قاراشانىڭ العاشقى ون كۇندىگى «بالا شەلدون», «جاقسى دارىگەر» سەكىلدى تانىمال جوبالاردىڭ كەزەكتى ماۋسىمىمەن قاتار چاك ءلوريدىڭ جاڭا سيتكومى, مۇعالىم مەن وقۋشىنىڭ رومانى تۋرالى دراما جانە وزگە دە جاڭا سەريالدارمەن قۋانتقان ەدى. Netflix, «كينوپويسك HD», «امەدياتەكا» سىندى الىپ ينتەرنەت-كينوتەاترلار بۇل جولى دا قوعامدىق قاتىناستاردى جاڭعىرتۋدى ماقسات ەتكەن بىرقاتار سەريالداردى كورسەتكەلى وتىر.
ء«تاج» (The Crown), 4-شىعارىلىم, تۇساۋكەسەرى 15 قاراشادا, Netflix ارناسىندا
II ەليزاۆەتا پاتشايىمنىڭ ومىرباياندىق تاريحناماسى اناۋ ايتقانداي وزا شاپپاسا دا, ديزاين كوركەمدىگى مەن تەگەۋرىندى تاسقىنىمەن تاڭعالدىردى. دراماتۋرگ پيتەر مورگان ونداعان ساعاتتىق سەريانىڭ ءتورتىنشى ماۋسىمىن جالعىز ءوزى جازىپ جاتىر, ال ەكراندا حح عاسىردىڭ تاڭعاجايىپ تۇلعالارىن بەينەلەيتىن جۇلدىزداردىڭ باعى اسىپ تۇر. بۇل جولعى ءتورتىنشى شىعارىلىمعا پاتشايىم رولىندەگى وليۆيا كوۋلمان, مارگارەت حانشايىمدى ويناعان حەلەنا بونحام كارتەر, مارگارەت تەتچەردىڭ ءرولىن سومدايتىن اڭىز دجيلليان اندەرسون مەن ديانا حانىم بولىپ قايتا ومىرگە كەلگەن جۇلدىز ەمما كوررين كەلىپ قوسىلدى.
«اي بازاسى 8» (Moonbase 8), تۇساۋكەسەرى 8 قاراشادا, «امەدياتەكا» ارناسىندا
A24 كومپانياسىنىڭ ۇنەمى جولى بولا بەرمەيتىن بەيباق عارىشكەرلەردىڭ ايعا ۇشار الدىنداعى NASA بازاسىنداعى جاتتىعۋلارى جايىن باياندايدى. ءفيلمنىڭ كومەديا ءانسامبلى فرەد ارميسەن, دجون س. رايلي جانە تيم حەيدكەردەن قۇرالعان. ناعىز كۇزگى كوڭىل كۇيگە ارنالعان كومەديا ەكەنى ءسوزسىز.
«جالعا بەرۋ» (The Rental), تۇساۋكەسەرى 12 قاراشادا, IVI پلاتفورماسىندا
اعايىندا قوس جىگىت (تەلە جۇلدىزدار دەن ستيۆەنس پەن توبي گۋسس) اپتا سوڭىندا دەمالۋدى ۇيعارادى. جارقاباق باسىنداعى بيىكتە ورنالاسقان ءۇيدىڭ توڭىرەگى كوز قۋانتارلىق ادەمى. تەك ولاردى قارسى العان ادامنىڭ سيقى وتە كۇماندى ەدى. اقىرى دەمالۋعا كەلگەن جىگىتتەر كوڭىلدەرى كۇپتى بولسا دا, اقشاسىن تولەپ, ۇيگە ورنالاسادى. ءفيلمنىڭ ءارى قارايعى شيەلەنىستى جەلىسى كىمدى بولسىن قىزىقتىرماي قويماسى انىق.
ۇلكەن اسپان (The Big Sky), تۇساۋكەسەرى 17 قاراشادا, ABC ارناسى
ABC ارناسىنىڭ دراماسى جەكە دەتەكتيۆ پەن بۇرىنعى پوليتسەيدىڭ بىرلەسىپ, جوعالىپ كەتكەن اپالى-ءسىڭلىلى قىزداردى ىزدەۋ وقيعاسىن بايان ەتەدى. ولاردى تراسسا بويىندا جۇك كولىگىنىڭ جۇرگىزۋشىسى ۇستاپ الىپ كەتكەن. تەرگەۋ بارىسىندا بۇرىن دا وسى ايماقتا قىزدار ۇرلانعانى بەلگىلى بولادى. ەكى تەرگەۋشىنىڭ ماقساتى – كەزەكتى قايعىلى جاعداي بولماي تۇرعاندا مانياكتىڭ اياعىنا تۇساۋ سالۋ.
«كيت اۋلاۋشى», تۇساۋكەسەرى 21 قاراشادا, «كينوپويسك HD» ارناسىندا
چۋكوتكادا جەرگىلىكتى تۇرعىندارمەن بىرگە تۇسىرىلگەن فيلم ون جىل بويى ويلاستىرىلعان ەدى. «كيت اۋلاۋشى» – بۇل بوزبالا لەشكا مەن ونىڭ جاقىن دوسى كولياننىڭ ەرجەتۋى جايىنداعى رۋحاني دراما. ەكەۋى دە بەرينگ بۇعازىنداعى كىشكەنتاي كيت اۋلايتىن اۋىلدا تۇرادى. رەسەيدىڭ سولتۇستىك-شىعىسىنداعى انادىر قالاسىنا جەتۋ وڭاي ەمەس. ال قايىقپەن اينالدىرعان ءبىر ساعاتتا جەتىپ بارۋعا بولادى. اۋىلدا ويىن-ساۋىق جوق دەسە دە بولادى, كۇندەگى تىرلىك كيت اۋلاۋدان باستالادى. ودان قالسا كوشەنىڭ انا باسىنان مىنا باسىنا جۇرە بەرۋ دە جالىقتىرادى. جۋىردا قوسىلعان ينتەرنەت بايلانىسى ناشار, ايتسە دە ءتىل بىلمەيتىن, وركەنيەتتەن جىراق جاتقان اۋىلدىڭ بالالارى وزگە كەڭىستىككە, جاڭالىققا قۇشتار ەدى. رەجيسسەر فيليپپ يۋرەۆتىڭ اتالعان ءفيلمى بيىل ۆەنەتسيا كينوفەستيۆالىندە جۇلدەگەر اتاندى.
كەزەكتى ماۋسىممەن شىققان سەريالدار قاتارى ءبىز جوعارىدا توپتاستىرعان فيلمدەر قاتارىمەن شەكتەلمەيدى. تالعامپاز كورەرمەننىڭ تاڭداۋىنان شىعارلىق جاڭا تۋىندىلار ءسات سايىن ۇلكەن ەكرانعا جولدانىپ جاتىر. ستريمينگ پلاتفورمالارداعى كونتەنتتىڭ مۇمكىندىكتەرى مەن كەلەشەگى شەتەلدىك نارىق تاراپىنان قىزىعۋشىلىق تۋدىرىپ كەلەدى. ماسەلەن, جالپى سانى 242 بولىمنەن تۇراتىن سەريال مەن انيماتسيالىق جوبا تمد-داعى ەڭ ۇزدىك ونلاين-كينوتەاتر سانالاتىن IVI.RU پلاتفورماسى ارقىلى تارالماق.
سونىمەن قاتار ۇلتتىق ارنا تاۋەلسىزدىكتىڭ 30 جىلدىعىنا ارنالعان 100 بولىمنەن تۇراتىن «زامانداستار», حالىق جازۋشىسى ءا.نۇرشايىقوۆتىڭ رومانى جەلىسى بويىنشا تۇسىرىلگەن «ماحاببات, قىزىق مول جىلدار» تەلەحيكايالارىن ۇسىنباق.
زاماناۋي سەريالدار – مىنەز-قۇلىق ۇلگىلەرى مەن ەموتسيالىق رەاكتسيالار جيىنتىعىن توعىستىراتىن بۇگىنگى زاماننىڭ ەڭ ماڭىزدى مادەني الاڭىنا اينالدى. تەلەشوۋلار مەن سەريالدار كوتەرەتىن جۇگى, مازمۇندى ساپاسى تۇرعىسىنان رومانعا پارا-پار كەلىپ جاتادى. بۇگىنگى قالا تۇرعىنىنىڭ كۇن تارتىبىنە وتە ىڭعايلى تاراۋلارعا بولىنگەن سەريالدار كۇندەلىكتى ءومىر ىرعاعىنا ساي كەلەدى. ويتكەنى اقپاراتقا شەكتەن تىس قانىققان ادامدار كۇنى بويعى قاربالاستان قولى قالت ەتە قالعاندا, توم-توم كىتاپتاردىڭ بەتىن اشۋى ەكىتالاي. سوندىقتان ىڭعايلى اڭگىمە تاقىرىبىنا اينالعان تەلەشوۋلار, سەريالدار, فيلمدەر بەلگىلى ءبىر تاقىرىپ اياسىندا مادەني ورتا قالىپتاستىرىپ وتىرعانى شىندىق.
