بۇعان دەيىنگى ويىندا «لوكوموتيۆتەن» ءىرى ەسەپپەن جەڭىلگەن سوڭ, «بارىس» حوككەيشىلەرىنە پسيحولوگيالىق تۇرعىدان بۇل كەزدەسۋ قيىنعا سوقتى. دەگەنمەن جەرلەستەرىمىز جەڭىس ءۇشىن بارىن سالدى. ماتچ باستالا سالا جىلدام شابۋىل ۇيىمداستىرىپ, كەزدەسۋدىڭ 3-مينۋتىندا ەسەپ اشتى. گول اۆتورى – لينۋس ۆيدەلل. بۇل – شۆەتسيالىق شابۋىلشىنىڭ كەيىنگى ءتورت ويىنداعى ءۇشىنشى گولى. ارادا 5 مينۋت وتكەندە «نەفتەحيميك» حوككەيشىسى مارات حايرۋللين ويىنداعى ەسەپتى تەڭەستىرىپ كەتتى. ءبىرىنشى كەزەڭ 1:1 ەسەبىمەن اياقتالدى.
ەكىنشى 20 مينۋت قوناقتار ءۇشىن ءساتتى باستالدى. ەلوردالىق كلۋب حوككەيشىلەرىنىڭ جىلدام شابۋىلى ياكوب ليليانىڭ گولىمەن اياقتالىپ, ەسەپ 2:1-گە جەتتى. «بارىس» ويىنشىلارى ەسەپتەگى ۇستەمدىكتى ماتچ سوڭىنا دەيىن ساقتاپ, ماڭىزدى جەڭىسكە قول جەتكىزدى. وسىلايشا, سىرت ايدىنداعى ءۇش ويىندى جەڭىسپەن باستاپ, جەڭىسپەن تۇيىندەدى. العاش «سەۆەرستالدى» 3:1 ەسەبىمەن جەڭسە, ەكىنشى كەزدەسۋدە «لوكوموتيۆتەن» 7:2 ەسەبىمەن وڭباي جەڭىلگەن-ءدى.
