مەملەكەتتىك ىشكى كوشى-قون باعدارلاماسىنىڭ شەڭبەرىندە ەڭبەك جانە حالىقتى الەۋمەتتىك قورعاۋ مينيسترلىگى جۇمىس كۇشى ارتىق اۋدانداردان حالىقتى سولتۇستىك قازاقستان, شىعىس قازاقستان, پاۆلودار, قوستاناي وبلىستارىنا كوشىرۋگە شەشىم قابىلداعانى بەلگىلى. سولتۇستىككە قونىس اۋدارۋعا نەگىزىنەن 18-35 جاس ارالىعىنداعى جۇمىسسىز ازاماتتار كەلىسەدى. ويتكەنى ەڭبەك ەتۋ بەلسەندىلىگى جوعارى وسى جاستاعى ازاماتتاردىڭ كوپشىلىگى بەلگىلى ءبىر سالادا ءبىلىمىن جەتىلدىرگىسى كەلەدى, ەندى ءبىرى جوعارى بىلىمىنە ساي مامان بولۋدى كوزدەيدى, تاعى ءبىرى جەكە كاسىبىن اشۋدى كوزدەيدى. اسىرەسە قۇنارلى قارا توپىراققا جىلىجايلار تۇرعىزىپ, جەمىس-كوكونىس وسىرگىسى كەلەتىندەر كوپ.
حالىق وتە تىعىز ورنالاسقان الماتى, نۇر-سۇلتان, شىمكەنت سەكىلدى قالالار مەن وڭتۇستىك وڭىرلەردە قالاعان جۇمىسىنا ورنالاسۋ نەمەسە جەكە كاسىبىن دوڭگەلەتىپ اكەتۋ ەكىنىڭ بىرىنە بۇيىرا بەرمەيدى. كەرىسىنشە, جۇمىس كۇشى تاپشى سولتۇستىك ايماقتارعا بىلىكتى ماماندار اۋاداي قاجەت. سونىمەن قاتار سولتۇستىك وڭىرلەردەگى اۋىلدىق جەرلەردە بالا سانى از بالاباقشالار مەن مەكتەپتەر دە جەتەرلىك. ەسىل اۋدانىندا دا «100 مەكتەپ, 100 اۋرۋحانا» باعدارلاماسىنىڭ شەڭبەرىندە تۇرعىزىلعان كەيبىر اۋىلدارداعى تاماشا مەكتەپتەردە بالا سانى مۇلدە از بولىپ, قاڭىراپ قالۋدىڭ از-اق الدىندا تۇر. سوندىقتان دا ىشكى ميگراتسيانىڭ مۇندا پايداسى زور.
وڭتۇستىك پەن باتىستان قونىس اۋدارۋشىلارعا مۇندا ەسكى ۇيلەر ۇسىنىلماي, قۇنى ءبىر ملن تەڭگەلىك جاڭا ۇيلەر سالىنۋدا. وسى جىلدىڭ اياعىنا دەيىن ەسىل اۋدانىنا دا 60 تۇرعىن ءۇي سالۋ جوسپارلانعان ەدى. بۇگىنگى تاڭدا سونىڭ جارتىسى قونىستاندىرىلدى. سونىمەن بىرگە اۋدان ورتالىعى ياۆلەنكا سەلوسىندا 27 پاتەرلى جايلى ءۇيدىڭ دە قۇرىلىسى اياقتالدى. جۋىردا وبلىس اكىمى قۇمار اقساقالوۆ وسى جانە باسقا دا جاڭا ۇيلەردىڭ تۇرعىندارىمەن كەزدەستى. سونىڭ ىشىندە تۇركىستان وبلىسىنان كوشىپ كەلگەن ءادىلحان تولتاەۆتىڭ وتباسى دا بار. ولار وسى 27 پاتەرلى ءۇي ورنالاسقان كوشەدە سالىنعان جەتى جاڭا ءۇيدىڭ بىرىنە قونىستانىپتى. ءۇي يەسى وسىندا جۇمىسقا كىرىپ, بالالارىن قازاق مەكتەبى مەن بالاباقشاسىنا ورنالاستىرعان ەكەن. «بىزگە بەرىلگەن ءۇي كەڭ ءارى جارىق. ازىرگە جىلى جانە جايلى بولىپ تۇر. ءبىز مۇندا قاتتى سۋىق بولادى دەگەندى ەستىگەنبىز, وندايدى ءالى كورگەن جوقپىز. بىراق باسقا ادامدار ءومىر سۇرە السا, ءبىز دە ۇيرەنىپ كەتەرمىز», دەپ ويلايمىن دەيدى ول.
سونىمەن بىرگە ءا.تولتاەۆ بۇل جەردىڭ جاز بەن كۇزدەگى تابيعاتى وزىنە قاتتى ۇناعانىن ايتتى. «اققايىڭدى ورماندار قاراپ تۇرعاندا كوزىڭدى قۋانتادى ەكەن», دەيدى ول. ءادىلحان ءوزىنىڭ الداعى جوسپارلارى قاتارىنا جىلىجاي اشىپ, جەمىس-جيدەك ءوسىرۋدى جانە دۇكەن اشۋدى مەجەلەپ وتىرعانىن دا ايتتى. وسىنداي وپتيميستىك پيعىلداعى ازاماتتار سولتۇستىكتىڭ بولاشاقتاعى تەگەۋرىندى تۇرعىندارى بولاتىنىنا سەنگىڭ كەلەدى.
جالپى, وبلىسقا تۇركىستاننان عانا ەمەس, الماتى مەن شىمكەنت قالالارىنان دا كوشىپ كەلۋشىلەر بار. بىلتىر سولتۇستىك قازاقستانعا بارلىعى 2333 ادام كوشىپ كەلگەن بولسا, بيىلعى مەجە 2500 ادام. بيىل ولارعا ارناپ جەتى جۇزدەي ءۇي سالىنادى, قازىر ونىڭ نەگىزگى بولىگى تۇرعىزىلعان. وبلىس اكىمى ءوسىمنىڭ ساقتالاتىنىنا سەنەتىنىن ايتتى.
جوعارىدا ايتىلعان 27 پاتەرلى ءۇي الەۋمەتتىك ءالسىز توپتارعا جاتاتىن وتباسىلارعا بەرىلگەن. كەڭ ءارى جارىق ۇيلەرگە تۇسكەندەردىڭ ءبىرى ءتورت بالالى – ەكاتەرينا سالنيكوۆانىڭ وتباسى ەكەن. ول اكىمگە ءوزىنىڭ العىسىن جەتكىزدى.
سولتۇستىك قازاقستان وبلىسى
