جوعارى مەديتسينالىق كوللەدجدىڭ ديرەكتورى سۆەتلانا سۇلتانعازيەۆا الماتى قالاسىنىڭ وڭىرلىك كوممۋنيكاتسيالار قىزمەتىنە ونلاين-سۇحبات بارىسىندا قالادا مەديتسينا كادرلارىن دايارلاۋ تۋرالى مالىمەت بەردى.
بۇگىنگى تاڭدا الماتى قالاسىندا باكالاۆرلاردى, ينتەرندەردى, رەزيدەنتتەر مەن دوكتورانتتاردى دايىنداۋمەن اينالىساتىن ءىرى جوعارى وقۋ ورىندارى, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى, قازاقستان-رەسەي مەديتسينا ۋنيۆەرسيتەتى بار. سونىمەن قاتار, دارىگەرلەردى ءتۇرلى ماماندىقتار بويىنشا ديپلومنان كەيىنگى دايارلاۋدى قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى, قازمۋ مەديتسينا فاكۋلتەتى, قوعامدىق دەنساۋلىق ساقتاۋ جوعارى مەكتەبى جانە الماتى قالاسىندا ورنالاسقان رەسپۋبليكالىق عىلىمي-زەرتتەۋ ينستيتۋتتارى جۇرگىزەدى.
ورتاشا مەديتسينالىق قىزمەتكەرلەردى دايىنداۋمەن 10-نان استام مەديتسينالىق كوللەدج اينالىسادى, ولاردا بۇگىنگى كۇنى 14 مىڭنان استام ستۋدەنت ءبىلىم الۋدا (بۇل ءبىلىم الۋشىلاردىڭ جالپى كونتينگەنتىنىڭ سانى), ولاردىڭ 10%-عا جۋىعى گرانتتىق نەگىزدە وقيدى. وقىتۋ "ەمدەۋ ءىسى", "مەيىربيكە ءىسى", "زەرتحانالىق دياگنوستيكا, گيگيەنا جانە ەپيدەميولوگيا", "ستوماتولوگيا", "فارماتسيا" جانە ت.ب ماماندىقتار بويىنشا جۇرگىزىلەدى.
"2020 جىلى مەديتسينالىق كوللەدجدەردە وقۋدى اياقتاپ, 3628 تۇلەك ديپلوم الدى, اتاپ ايتقاندا ءبىزدىڭ كوللەدجدەن 364 مامان ءبىتىردى. بۇگىنگى كۇنى وسى جىلعى تۇلەكتەر اراسىندا جۇمىسقا ورنالاسۋ پايىزى جوعارى جانە 93%-عا دەيىن جەتەدى, بۇل ءبىزدىڭ ستۋدەنتتەرىمىزدىڭ قاجەتتىلىگىن جانە ءبىلىم بەرۋدىڭ ءتيىستى ساپاسىن كورسەتەدى", دەپ اتاپ ءوتتى س.سۇلتانعازيەۆا.
2021 جىلى كوللەدجدەردىڭ 4100-دەن استام ستۋدەنتى وقۋىن اياقتايدى, ولار الماتى قالاسى مەن وڭىرلەردىڭ تاجىريبەلىك دەنساۋلىق ساقتاۋ سالاسىنداعى قاتارلارىن تولىقتىرادى.
وتكەن جىلدان باستاپ مەديتسينالىق ۇيىمداردىڭ سۇرانىستارىنا سايكەس, كادرلار دايارلاۋعا باعىتتالعان دۋالدى ءبىلىم بەرۋ ەنگىزىلدى, ياعني وقۋ ورنىندا وقىتۋدى تاجىريبەلىك قىزمەتپەن ۇيلەستىرۋ, ءبىلىم الۋشى ءۇشىن جەكە باعدارلاما جاساۋ. ساباقتاردىڭ تەوريالىق بولىگى 30%-دان اسپايدى, ستۋدەنتتەر كوپ ۋاقىتتى تاجىريبەمەن اينالىسادى, ءارى قاراي سول ۇيىمدا جۇمىس ىستەيدى.
جالپى الماتىدا مەديتسينا كادرلارىن دايارلاۋ جۇيەسى قۇرىلعان. وسى باعىتتاعى جۇمىستار جالعاسۋدا.
