جاسىراتىنى جوق, بۇل ماتچتا «لوكوموتيۆتىڭ» باس باپكەرى اندرەي سكابەلكا ءوزى ەكى جىل باسقارعان قازاقستاندىق كوماندانىڭ وسال تۇسىن تابا ءبىلدى. ناتيجەسىندە, ياروسلاۆل كومانداسىنىڭ ويىنشىلارى ءوز ايدىنىندا وتكەن كەزدەسۋدە «بارىس» قاقپاسىنا 7 شايبا سوقتى. بۇل – ەلوردالىق كلۋبتىڭ وسى ماۋسىمداعى ەڭ ءىرى جەڭىلىسى.
كەزدەسۋدىڭ ەسەبى نەبارى 11-سەكۋندتا-اق اشىلدى. وتكەن ماۋسىمدا «بارىستى» ورگە سۇيرەپ, بۇل ماۋسىمدا «لوكوموتيۆتىڭ» نامىسىن قورعاپ جۇرگەن فينليانديالىق قورعاۋشى اتتە وحتاماا كەزدەيسوق شايبا سوعىپ كوزگە ءتۇستى. ال 2018/2019 جىلى «بارىس» كلۋبىندا ويناعان شۆەتسيالىق شابۋىلشى اندرە پەتەرسسون 18 جانە 31 مينۋتتاردا «بارىس» قاپاسىن ەكى مارتە ءدال كوزدەدى. سونداي-اق «لوكوموتيۆ» قۇرامىنان ەگور اۆەرين (4-مينۋت), دەنيس الەكسەەۆ (33-مينۋت), ەگور كورشكوۆ (34-مينۋت) جانە ۆلاديمير تكاچيوۆ (45-مينۋت) ءوز ەسىمدەرىن تابلوعا جازدىرتتى. ال «بارىس» كلۋبىنان بۇل ويىندا ۆيكتور سۆەدبەرگ (15-مينۋت) پەن كومانداعا جۋىردا عانا قوسىلعان كانادالىق قورعاۋشى ديللون حەتەرينگتون (53-مينۋتتا) كوزگە ءتۇستى.
ەلوردا كومانداسى بىرىنشىلىكتەگى كەلەسى كەزدەسۋىن بۇگىن نيجنەكامسكىنىڭ «نەفتەحيميك» كلۋبىمەن وتكىزەدى. بۇدان كەيىنگى ءۇش كەزدەسۋى قازاقستاندا وينالادى.
