گازعا قوسىلعان العاشقى ۇيلەردىڭ تۇرعىندارى: "بىزگە ءبىر تۇندە 20-عا جۋىق كورشىمىز كەلىپ, قاراپ, قىزىعۋشىلىق تانىتتى. اۋەلدە كومىردەن گازعا اۋىسۋعا بولاتىندىعىنا سەنىمسىزدىك بولدى. قازىر ءبارى وتە قۋانىشتى. تۋىستارىمىز جازىپ, قوڭىراۋ شالىپ, گازعا قوسىلعانىمىزبەن قۇتتىقتاپ جاتىر", دەيدى ولار.
"گاز تارتىلدى. بۇل ۇزاق ۋاقىت بويعى تىنىمسىز ەڭبەك ناتيجەسى. گازعا 11 قاراشادا قوسىلدىق. ءبىزدىڭ اۋدانداعى چاتتا تۇرعىندار قازىر بىزدەن كەيىنگى كوپتەگەن ادامدار ناقتى مىسالدى كورىپ, كومىردەن گازعا كوشۋگە بەل بۋعانىن جازادى. بيىل گاز تارتىلاتىنىنا سەنبەيتىندەر دە بولدى", دەيدى يندۋستريالنىي تا تۇرعىنى داۋلەت بەكبوسىنوۆ.
"كەشە گازعا قوسىلدىق. ەلباسى ەلورداعا گاز جەتكىزىلەتىنىن ايتقان بولاتىن. ءبىز سول جۇمىستىڭ ناتيجەسىن كورىپ وتىرمىز. وتە ريزامىز", دەيدى قالا تۇرعىنى زەينوللا ءابدىروۆ.
اگروقالاشىق تۇرعىن الابىنىڭ ءبىر بولىگى, پرومىشلەننىي, كوكتال-2 تۇرعىن الاپتارىندا دا قۇرىلىس-مونتاج جۇمىستارى اياقتالىپ, قىسىمدى سىناۋ ءجۇرىپ جاتىر. قوسىلۋ ۇستىمىزدەگى جىلدىڭ جەلتوقسان ايىنا دەيىن جوسپارلانعان. جىل سوڭىنا دەيىن كوكتال-1 تۇرعىندارى دا گازعا قوسىلا الادى.
"ەلوردانى گازداندىرۋ – ەلباسىنىڭ تاريحي جوباسى. گازداندىرۋ قورشاعان ورتانى جاقسارتۋعا عانا ەمەس, سونىمەن قاتار جەكە سەكتور تۇرعىندارىنىڭ ءومىر ءسۇرۋ جاعدايلارىن ايتارلىقتاي جەڭىلدەتۋگە مۇمكىندىك بەرەدى. كومىردى قايدا ساقتاۋ كەرەگىن, ونىڭ ساپاسىن ۋايىمداۋدىڭ قاجەتى جوق. ادامدار كومىرقىشقىل گازىمەن ۋلانعان جاعدايلار بولدى. وسى ماسەلەلەردىڭ بارلىعى شەشىمىن تابادى. گازداندىرۋ پروتسەسى بىرنەشە ساتىدا وتەدى جانە بارلىق تۇرعىن اۋداندار كەزەڭ-كەزەڭىمەن قوسىلادى. وسى جىلىتۋ ماۋسىمىندا جەو-1 جانە جەو-2 بىرقاتار قازاندىقتارى دا گازعا اۋىستىرىلدى", دەدى ەلوردا اكىمى التاي كولگىنوۆ.
ىشكى گازبەن جابدىقتاۋ جەلىلەرىن ورناتقان تۇرعىنداردى قوسۋ ءۇشىن رەسپۋبليكا داڭعىلى, 24 مەكەن-جايى بويىنشا "پاراسات" بيزنەس ورتالىعى "قازترانسگاز ايماق" اق كەڭسەسىنە حابارلاسۋ قاجەت. بۇل ۇيىم ىشكى گازبەن جابدىقتاۋ جەلىلەرىنىڭ قاۋىپسىزدىگى مەن تىكەلەي قوسىلۋىن تەكسەرۋمەن اينالىسادى, ءارى قارايعى جۇمىسىنا دا جاۋاپ بەرەدى.
