جوبانى ىسكە اسىرۋدا جىل باسىنان باستاپ وبلىس كولەمىندە ءتۇرلى فورماتتا ءىس-شارالار وتكىزىلدى. ونلاين فورماتتا ۇلتتىق جانە سپورتتىق ويىن تۇرلەرىنەن جارىستار, بايقاۋلار ۇيىمداستىرىلدى.
"اسىل ءسوز" مەكتەبى" باعدارلاماسى اياسىنداعى وبلىستىق ء"تىل مەرەيى" بايقاۋىنا 6 وقۋشى قاتىسىپ, باق سىناستى. ءبىرىنشى كەزەڭدە وقۋشىلار وتان, ءتىل, پاتريوتيزم تاقىرىپتارىندا ەسسە جازدى. ەكىنشى كەزەڭدە قويىلىمدىق مانەرلەپ وقۋ سايىسىندا قاتىسۋشىلار قازاق اقىندارىنىڭ شىعارماسىنان ءۇزىندى وقىدى. ال, ءۇشىنشى كەزەڭ "شەشەندىك ونەر" سايىسىندا وقۋشىلار بەرىلگەن تاقىرىپ بويىنشا سويلەۋ شەبەرلىگىن تانىتتى.
وڭىرلىك بايقاۋدا قازىلار قاتارىندا "قوعامدىق كەلىسىم" كمم ءبولىم باسشىلارى ايبەك دايراباي جانە قانات اقىلبەكوۆ, ىشكى ساياسات باسقارماسى جانىنداعى تىلدەردى وقىتۋ ورتالىعىنىڭ وقىتۋشىسى بالاۋسا تورەباي بولىپ, تورەلىك ەتتى.
بايقاۋ بارىسىندا ءادىل-قازىلار قاتىسۋشىلاردىڭ سويلەۋ مانەرىنە, ءماتىننىڭ بەينەلىك جۇيەسى مەن مازمۇندىق قۇرىلىمىنا, اكتەرلىك شەبەرلىگىنە, تاڭداپ الىنعان شىعارمانىڭ ەرەكشەلىگىنە ءمان بەردى. ءۇش كەزەڭنىڭ ناتيجەسى بويىنشا I دارەجەلى ديپلومدى №233 ورتا مەكتەبىنىڭ وقۋشىسى ءاليا شاريپاەۆا, II دارەجەلى ديپلومدى №3 IT مەكتەپ-ليتسەيىنىڭ وقۋشىسى الينا كيم, III دارەجەلى ديپلومدى №5 مەكتەپ-ليتسەيىنىڭ وقۋشىسى كارينا چەرەپانوۆا يەلەنىپ, وبلىستىق قازاقستان حالقى اسسامبلەياسى اتىنان باعالى سىيلىقتارمەن ماراپاتتالدى.
ىرىكتەۋدەن وتكەن وقۋشىلار الدا نۇر-سۇلتان قالاسىندا ونلاين جۇيەدە وتەتىن "مىڭ بالا" رەسپۋبليكالىق مادەني-اعارتۋشىلىق جوباسىنىڭ قورىتىندى شاراسىنا قاتىسادى.
