قازىرگى ۋاقىتتا جۇرەك جاراقاتتارى سيرەك كەزدەسەدى ءارى ءولىمنىڭ 70-80%-عا دەيىنگى جوعارى دەڭگەيىنە اكەلەدى. الماتى تۇرعىنىنىڭ ايتۋىنشا, جانجال بارىسىندا تانىسى وعان پىشاق سۇققىلاعان. ونى وتە اۋىر جاعدايدا, جۇرەك ايماعىندا كوپ قان كەتىپ, تىنىس الۋى قيىنداعان, اق تومەن جانە تاحيكارديامەن جەتكىزدى.
- مۇنداي جاعدايدا ناۋقاسقا جەدەل كومەك كورسەتۋ وتە ماڭىزدى. ءاربىر مينۋت ساناۋلى, - دەيدى ونلاسىن يبەكەنوۆ, جشككا باس دارىگەرىنىڭ حيرۋرگيا جونىندەگى ورىنباسارى. - ەر ادام بىردەن وتا بولمەسىنە جەتكىزىلدى. شوكقا قارسى شارالار اياسىندا حيرۋرگتار توبى توراكوتوميا وتاسىن جاسادى, ياعني كەۋدە قۋىسىن اشۋ ارقىلى حيرۋرگيالىق ارالاسۋ, سول جاق وكپەنىڭ جارالارى مەن جۇرەك جاراسىن تىگۋ, قان كەتۋدى توقتاتۋ جانە پلەۆرا قۋىسىن اعىزۋدى ىسكە اسىردى.
ناۋقاس ءتورت ليترگە جۋىق قان جوعالتتى. وتا كەزىندە پاتسيەنت 11 دوزا قان مەن پلازمانى قابىلدادى.
"سوڭعى جىلدارى پىشاق جاراقاتتارىمەن تۇسكەن ناۋقاستار سانى ازايدى. بۇل قالاداعى قىلمىستىق احۋالدىڭ جاقسارۋىنا بايلانىستى. 90-جىلدارى, 2000-جىلداردىڭ باسىندا پىشاق نە مىلتىق جاراقاتتارى بولماعان كەزەكشىلىك سيرەك كەزدەسەتىن. مەرەكە جانە دەمالىس كۇندەرى مۇنداي جاراقاتتارمەن بىرنەشە ناۋقاس جەتكىزىلەتىن", - دەپ اتاپ ءوتتى ونلاسىن يبەكەنوۆ.
ءبىر جارىم ساعاتتىق وتا حيرۋرگ, رەانيماتولوگ جانە وتالىق ءبولىم مەديتسينالىق قىزمەتكەرلەرىنىڭ ۇيلەسىمدى جۇمىسى ناتيجەسىندە پاتسيەنت 10-شى كۇنى اۋرۋحانادان قاناعاتتانارلىق جاعدايدا شىعارىلدى.
اۋرۋحانا دارىگەرلەرى الماتى جەدەل جاردەم ناۋقاستارىنا كومەك كورسەتۋدى جالعاستىرىپ كەلەدى. ادامداردى قۇتقارۋ - ولاردىڭ كاسىبى. اۋرۋحانادا كۇنىنە 35-كە جۋىق ءار ءتۇرلى وتا جاسالادى.
