ي̆وركشير قالاسىندا ۇيىمداستىرىلعان ايقاستىڭ باستى جەكپە-جەگىندە رينگكە كوتەرىلگەن وتانداسىمىز اعىلشىندىق وتە تاجىريبەلى بوكسشى ماكلەي ماكگوۋەنمەن كۇش سىناستى. كاسىپقوي بوكستاعى تۇساۋكەسەر كەزدەسۋىن 2014 جىلى وتكىزگەن 25 جاستاعى بىلعارى قولعاپ شەبەرى بۇگىنگە دەيىن شارشى الاڭعا 15 مارتە شىعىپ, ونىڭ بىردە-بىرەۋىندە قارسىلاسىنا ەسە جىبەرمەگەن. تەك ءبىر كەزدەسۋىندە عانا تەڭ تۇسكەن.
ءوزىنىڭ ەكىنشى كەزدەسۋىندە وسىنداي قارىمدى بوكسشىعا تاپ بولعان تۇرسىنباي قۇلاحمەت قارسىلاسىنان ەش قايمىققان جوق. سالماق ولشەۋ ساتىندە بريتانيالىق بوكسشى وزدەرىنە ءتان ادەتپەن جەرلەسىمىزدى سوزبەن تۇيرەپ السا دا, تۇرسىنباي قازاقى بايسالدىلىقپەن ونىڭ ايتقاندارىنا ميىعىنان ءبىر ك ۇلىپ, «اۋسەلەڭدى رينگتە كورەرمىز» دەگەن يشارا ءبىلدىردى.
جەكپە-جەك باستالا سالا اڭدىسىپ وتىرۋدىڭ قاجەتى جوق دەپ ساناعان قانداسىمىز بىردەن رينگتىڭ ورتاسىن يەلەنىپ, قارسىلاسىن سوققىنىڭ استىنا الا باستادى. راۋند سايىن جىلدامدىعىن ارتتىرعان جەرلەسىمىز جەتىنشى راۋندتىڭ سوڭعى سەكۋندتارىندا وڭ قولىمەن قارسىلاسىنىڭ قۇلاق شەكەسىنەن ۇرىپ, ماكگوۋەندى ەسەڭگىرەتىپ تاستادى. نوكداۋن! تورەشى تەز ارادا ەسەپ اشىپ, بريتانيالىقتىڭ وزىنە كەلۋى ءۇشىن ساناي باستادى. رەفەريدىڭ ساناعى بىتەمىن دەگەنشە, راۋندتىڭ اياقتالعانىن بىلدىرەتىن گونگ ءۇنى ەستىلدى. ءسويتىپ ماكلەيگە ەس جيناپ الۋ ءۇشىن تاعى ءبىر مينۋت ۋاقىت بەرىلدى.
سەگىزىنشى راۋندتا جەكپە-جەكتى مەرزىمىنەن بۇرىن اياقتاۋعا ۇمتىلعان قۇلاحمەت كەزەكتى ءۇش مينۋتتىڭ ورتاسىندا قارسىلاسىن يتەرىپ جىبەرگەنى ءۇشىن تورەشى جەرلەسىمىزگە ەسكەرتۋ جاساپ, ءۇش ۇپايىن الىپ قويدى. قالعان ەكى راۋندتا دا ءبىر دەممەن جۇدىرىقتاسىپ شىققان قازاقستاندىق بوكسشى جەكپە-جەك قورىتىندىسى بويىنشا تورەشىلەردىڭ ءبىراۋىز شەشىمىمەن جەڭىسكە جەتتى. ءۇش تورەشى دە 99-89, 99-89, 99-89 ەسەبىن تىركەدى.
وسىلايشا جەرلەسىمىز ءوزىنىڭ ەكىنشى ايقاسىندا جەڭىسكە جەتىپ قانا قويماي, WBC International بەلبەۋىن يەلەندى. ءسويتىپ ول قازاقستاندىق كاسىپقوي بوكسشىلاردىڭ اراسىندا بەلدىككە ەڭ جىلدام قول جەتكىزگەن ءبىرىنشى بوكسشى اتاندى. ءتىپتى گەننادي گولوۆكيننىڭ ءوزى كاسىبي شارشى الاڭداعى العاشقى بەلدىگىن 2009 جىلى 17-ءشى كەزدەسۋىندە بەلىنە تاققان بولاتىن.
كەشەگى جەڭىسىنەن كەيىن وتانداسىمىز ءوز سالماعىندا 2025 بوكسشىنىڭ اراسىندا الەمدىك رەيتينگتە 102-ورىنعا كوتەرىلدى. ايتا كەتەيىك, اۋەسقوي بوكستا ازيا چەمپيونى جانە الەم بىرىنشىلىگىنىڭ قولا جۇلدەگەرى اتانعان تۇرسىنباي قۇلاحمەت كاسىپقوي بوكستاعى العاشقى جەكپە-جەگىن وسى جىلدىڭ 23 تامىزىندا ساعادات راحمانقۇلمەن وتكىزىپ, تەحنيكالىق نوكاۋتپەن جەڭىسكە جەتكەن ەدى.
