"ليشەننيك" دەگەن ءسوزدىڭ ءوزى جۇرگىزۋ قۇقىعىنان ايرىلعان (ليشەننىي پراۆ) دەگەن ءسوزدىڭ حالىق اراسىنداعى ورىسشا قىسقارعان اتاۋى.
"بۇل كۇندەرى جۇرگىزۋشىلىك ءتارتىپتى نىعايتۋ جانە كولىك جۇرگىزۋ قۇقىعىنان ايىرىلعان جۇرگىزۋشىلەردىڭ كولىك جۇرگىزۋ فاكتىلەرىنە جول بەرمەۋ جونىندەگى جۇمىس كۇشەيتىلدى. 5 كۇن ىشىندە وبلىستا جۇرگىزۋ قۇقىعىنان ايىرىلعان ادامداردىڭ كولىك جۇرگىزۋىنىڭ 46 فاكتىسى انىقتالدى", دەپ اتاپ ءوتتى سقو پد جەرگىلىكتى پوليتسيا قىزمەتى باسقارماسىنىڭ باستىعى, پوليتسيا پودپولكوۆنيگى ايدىن بايماتوۆ.
ۇستالعان جۇرگىزۋشىلەردىڭ كوپشىلىگى ماس كۇيىندە كولىك جۇرگىزگەنى ءۇشىن جۇرگىزۋشى كۋالىگىنەن ايىرىلعاندار. سوڭعى ۋاقىتقا دەيىن مۇنداي قۇقىق بۇزۋشىلىق جاساعانى ءۇشىن جۇرگىزۋشىگە ءۇش جىل بويى كولىك جۇرگىزۋگە تىيىم سالىناتىن ەدى. بيىل زاڭناما قاتاڭداتىلىپ, ەندى ىشىمدىك ءىشىپ كولىك جۇرگىزگەن ادام 7 جىل بويى كولىك قۇرالىن جۇرگىزۋ قۇقىنان ايرىلادى.
الايدا وسى شارانىڭ ءوزى جۇرگىزۋشىلەردى تارتىپكە شاقىرا بەرمەيتىنىن فاكتىلەر كورسەتىپ وتىر. سوندىقتان جۇرگىزۋ قۇقىنان ايرىلعان ادامنىڭ كولىگىن دەرەۋ ساتقىزۋ جانە ونىڭ باسقا كولىك الۋىنا تيىم سالۋ تۋرالى زاڭعا قوسىمشا ەنگىزىلسە دۇرىس بولار ەدى. سوندا عانا جۇرگىزۋ قۇقىنان ايرىلعاندار جاياۋ جۇرۋگە ءماجبۇر بولار, ايتپەسە, اۋلاسىندا تەمىر تۇلپارى اڭىراپ تۇرعاندا قالتاداعى كۋالىككە كىم قاراپ جاتىر...
سولتۇستىك قازاقستان وبلىسى
