سپورت • 16 قاراشا، 2020

پاراليمپياداشىلارىمىز مەملەكەتتىك قولداۋعا يە

155 رەت كورسەتىلدى

كەيىنگى جىلدارى ەلىمىزدە پاراليمپيادالىق سپورت تۇرلەرى قارقىندى دامىپ كەلەدى. ونى جەرلەستەرىمىزدىڭ حالىقارالىق دودالاردا كورسەتىپ جۇرگەن ناتيجەلەرىنەن-اق بايقاۋعا بولادى. ماسەلەن، 2016 جىلى ريودا وتكەن جازعى پاراليمپيا ويىندارىندا ءجۇزۋ سپورتىنان ءزۇلفيا عابيدۋللينا التىن جۇلدە يەلەنىپ، ەل مەرەيىن اسىردى. ەكى جىل بۇرىن پحيونچحانداعى قىسقى پاراليمپيادا شاڭعىشى الەكساندر كوليادين الدىنا جان سالماي، وليمپيادا چەمپيونى دەگەن مارتەبەلى اتاققا يە بولدى.

وسى رەتتە قازاقستاننىڭ ۇلتتىق پاراليمپيادا كوميتەتىنىڭ ۆيتسە-پرەزيدەنتى باقىت ساپاروۆپەن تىلدەسىپ، سپورتشىلارىمىزدىڭ الداعى توكيو پاراليمپياداسىنا دايىندىقتارىن سۇراعان ەدىك.

– باقىت مىرزا، بيىلعى پاندەميا بارلىق فەدەراتسيالاردىڭ جۇمىسىن تۇرالاتىپ، سپورتشىلارعا دا اۋىر سوققى بولعانى راس. وسى ورايدا كاران­تين پاراليمپياداشىلارعا قانشا­لىقتى كەرى اسەرىن تيگىزدى؟

– 2020 جىلدىڭ 30 ناۋرىزىندا حالىقارالىق وليمپيادا كوميتەتى، حالىقارالىق پاراليمپيادا كوميتەتى جانە جاپونيا ۇكىمەتى كوروناۆيرۋستىق پاندەمياعا بايلانىستى توكيودا وتەتىن XVI جازعى پاراليمپيا ويىندارىن كەيىنگە قالدىرۋ تۋرالى بىرلەسكەن شەشىم قابىلدادى. الەمدەگى جاعدايدى ەسكەرە وتىرىپ، ويىندار 2021 جىلدىڭ 24 تامىزى مەن 5 قىركۇيەگى ارالىعىندا وتەدى دەپ جوسپارلانعان. جاھاندىق پاندەمياعا بايلانىستى كوپتەگەن حالىقارالىق جانە رەسپۋبليكالىق ءىس-شارا كەيىنگە شەگەرىلدى.

دەگەنمەن سپورتشىلارىمىز ونلاين جاتتىعۋلار جاساپ، ونلاين جارىستارعا قاتىسۋدا. پارا ساداق اتۋ سپورتىنان، پارا پاۋەرليفتينگتەن سپورتشىلارى­مىز رەسەيلىك، الەمدىك كۋبوكتارعا قاتىس­تى. مىسالى، پارا پاۋەرليفتينگ سپورتشىسى داۆيد دەگتيارەۆ ونلاين الەم كۋبوگىندا بىرنەشە اي جالعاسىپ كەلە جاتقان كەزەڭدەردەن كوش باستاپ، في­نالعا شىقتى. وعان جيىرما شاقتى ەل­دەن سپورتشىلار قاتىسۋدا. ونلاين جا­رىستىڭ ناتيجەسى قاراشانىڭ سوڭىندا بەلگىلى بولادى. كارانتين ۋاقىتىندا قاشىقتىقتى ساقتاۋعا قويىلاتىن تالاپتاردى ەسكەرە وتىرىپ، بارلىق سپورت ءتۇرى بويىنشا جاتتىعۋ پروتسەسى ونلاين رەجىمىندە جۇرگىزىلىپ، باقىلاندى.

وسى ۋاقىت ارالىعىندا پارا­ليم­پياداشىلارعا ۇلتتىق پاراليمپيادا كوميتەتى مەن مەملەكەت تاراپىنان قولداۋ كورسەتىلگەن شىعار؟

– ۇلتتىق پاراليمپيادا كوميتەتى (ۇكپ) كارانتين كەزىندە سپورتشىلاردىڭ جاتتىعۋىن ونلاين تۇردە قاتاڭ قادا­عا­لادى. پاراليمپياداشىلار مەن جاتتىق­تىرۋشىلار كۇندەلىكتى جاتتىعۋلارىن ەسەپ رەتىندە جىبەرىپ تۇردى. مەملەكەت تاراپىنان ەڭ باستى كومەك – ول بيىل العاش رەت ۇپك-نىڭ مەملەكەتتىك تاپسىرىسقا يە بولۋى. ياعني 2020 جىلدان باستاپ ۇلتتىق قۇراما ساپىنداعى پاراليمپياداشىلارىمىز تولىقتاي مەملەكەت تاراپىنان قارجىلاندىرىلىپ، جارىستارعا قاتىسۋعا مۇمكىندىك الدى. ونىڭ ىشىنە قۇراما ساپىنداعى سپورتشىلار مەن جاتتىقتىرۋشىلاردىڭ ايلىق جالاقىسى، سپورتتىق قۇرال-جابدىقتار، وقۋ-جاتتىعۋ جيىندارى مەن شەتەلدىك جارىستارعا قاتىسۋ كىرەدى. وكىنىشكە قاراي، بيىلعى كوپتەگەن جارىسىمىز كەيىنگە شەگەرىلدى. بىراق ءاربىر قيىنشىلىقتى باسقا جا­عى­نان قاراپ، ونى ودان سايىن ساپالى دايىندالۋعا بەرىلگەن ۋاقىت دەپ قابىلداۋعا تىرىسامىز.

جالپى ەلىمىزدە سپورت سالاسى مەملەكەت تاراپىنان جان-جاقتى  قولداۋعا يە بولىپ كەلەدى. وسى ورايدا مەملەكەت تاراپىنان قانداي جوبالارىڭىز قولداۋ تاۋىپ جاتىر؟ سولاردىڭ ەڭ نەگىز­گىلەرىن اتاپ ايتساڭىز.

– بۇگىنگى تاڭدا پاراليمپيادالىق سپورت زاڭمەن رەتتەلەدى. 2016 جىلى پاراديمپيادالىق سپورت تۇرلەرى وليم­پيادالىق سپورت تۇرلەرىمەن، سونىڭ ىشىندە مەدالدار ءۇشىن سىيلىق تولەمدەرى زاڭدى تۇردە وليمپيادا مەدالدارى ءۇشىن تولەمدەر مولشەرىنە تەڭەستىرىلدى. 2017 جىلى ۇلتتىق پاراليمپيادالىق كوميتەت «دەنە شىنىقتىرۋ جانە سپورت تۋرالى» قازاقستان رەسپۋبليكاسىنىڭ 2014 جىلعى 3 شىلدەدەگى No 228-V زا­ڭىندا مەملەكەت تاراپىنان رەسمي تانىلدى. 2020 جىلدان باستاپ قازاق­ستان رەسپۋبليكاسىنىڭ ۇلتتىق پاراليمپيادا كوميتەتى  العاش رەت پاراليمپيادالىق سپورت تۇرلەرى بويىنشا ۇلتتىق قۇراما كوماندالاردىڭ سپورتشىلارىن دايارلاۋ تۋرالى مادەنيەت جانە سپورت مينيسترلىگىنەن مەملەكەتتىك تاپسىرما الدى. ول بويىنشا سپورتشىلار رەسپۋبليكالىق، حالىقارالىق جارىستار مەن وقۋ-جاتتىعۋ جيىندارىنا بارىپ-كەلۋى قارجىلاندىرىلادى.

ودان بولەك وڭىرلەردە جەرگىلىكتى اتقا­رۋشى ۇيىمداردىڭ قولداۋىمەن ينۆاكلۋبتار دامىتىلىپ جاتىر. وڭىرلەردە ىرىكتەلگەن سپورتشىلار قازاقستان چەمپيوناتتارىنا قاتىسىپ، ۇلتتىق قۇراما ساپىندا ەل نامىسىن حالىقارالىق ارەنالاردا قورعايدى.

سپورتشىلاردىڭ الداعى جارىس­تارعا دايىندىقتارى تۋرالى ايتىپ وتسەڭىز. سپورتشىلارىمىزدى الدا قان­داي دودالار كۇتىپ تۇر؟

جىلدىڭ باسىندا پاراليمپيادالىق ات سپورتىنان حالىقارالىق رەيتينگتىك جارىس، پارا شاڭعى جارىسى مەن پارا بيات­لوننان، پارا دزيۋدو مەن پارا پاۋەرليفتينگتەن الەم كۋبوكتارى، پارا جۇزۋدەن بەلارۋس رەسپۋبليكاسىنىڭ اشىق چەمپيوناتى، سونىمەن قاتار پارا دزيۋدودان، پارا پاۋەرليفتينگتەن، پارا ساداق اتۋ سپورتىنان، گولبولدان رەسپۋبليكالىق چەمپيوناتتار ءوتتى.

كارانتين ۋاقىتىندا سپورت­شى­لا­رىمىز وزدەرىنىڭ تۇراتىن جەر­لەرىندە، سپورت تۇرىنە بايلانىستى مۇمكىندىگىنشە كۇندەلىكتى جاتتىعۋ جاساۋدا. مۇمكىندىك بولماسا، ۇيدە شىنىعادى. كۇزدە توكيو ويىندارىنا دايىندىق، ءارتۇرلى سپورت تۇرلەرى بويىنشا وقۋ-جاتتىعۋ جيىندارى باستالدى. ولار بارلىق سانيتارلىق تالاپتاردى ساقتاي وتىرىپ جۇرگىزىلەدى. جىل سوڭىنا دەيىن از ۋاقىت قالدى. وكىنىشكە قاراي، قازىرگى تاڭدا پاندەمياعا بايلانىستى قانداي دا ءبىر جارىستارعا قاتىسۋ توقتاتىلعان. دەگەنمەن جاقىندا بارلىق سانيتارلىق تالاپقا ساي پارا ساداق اتۋ سپورتىنان قازاقستان رەسپۋبليكاسىنىڭ چەمپيوناتى ءوتتى. 2021 جىلى بولاتىن حالىقارالىق جارىستاردان ناقتى حابار كەلمەگەننەن كەيىن، جارىستاردىڭ بارلىعى ويداعىداي جوسپارلانۋدا.

قازىرگى ۋاقىتتا توكيو پاراليم­پياداسىنا پارا تاەكۆوندو مەن جۇزۋدەن  7 جولداما جەڭىپ الدىڭىزدار. الداعى ۋاقىتتا قاي سپورت تۇرلەرىنەن تاعى قان­­شا ليتسەنزيا الۋعا مۇمكىندىك بار؟

– بۇگىندە پارا تاەكۆوندو بويىنشا سپورتشىمىز نۇرلان دومباەۆ پاراليمپيادا ويىندارىنا العاشقى بولىپ ليتسەنزيا جەڭىپ الدى، پارا جۇزۋدەن التى ورىن بىزدىكى. بارلىعى 7 ليتسەنزيا ۇتىپ الىندى. مەملەكەتتىك تاپسىرمانى ىسكە اسىرۋ شەڭبەرىندە قازاقستان رەسپۋبليكاسى ۇلتتىق پاراليمپيادا كوميتەتى 11 سپورت تۇرىنەن ۇلتتىق قۇرا­ما كو­مانداسىن الداعى توكيوداعى ويىن­دارعا دايىندايدى، سونىڭ ىشىندە نىسانا كوزدەۋ، جەڭىل اتلەتيكا، ءجۇزۋ، دزيۋ­دو، پاۋەرليفتينگ، تاەكۆوندو جانە وتىرىپ ويناۋ ۆولەيبولى سياقتى سپورت تۇرلەرىنەن 11 ليتسەنزيانى جەڭىپ الۋدى جوسپارلاپ وتىرمىز.

– اڭگىمەڭىزگە راحمەت.

 

اڭگىمەلەسكەن

ءالي بيتورە،

«Egemen Qazaqstan»

سوڭعى جاڭالىقتار

بۇۇ-نىڭ جاھاندىق شارتىنا قوسىلدى

ەكونوميكا • بۇگىن، 00:34

جەتى ءتۇرلى ءسوز

ادەبيەت • كەشە

انتىنا ادال ازامات

قازاقستان • كەشە

ەلوردا كۇنىنە تارتۋ

تەاتر • كەشە

ۇقساس جاڭالىقتار