ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە بەلگىلى كاريكاتۋراشى-سۋرەتشى, جۋرناليست ەركىن نۇرازحاننىڭ «شارج شەرۋى» اتتى كىتاپ-البومىنىڭ تۇساۋكەسەرى ءوتتى.
ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە بەلگىلى كاريكاتۋراشى-سۋرەتشى, جۋرناليست ەركىن نۇرازحاننىڭ «شارج شەرۋى» اتتى كىتاپ-البومىنىڭ تۇساۋكەسەرى ءوتتى.
بەينەلەۋ ونەرىنىڭ ەرەكشە ءبىر جانرى كاريكاتۋرا ادامنىڭ بويىنداعى كەمشىلىكتەردى اشكەرەلەيدى دەسەك, ونىڭ ءبىر سالاسى – شارج بەلگىلى ءبىر تۇلعانى كۇلكىلى بەينەلەۋ ارقىلى ىشكى جان-دۇنيەسىن, بولمىسىن, كەلبەتىن كورسەتۋدى ماقسات تۇتادى. ءدال وسى ەرەكشە ونەردىڭ دامۋىنا, قالىپتاسۋىنا وزىندىك ۇلەس قوسىپ جۇرگەن قازاقستاننىڭ حالىق جازۋشىسى مۇزافار الىمباەۆ «كاريكاتۋرا كورولى» دەپ اتاعان كاريكاتۋراشى-سۋرەتشى – ەركىن نۇرازحان ءوزىنىڭ «شارج شەرۋى» كىتابىنا 2005-2011 جىلدار ارالىعىندا سالعان ساياسات, مادەنيەت پەن ادەبيەت, سپورت سالالارىنداعى بەلگىلى تۇلعالاردىڭ, قوعام قايراتكەرلەرىنىڭ ءازىل پورترەتتەرىن توپتاستىرىپتى.
اتالمىش ءىس-شاراعا الىبەك اسقاروۆ, نەسىپبەك ايت ۇلى, كوپەن امىربەك, جەڭىس كاكەن ۇلى, بايانعالي ءالىمجانوۆ, ديقان قامزابەك ۇلى سىندى اقىن-جازۋشىلار, سىقاقشىلار, قوعام قايراتكەرلەرى جانە ەۋرازيا ۇلتتىق ۋنيۆەرسيتەتىنىڭ ستۋدەنتتەرى قاتىستى.
كىتاپ-البومنىڭ تۇساۋكەسەرى اياسىندا شارج شەبەرىنىڭ ءبىراز تۋىندىلارى كىشىگىرىم كورمە رەتىندە قويىلعان ەكەن. كورەرمەن قاۋىم سۋرەتتەردىڭ بارلىعىن كەزەك-كەزەگىمەن قىزىعا قاراپ, بەينەلەنگەن تۇلعالاردى تانىپ, ولاردىڭ ومىردەگى كەلبەتىمەن سالىستىرىپ, ەزۋ تارتىپ جاتتى.
– الىستان قاراساڭىز, قالاي بولسا سولاي سالىنعان سۋرەتتەر سياقتى كورىنەدى. جاقىنداي كەلىپ كۇلكىگە كەنەلدىم. كاريكاتۋراشى ءوزى تاڭداعان تۇلعالاردىڭ كەز كەلگەن ادام بايقاي بەرمەيتىن ەرەكشەلىكتەرىن كەرەمەت بەينەلەگەن, – دەيدى ستۋدەنت ايدانا جولدىگازينوۆا.
سۋرەتشى جەڭىس كاكەن ۇلى ەركىن نۇرازحاننىڭ «شارج شەرۋىنە» ەنگەن ەكى ءجۇز ەلۋگە تارتا تانىمال تۋىندىلارىن كىتاپ ەتىپ قالىپتاۋىنا ەلەۋلى ۇلەس قوسقان ازامات. ول ەركىن اعامەن سوناۋ سەكسەنىنشى جىلدارى «بالدىرعان» مەن «اقجەلكەن» جۋرنالدارىندا بىرگە قىزمەت ىستەگەن ەكەن. «كىتاپتى دايىنداۋ بارىسىندا ەركىن اعانىڭ ويىن, مىنەز-قۇلقىن, بولمىسىن بىلە ءتۇستىم. ونىڭ باعىتى – شارج سالاسى. بۇل بىرىنشىدەن, مىندەتتى تۇردە كۇلكى شاقىرۋ كەرەك. ەكىنشىدەن, اۆتور بويىندا ءاربىر ادام بايقاي بەرمەيتىن اڭعارىمپازدىق قاسيەتى ەرەكشە باسىم بولۋ كەرەك. وسى ەكەۋىن دە ۇشتاستىرا بىلگەن. وعان قوسا, كاريكاتۋرا مەن شارجدىڭ اراسىندا وتە ءبىر نازىك شەكارا بار. كاريكاتۋرا ۋلى ساركازم, قورلاۋ مەن مازاققا نەگىزدەلگەن. ال, شارج تەك قانا ءبارى بايقاي بەرمەيتىن ادامنىڭ قىلىقتارىن كۇلكىلى ەتىپ بەينەلەۋ. وسىنى ءتۇسىنىپ, بۇل زاڭدىلىقتى ساقتاپ جۇرگەن دە ەركىن اعا. جالپى, قازاق حالقى ءبىر-ءبىرىن قاعىتىپ, ازىلدەپ كۇلگەندى ۇناتادى. ال بۇگىنگى تىنىمسىز تىرشىلىكتە قالجىڭداسۋ مەن ازىلدەسۋدىڭ ءوزى ازايىپ بارا جاتقان سەكىلدى. وسى تۇرعىدان الساق بۇل سۋرەتتەر قازاقتىڭ سول ءداستۇرىن جاڭعىرتۋعا ۇلەس قوسادى. ەرەكشە العىسىمىزدى كىتاپتى باسىپ شىعارعان «فوليانت» باسپاسىنا بىلدىرەمىز», – دەدى جەڭىس كاكەن ۇلى.
ەركىن نۇرازحان ن.ۆ.گوگول اتىنداعى الماتى كوركەمسۋرەت ۋچيليششەسىن, ت.جۇرگەنوۆ اتىنداعى الماتى مەملەكەتتىك تەاتر جانە كوركەمسۋرەت ينستيتۋتىنىڭ كوركەمسۋرەت فاكۋلتەتىن بىتىرگەن. «كىمگە كۇلەمىز؟» اتتى ساتيرالىق سۋرەتتەر البومى 2005 جىلى جارىق كورگەن. سۋرەتشى تۋىندىلارى بۇگىندە قازاقستان رەسپۋبليكاسى تۇڭعىش پرەزيدەنتى مۋزەيىندە, الماتىداعى ءا.قاستەەۆ اتىنداعى ونەر مەملەكەتتىك مۇراجايىندا, وسكەمەن, سەمەي قالالارىنداعى بەينەلەۋ ونەرى مۇراجايلارىندا ساقتاۋلى. وسىدان بولەك, ەركىن اعا «بالدىرعان» جۋرنالىندا, «تۇركىستان» گازەتىندە كوركەمدەۋشى رەداكتور, جۋرناليست قىزمەتتەرىن اتقارىپ, «ونەر» باسپاسىندا باس رەداكتور بولعان. بۇگىندە قازاقستان سۋرەتشىلەر جانە جۋرناليستەر وداعىنىڭ مۇشەسى. وسى ەكى ونەردى قاتار الىپ جۇرگەنى ءۇشىن بولار, ساتيريك-جازۋشى قالتاي مۇحامەدجانوۆ وعان «ەركىن – قوس مەكەندى ادام عوي» دەپ قالجىڭداعان كورىنەدى.
كورمەدەن وسى ءبىر ونەر ءتۇرىن قالىپتاستىرىپ, دامىتۋ جولىندا 30 جىلدان استام ۋاقىت بويى ەرەن ەڭبەك ەتىپ جۇرگەن ەركىن اعانىڭ جاس بۋىنعا بەرەرى مول ەكەنىن اڭعاردىق.
نۇرزادا كۇمىسبەك,
ل.ن.گۋميلەۆ اتىنداعى ەۋرازيا ۇلتتىق
ۋنيۆەرسيتەتىنىڭ ستۋدەنتى.
