«بۇگىندە تۋريستەر اراسىندا Rixos Water world قوناقۇيى باعىتىنان بولەك بوزجىرا شاتقالى دا تانىمال. ءبىزدىڭ ستاتيستيكامىز بويىنشا قازىر بۇل جەرگە كەلۋشىلەر سانى وتكەن جىلمەن سالىستىرعاندا 10 ەسە ارتقان. جوبامەن بيىل 2 مىڭنان استام ادام كەلگەن. ال كەلەسى جىلى بۇل كورسەتكىش ارتىپ, كەمى 10 مىڭنان اسا تۋريست كەلەدى دەگەن بولجام بار», دەدى ۆيتسە-مينيستر.
جۋىردا الەۋمەتتىك جەلىلەردە əكىمدىك شاتقالدا «بوزجىرا سافاري وتەل» قوناقۇي كەشەنى جوباسىن جۇزەگە اسىرادى دەگەن حابار تاراعان ەدى. بۇل جايتقا قاتىستى ەكولوگتەر اتالعان جەرگە قۇرىلىس سالۋ زيان ەكەنىن ايتىپ, قارسى بولعان. وركەن بيساقاەۆ وسى جايتقا قاتىستى تۇسىنىكتەمە بەرىپ, الدىمەن ەكونوميكا تۇرعىسىنان قاجەتتىلىك پەن ەكولوگيا اراسىنداعى تەڭدىكتى ساقتاۋ ماڭىزدى ەكەنىن جەتكىزدى.
«شاتقالدى قاراپ شىققان ماماندار بۇل جەرگە ادامدار مەن كولىكتەر ەركىن, ەش قيىندىقسىز كەلىپ-كەتە الاتىنىن ايتىپ وتىر. ياعني جەر رەلەفى ەشقانداي ارنايى دايىندىقتى كەرەك ەتپەيدى. ءبىزدىڭ ويىمىزشا, اتالعان جوبا كوپ تۋريست كەلەتىن ەرەكشە تابيعي ورىن ءۇشىن ۇلكەن قاۋىپ توندىرەدى. بۇل جەردە زيان تاۋعا ەمەس, جازىققا تيەدى. نەگە دەسەڭىز, جازىقتاعى توپىراق كوپ كولىكتىڭ بەيبەرەكەت قوزعالىسىنان ءب ۇلىنىپ, شاڭعا اينالادى. تۋريستەر قوزعالىسىن رەتتەپ, تۋريستەر قابىلداۋ ءۇشىن بوزجىرا تاۋىنا جاقىن جەردە تۋريستىك نىساندار مەن ۇيىمداستىرىلعان قوزعالىس ءۇشىن كىرەبەرىس جول قاجەت», دەپ ءتۇسىندىردى وركەن بيساقاەۆ قوعام وكىلدەرىنە.
سونىمەن قاتار ۆيتسە-مينيستر شاتقال اۋماعىندا ينفراقۇرىلىمدى رەتكە كەلتىرىپ, تۋريستەر قاۋىپسىزدىگى مەن قولايلىعى ءۇشىن بىرقاتار شارانى ىسكە اسىرۋ كەرەگىن اتاپ ءوتتى.
«بوزجىرا شاتقالى ماڭىنداعى نىسان قۇرىلىسى قوعام نازارىنا ۇسىنىلىپ, ەكولوگيا تۇرعىسىنان ساراپتامادان ءوتىپ, قورشاعان ورتاعا əسەرى قانداي بولاتىنىن انىقتاۋ كەرەك. دəل قازىر قوناقۇي قۇرىلىسى جوسپاردا جوق. سونىمەن قوسا ەشقانداي جوبا ماقۇلدانىپ, بەكىتىلگەن جوق», دەدى ول.
بوزجىرا شاتقالى ماڭعىستاۋ وبلىسىندا جەرگىلىكتى ماڭىزى بار «جاباي ۇشقان» قورىعىنىڭ اۋماعىندا ورنالاسقان. «جاباي ۇشقان» كيەلى ورنى ماڭعىستاۋ وبلىسى اكىمىنىڭ قاۋلىسىمەن 2012 جىلى قۇرىلعان. قازىر وبلىستاعى «قىزىلساي» مەملەكەتتىك ايماقتىق تابيعي پاركىنىڭ قۇرامىندا. قورىق تولقۇجاتىنا سايكەس اۋماققا تۋريستەردىڭ كىرۋىنە, تۋريستەردى قابىلدايتىن نىساندار جۇمىسىنا رۇقسات بەرىلگەن.
