىقتاۋعا كومەكتەسەدى. ستراتەگيالىق سەسسيا فاسيليتاتسيا فورماتىندا وتكىزىلىپ جاتقانىن جەكە اتاپ وتكىم كەلەدى. مۇنداي فورمات بىزگە الەۋمەتتىك-ەكونوميكالىق دامۋدىڭ ماڭىزدى تاقىرىپتارىندا اشىق سويلەسۋگە, قوعامدى, جالپى قالا تۇرعىندارىن تولعاندىراتىن ماسەلەلەردى تالقىلاۋعا كومەكتەسەدى دەپ سەنەمىن", دەپ اتاپ ءوتتى ە.باباقۇماروۆ.
ءوز كەزەگىندە, ازاماتتىق بەلسەندىلەر, ۇەۇ وكىلدەرى قالالىق قانا ەمەس, رەسپۋبليكالىق دەڭگەيدەگى جاڭا مىندەتتەرگە بايلانىستى ماسەلەلەردى شەشۋ بويىنشا ءوز ۇسىنىستارىن ايتتى.
فورۋم بارىسىندا ەكولوگيا, دەنساۋلىق ساقتاۋ, ءبىلىم بەرۋ, الەۋمەتتىك قورعاۋ جانە تسيفرلاندىرۋ سالالارى بويىنشا قالا الدىندا تۇرعان مىندەتتەردى شەشۋ ماقساتىندا جەرگىلىكتى اتقارۋ ورگاندارى مەن ازاماتتىق قوعام اراسىنداعى ءوزارا ارەكەتتەستىكتىڭ ماڭىزدى ماسەلەلەرى كوتەرىلدى.
