قالا تۇرعىندارىنىڭ جوبالىق ۇسىنىستارعا داۋىس بەرۋ قالاي جۇزەگە اسقانىن الماتى قالاسىنىڭ ستراتەگيا جانە بيۋدجەت باسقارماسى باسشىسىنىڭ ورىنباسارى جانار جازىلتاەۆا باياندادى.
«بيىل بارلىعى قالا تۇرعىندارىنان قۇنى 23,7 ملرد تەڭگە بولاتىن 796 جوبا تۇسكەن. بۇل – 2019 جىلعى وتىنىمدەر سانىنان 2 ەسە كوپ. ناتيجەسىندە, 10,7 ملرد تەڭگە سوماعا قالا تۇرعىندارىنىڭ 448 باستاماسى داۋىس بەرۋگە جىبەرىلدى. جوبالاردىڭ بىرەۋىن اۆتورلاردىڭ بىرەۋى قايتارىپ الدى, سايتتا بارلىعى 795 جوبا بار. وتكەن جىلى بارلىعى 333 جوبالىق ۇسىنىس تۇسكەن. ءبىز ەكى ەسەگە دەيىن ايتارلىقتاي وسكەنىن كورىپ وتىرمىز», دەدى ج.جازىلتاەۆا.
وتىنىشتەردىڭ باسىم بولىگى اباتتاندىرۋعا باعىتتالعان: قۇرىلىس جانە تروتۋارلاردى, پاندۋستاردى, ارىقتاردى جوندەۋ, جالپىعا ورتاق ورىنداردا بالالار جانە ويىن, سپورت الاڭدارىن ورناتىپ, جوندەپ, جارىقتاندىرۋ. سونىمەن قاتار جاياۋ جۇرگىنشىلەر ايماعىن جوندەۋ, كۇركەلەردى جوندەۋ جانە ورىندىقتار مەن قوقىس سالعىشتاردى ورناتۋعا قاتىستى ۇسىنىستار ەنگىزىلدى.
رۇقسات ەتىلمەگەن 281 جوباعا قاتىستى ايتار بولساق, بۇل ۇسىنىستاردىڭ كەرى قايتارىلۋىنىڭ نەگىزگى سەبەپتەرى – جوبالىق ۇسىنىستاردىڭ ساناتتارىنا سايكەس كەلمەۋى, جالپى قولدانىستاعى نىسان بولماۋى. سول سياقتى جوبالىق ۇسىنىستاردى جۇزەگە اسىرۋ اۋدان اكىمى اپپاراتتارىنىڭ قۇزىرەتتىلىگىنەن تىس بولعان جاعدايدا ورىندالمايدى. بۇعان قوسا ۋچاسكە جەكە مەنشىك, تۇرعىن ءۇي كەشەنىنىڭ, باۋ-باقشا سەرىكتەستىگى اۋماعىندا ورنالاسسا جانە جەكە كوممەرتسيالىق سيپاتتا بولسا قولداۋ تابا قويمايدى.
اياقتالماعان 60 جوبالىق ۇسىنىسقا قاتىستى ايتار بولساق, ولار اۆتورلارى ناقتىلاپ, قايتادان ءوز ۇسىنىستارىن ەنگىزۋى ءۇشىن تۇزەتۋگە جىبەرىلدى. سوعان قاراماستان, تۇرعىنداردان جوبالىق قۇجاتتاماسىن جاساپ, بولماسا قانداي دا ءبىر ەسەپ جۇرگىزۋ تالاپ ەتىلمەيدى.
«ساراپشى كوميسسيا نەگىزىندەگى ءتيىستى ماماندار كومەك كورسەتەدى.تۇرعىنداردى ۇناعان جوبالارعا داۋىس بەرۋگە شاقىرامىن. جاقسى جوبالاردىڭ كوپ ەكەنىن اتاپ وتكىم كەلەدى. بيىل كەلىپ تۇسكەن ۇسىنىستار سانى كوپ بولدى, اۋداندار بويىنشا بەلسەندىلىك ايتارلىقتاي جوعارى», دەيدى جازيرا جازىلتاەۆا.
تۇرعىندار ەكى تاسىلمەن – ونلاين جانە قاعاز ارقىلى داۋىس بەرە الادى. ودان ءارى قورىتىندىسىن شىعارۋ ءۇشىن داۋىس بەرۋ ناتيجەلەرىنىڭ نەگىزىندە ساراپشىلار كەڭەسى بيىلعى 25 قاراشادان كەشىكتىرمەي شەشىم قابىلدايدى. داۋىس بەرۋ ناتيجەلەرى مەن ساراپشى كەڭەستىڭ شەشىمى اكىمدىكتىڭ ينتەرنەت-رەسۋرسىندا, باق-دا جاريالانباق. ودان كەيىن جوبالاردى «بيۋدجەتكە قاتىسۋ» جوباسىنىڭ اكىمشىلەرى – اۋداندىق اكىمدىكتەر جۇزەگە اسىرادى.
الماتى
